MENU

विशेष

चर्पी बनाउदा लागेको ऋण तिर्न युएई आएकी जनातुनलाई घर मालिकले तीन लाखमा किनेको भनेपछि

उमाकान्त पाण्डे/उज्यालो । 

युएई, साउन २ – ‘घर फुसको भएपनि बढेका छोरीहरुको इज्जत धान्न चर्पी बनाएँ, दुई लाख १० हजार रुपैयाँ ऋण लाग्यो, ऋण तिर्न भनेर विदेश आएको के भो के,’ आबुधाबीस्थित नेपाली दूतावासको सेल्टरमा रहेकी सर्लाहीकी जनातुन खातुनले भन्नुभयो । खातुन युएई आएको दुई महिना भयो । 

ऋण लागेको थाहा पाएपछि खातुनलाई एजेन्टले अनेक लोभ देखाउन थाले । त्यै लोभमा परेपछि एजेन्टले आफूलाई बेचेको उहाँले थाहा पाउनु भएन । काठमाडौंका फकिर भन्ने एजेन्टले उहाँलाई भारतको बाटो हुँदै युएई ल्याइपु¥याएको थियो ।

युएई आइपुगे पछि साहु लिन आएका छैनन् भन्दै १७ दिनसम्म काेठामा थुनेर राखे । १७ दिनपछि मालिकले लगेपनि उहाँले सोचजस्तो भएन् । घरमा उहाँलाई दुव्र्यवहार गर्न थालेपछि खातुनले नेपाल फर्काइदिन साहुलाई धेरै आग्रह गर्नुभयो । तर घर फर्काउने भन्दा पनि उहाँलाई अझ मनपरी व्यवहार गर्न थाले ।

सजिलो काम र मासिक २५ हजार रुपैयाँ तलव हुन्छ भनेर चिनजानका दलालले उहाँलाई युएई पठाएका थिए । काम र कमाई दुवै नभएपछि उहाँले नेपाल नै फर्कने निधो गर्नुभयो । तर नेपाल फर्कन सजिलो थिएन ।

काम राम्रो होला भनेर साहुको ऋण तिर्न विदेशिएकी खातुनले यस्तो होला भनेर सोच्नुभएकै थिएन् । उहाँले साहुलाई नेपाल फर्काइदेउ भन्दा १२ हजार दिर्हाममा किनेर ल्याएको जवाफ दिएपछि उहाँ छाँगाबाट खसेझैं हुनुभयो । दुईचार पैसा कमाउने सपनाको पोको बोकेर युएई पुगेकी खातुनले आफूलाई बेचेर दलाले पैसा पोको पा¥यो होला भनेर सपनामा पनि सोच्नुभएको थिएन् ।

‘गरिबलाई जता गएपनि दुःख मात्र भोग्नु पर्ने,’ खातुनले निन्याउरो मुख लगाउँदै भन्नुभयो । उहाँलाई परदेशमा पनि गरिबलाई नै बेच्दा रहेछन जस्तो लाग्छ । उहाँले कवाडी उठाउने देखि गलैचा उद्योगमा पनि काम गर्नुभयो । यति गर्दापनि भनेजस्तो नभएपछि परदेश लागेकी खातुन दलालको फन्दामा पर्नुभयो ।

सानैमा बुवा वितेपछि उहाँलाई आमाले काखी च्यापेर काठमाडौं आउनुभएको थियो । भएका एउटा दाइ पनि भारत पसेपछि कहाँ हराए थाहा छैन । पाएसम्मका सबै काम गरेर उहाँको बाल्यकाल बित्यो । गलैंचा उद्योगमा काम गर्न थालेपछि उहाँलाई रोग लाग्यो । सधै टाउको दुख्ने भएपछि उहाँ काठमाडौंको वीर अस्पतालमा जाँच गराउन जानुहुन्थ्यो । 

त्यही क्रममा चिनजान भएकी महिलाले नै उहाँलाई फकिर भन्ने दलालसँग मिलेर युएई पठाएकी थिइन् । एउटा रोगको उपचारमा जाँदा भेटिएको साथीकै कुरामा बिश्वास गर्दा उहाँ युएईमा बेचिनु पर्‌‍यो ।

चर्पी बनाउदा लागेको ऋण तिर्न विदेश 

जनातुन खातुन यसअघि पनि कुवेत जानु भएको थियो । कुवेतमा पनि घरेलु काममै गएकी उहाँको काम र कमाइ राम्रो थियो । कुवेतको कमाइले उहाँले सर्लाहीको पिपरिया ५ मा पाँच धुर जग्गा समेत किन्नु भयो । कुवेतबाट फर्केपछि उहाँले बिहे पनि गर्नुभयो ।

