काठमाडौं, वैशाख १ – काभ्रेबाट रोजगारीका लागि साउदी अरब पुगेकाहरुले गठन गरेको काभ्रे सेवा समाज साउदी अरबले दुर्गम क्षेत्रका बालबालिकाका लागि १० लाख रुपैयाँको अक्षयकोष स्थापना गरेको छ । 

आज बनेपामा गरिएको कार्यक्रममा दुर्गम क्षेत्रका,जेहेन्दार विद्यार्थी, गरिबीको कारण पढाइमा समस्या भएकाहरुका लागि कोष स्थापनाको घोषणा गरिएको हो । 
काभ्रे सेवा समाज साउदी अरबको प्रथम बार्षिक उत्सव, शैक्षिक विकासको लागि अक्षयकोष स्थापना लगायतका विषयमा जानकारी दिन आयोजित पत्रकार सम्मेलनमा अध्यक्ष जेनकुमारले काभ्रे विकास गरौं सबै मिली एकजुट हौं साउदी अरबमा काभ्रेली भन्ने अभियानका साथ खुत्रुके बचतबाट कोष स्थापना गरिएको बताउनुभयो । 

समाजले छात्रवृत्ति कोषसँगै जिल्लामा रहेका सामुदायिक विद्यालयलाई आवश्यक पर्ने शैक्षिक सामाग्री, पोशाक, फर्निचर लगायतको सहयोग उपलब्ध गराउँदै आएको छ । पत्रकार सम्मेलनमा स्थापनाको तीन वर्षमा समाजले साउदीमा अलपत्र परेका २३ जनालाई उद्धार गरेर नेपाल पठाएको पनि जानकारी गराइएको थियो ।