MENU

विशेष

बालुवामा भेटिएका युवाको शव नेपाल फर्काउन सकिएन, दुवईमै सतगत गर्न खर्च छैन

उमाकान्त पाण्डे/उज्यालो । 

साउन १ – युएईको दुवईमा एक नेपाली मृत भेटिएका छन् । नेपाल फर्किन भनेर दुवई विमानस्थल पुगेर त्यहाँबाटै भागेका कास्कीको पोखरा १६ लामाचौरका सुरेश थापा मृत भेटिएका हुन् ।

कम्पनी छोडेर हिंडेको ४५ दिन पछि उनको शव दुवईको अलकुज स्थित औद्योगिक क्षेत्र पछाडीको बालुवामा भेटिएको युएई स्थित नेपाली दूतावासले जनाएको छ । रोयल गण्डकी म्यापावर मार्फत एक वर्ष अघि दुवईको फस्ट सेक्युरिटी ग्रुप कम्पनी अन्तर्गत सेक्युरिटी गार्डको रुपमा आएका थापा मानसिक सन्तुलन गुमाएको जस्तो व्यवहार गर्ने गरेको उनका सहकर्मीहरुले बताएका छन् । 

२९ वर्षे थापा केही समय अघि देखि नै नेपाल फर्कन कम्पनीसँग जोड गरिरहेका थिए । काममा नजाने, गए पनि फर्किने, कोठा छोडेर हिँड्ने र नेपाल फर्किन्छु भन्ने गरेकोले कम्पनीले भिसा रद्द गरेर नेपाल पठाउने प्रक्रिया पूरा गरेको थियो । यसअघि दुई पटक नेपाल फर्काउन भनेर विमानस्थल पुर्‍याएको भए पनि उनी भाग्ने गरेको कम्पनीले जनाएको छ । 

विमानस्थलबाट भागेको केही दिनमा फेरि कम्पनीकै क्याम्पमा आउने, साथीभाइसँग पैसा माग्ने र धेरै रक्सी खान थालेपछि कम्पनीले भिसा नै रद्द गरेर यो पटक विमानस्थल पु¥याएको थियो । अत्याधिक रक्सी खाएकै कारण मृत्यु भएको पोस्टमार्टम रिपोर्टले देखाएको छ ।

सुरेशले निधन हुने दिन पनि घरमा फोन गरेका थिए । भागेर हिँडेको झण्डै ४५ दिन पछि अलकुजमै काम गर्ने अरु नेपालीले उनको शव बालुवामा भेट्टाएका थिए । शवको पहिचान नखुलेपछि उनीहरुले सामाजिक सञ्जालमा मार्फत सोधीखोजी सुरु गरेका थिए । 

पछि युएईमै रहेको कास्की आदर्श सेवा समाजले मृतक कास्कीका भन्ने जानकारी पाएपछि थापाको बारेमा कम्पनी र दूतावाससँग समन्वय सुरु गरेको समाजका अध्यक्ष मनोज कुमार सैंजुले बताउनु भयो । तेस्रो पटक भागेपछि फर्किएर एक दुई पटक कम्पनीको क्याम्पमा आएको र आउने जाने गरे पनि कम्पनी छोडेर भागेको भन्दै कम्पनीले उनी विरुद्ध दुवई पुलिसमा भगौडा कामदार भनेर उजुरी गरेको थियो । 

शव भेटिएको दुई महिनासम्म पनि नेपाल पठाउन सकिएन 

मृत भेटिएको दुई महिनासम्म पनि नेपाल पठाउन नसक्दा सुरेशको शव दुवईमै अलपत्र परेको छ । दुवईको अल जाफ्लिया प्रहरी मार्फत अहिले रशिद हस्पिटलमा राखिएको शव नेपाल पठाउन रकम अभाव भएको दूतावासले जनाएको छ । 

कम्पनीले भिसा रद्द गरेर भगौडा कामदारका रुपमा प्रहरीमा उजुरी गरेकाले शव नेपाल पठाउन कम्पनीलाई बाध्य बनाउन नसकिएको दूतावासको भनाइ छ । तै पनि दूतावासले कम्पनीका प्रतिनिधीसँग अनौपचारिक रुपमा कुराकानी गरेको छ । दूतावासबाट आधिकारिक पत्र पठाए केही रकम कम्पनीले दिन सक्ने ती प्रतिनिधीले बताएका थिए । त्यसै अनुसार गएको बिहीबार कम्पनीलाई पत्र पठाइएको द्वितीय सचिव कृष्ण अर्याले जानकारी दिनुभयो ।

कम्पनी छोडेर अवैधानिक रुपमा बसेका कामदारको शव नेपाल पठाउन बजेट नै नभएकाले शव नेपाल पठाउन नसकिएको हो । स्थानीय प्रशासनले शव नेपाल लैजान नसक्ने भए दुवई मै सतगत गर्न भनेको छ । 

शव नेपाल पठाउन १० हजार दिर्हाम (झण्डै तीन लाख रुपैयाँ) लाग्छ । दुवईमै सतगत गर्दा पनि धेरै पैसा खर्च हुन्छ । दूतावासले शव नेपाल पठाउन रकम नभएको भनेपछि समाजले उद्दार समिति बनाएर आर्थिक सहयोग संकलन अभियान सुरु गरेको छ । 

बजेट मागेर बोर्डमा पत्राचार गर्न टोलीको आग्रह 

‘समस्यामा परेकालाई दूतावासले सहयोग गरिरहेको छ । समाधान पनि गरेको छ । तर थापाको विषयमा धेरै रकम लाग्ने भएकाले समस्या समाधान गर्न गाह्रो भएको हो,’ दूतावासकी श्रम सहचारी हिराकुमारी यादवले भन्नुभयो । 

नेपाली कामदारको समस्या बुझ्न युएई आएको श्रम तथा रोजगार मन्त्रालय र वैदेशिक रोजगार प्रर्वद्धन बोर्डका प्रतिनिधिलाई पनि समाजले थापाको विषयमा कुरा राख्दा यस्ता विषयमा दूतावासले पत्रचार गर्नुपर्ने र दूतावासको पत्र पाइसकेपछि बोर्डको बैठक बसेर निर्णय हुने टोलीले बताएको छ । 

बोर्डका कार्यकारी निर्देशक रघुराज काफ्लेका अनुसार युएई दुतावासले अहिलेसम्म त्यसरी पत्र पठाएको छैन । उहाँले भन्नुभयो, ‘बोर्डमा रकम अभाव छैन, दूतावासले शीर्षक खुलाएर परराष्ट्र वा श्रम तथा रोजगार मन्त्रालय मार्फत बजेट मागे निकासा गर्न सकिन्छ ।’ 

प्रतिक्रिया दिनुहोस

सम्बन्धित समाग्रीहरु

सबै हेर्नुहोस

विशेष

समाचार

पछिल्ला समाचारहरु
Notice, Press Release

मेरो कथा मेरो भोगाई थप सामाग्रीहरु

Download
Mobile App

मेरो पनि भन्नु छ

  • खासै त समस्या छैन तर यसो जानेको कुरो गरुम् भनेर मेरो अनुभव यस्तो छः -भाषाको समस्या,  -भनेको काम नभइ अर्को काममा लगाउने, -कम्पनी राम्रो पर्‍यो भने ठिकै हुन्छ खराब पर्‍यो भने बर्बाद नै हुन्छ, -तोकेको सेलरी भन्दा कम, -यदि पहिलो चोटि विदेश हिड्नु हुदैछ भने अलिकती भए पनि भाषा जान्नुहोस्

    अबिर मान लिम्बु / साउदी अरब
  • हामीहरूलाई मलेसिया आएको ३ महिना भयो। हामीहरूले सम्झौता अनुसार  तलब पाएका छैनौं। काम अनुसार पैसा पाएका छैनौं। बरू उल्टै पैसा पनि काट्यो। हामीहरू लालधनुष म्यानपावरबाट आएका हौं। हामीहरू यहाँ बाङ्गी प्लासटिक टेक्निक कम्पनीमा  आएका छौं। हामीहरू २७ जनाको समुह छ। सबैको ५०० को दरले पैसा काटिरहेको छ। हामीहरू नेपालमा एक लाख ३० हजार तिरेर आएका हौं। कम्पनीलाई गुनासो गर्दा त्यो पैसा नेपालकै म्यानपावरले लिन्छ र यहाँको नेपाली दलालले खान्छन् भन्छ।  पसिना चुहाएर काम गर्छौं हामीहरू पैसा खान्छन् यीनीहरू। हामीहरूको यो ठूलो समस्या हो यो कुरा सरकारी निकायसम्म पुगोस् भन्ने हामीहरू आश राखेका छौं।

    दुर्गानन्द मंडल / सेलेङगर , मलेसिया
  • कामदारको सुरक्षा गर्छु भनेर त बोल्ने मात्रै हुन् । काम कसैले गर्दैनन् । मलाई नै काठमाडौको म्यानपावरको बुटवलमा रहेको शाखाले आजभन्दा २ महिना अघि एक लाख १० हजार लिएर इलेक्ट्रिकल हेल्पर भनेर कतार पठायो । तर कतार पुगेपछि मैले भनेको काम र तलब पाईन् । म्यानपावर र सरकारी निकायले एक अर्कालाइ दोष लगाएर तर्किन खोज्छन् । म्यानपावर कहिले जिम्मेवार हुने अनि सरकारी निकायले कामदारलाई परेको पीडा कहिले बुझ्ने ? 

    ठाकुरप्रसाद तिवारी
  • कामदारको अवस्था नाजुक रहेका बेलामा दिवस मनाउनु र कामदारका अधिकारका कुरा गर्नुको कुनै अर्थ छैन । उहाँले हजारौ नेपली कामदार जो आफ्नो अधिकार नपाएर खडिको तातो मरुभुमी मा घोडाले खाने चना खानाको रुपमा खादै रगतको पसिना बगाउदै छन । तर न त भने बमोजीम तलब पाउछन, न त करार अबधि मा मेनपावरलाई बुझाएको ऋणको चर्को ब्याजनै तिर्न सक्छन ? फर्केर आउदा न त घर रहन्छ न जग्गा ? यस्तो अबस्थामा दिबस मनाउनु ति पिडित कामदारको पिडामा उत्सब मनाउनु हो ।

    ​दिलु घर्तीमगर
सबै हेर्नुहोस