खातुनको विवाह दोब्बर उमेरको मोहम्मद मोक्शायदसँग भयो । बिहेमा दाइजो दिन नसक्ने भएपछि पहिलो श्रीमती बितेका मोक्शायदसँग उहाँले बिहे गर्नुभएको थियो । उहाँलाई विवाह भएको कति भयो सम्झना छैन् । 

दुई छोरी र एक छोरी पनि छन् । भर्खरै ३२ वर्ष लागेकी खातुनको श्रीमान भने ६५ वर्ष लागिसकेका छन् । गाउँकै सरकारी स्कुलमा पढिरहेका तीन जना छोराछोरीलाई राम्रो स्कुल पढाउने उहाँको सपना पूरा भएन् । ‘एक त विदेश गएको भनेपछि गाउँलेले राम्रो नजरले हेर्दैनन्, झन मलाई के आइलाग्यो,’ खातुनले आँशु झार्दै भन्नुभयो ।

‘चर्पी थिएन कति दिन खेतको आलीमा दिसापिसाव गर्नु,’ खातुन भन्नुहुन्छ, ‘हुर्केका छोरी छन् । त्यसैले घर फुसको भएपनि पक्कि चर्पी बनाएको ।’ त्यसमा विदेश जादा तिरेको २५ हजार पनि थपिएको छ । १२ हजार दिर्हाममा बेचेका दलालले उहाँबाट पनि २५ हजार उठाउन भ्याएछन् ।

कालो वर्णकी खातुन छोरा भने गोरो भएको बताउनुहुन्छ । उहाँलाई गोरो मान्छे देख्नासाथ आफ्नै छोरा जस्तो लाग्छ । छोरो पढाएर पत्रकार बनाउने सपना बोकेकी खातुनलाई अब नेपाल फर्किएर कसरी बालबच्चा पढाउने अनि ऋण तिर्ने सोच्न सक्नुभएको छैन् । 

पैसा जुटाएर उद्दार 

सरकारले गएको फागुनदेखि वैधानिक रुपमा महिलालाई घरेलु काममा पठाउन रोक लगाए पनि भारत लगायतका बाटो हुँदै घरेलु काममा जाने महिलाको संख्या बढिरहेको छ ।

यसरी अवैधानिक बाटो हुँदै विदेश आउने महिलालाई विभिन्न तवरबाट अर्थिक सहयोग जुटाएर नेपाल पठाउने गरेको दूतावासकी श्रम सहचारी हिरा कुमारी यादवले बताउनुभयो ।

खातुनको सहयोगका लागि पनि युएईमा रहेको नेपाली मुस्लिम समुदाय र सर्लाही सेवा समाजलाई अनुरोध गरिएको छ । त्यस्तै हवाई टिकट जुटाउन युएईको आबुधाबीमा कार्यरत गायक प्रकाश पौडेलले सामाजिक सन्जाल मार्फत अभियान चलाउनु भएको छ । 

 

प्रतिक्रिया दिनुहोस

सम्बन्धित समाग्रीहरु

सबै हेर्नुहोस

विशेष

समाचार

पछिल्ला समाचारहरु
Notice, Press Release

मेरो कथा मेरो भोगाई थप सामाग्रीहरु

Download
Mobile App

मेरो पनि भन्नु छ

  • हामीहरूलाई मलेसिया आएको ३ महिना भयो। हामीहरूले सम्झौता अनुसार  तलब पाएका छैनौं। काम अनुसार पैसा पाएका छैनौं। बरू उल्टै पैसा पनि काट्यो। हामीहरू लालधनुष म्यानपावरबाट आएका हौं। हामीहरू यहाँ बाङ्गी प्लासटिक टेक्निक कम्पनीमा  आएका छौं। हामीहरू २७ जनाको समुह छ। सबैको ५०० को दरले पैसा काटिरहेको छ। हामीहरू नेपालमा एक लाख ३० हजार तिरेर आएका हौं। कम्पनीलाई गुनासो गर्दा त्यो पैसा नेपालकै म्यानपावरले लिन्छ र यहाँको नेपाली दलालले खान्छन् भन्छ।  पसिना चुहाएर काम गर्छौं हामीहरू पैसा खान्छन् यीनीहरू। हामीहरूको यो ठूलो समस्या हो यो कुरा सरकारी निकायसम्म पुगोस् भन्ने हामीहरू आश राखेका छौं।

    दुर्गानन्द मंडल / सेलेङगर , मलेसिया
  • कामदारको सुरक्षा गर्छु भनेर त बोल्ने मात्रै हुन् । काम कसैले गर्दैनन् । मलाई नै काठमाडौको म्यानपावरको बुटवलमा रहेको शाखाले आजभन्दा २ महिना अघि एक लाख १० हजार लिएर इलेक्ट्रिकल हेल्पर भनेर कतार पठायो । तर कतार पुगेपछि मैले भनेको काम र तलब पाईन् । म्यानपावर र सरकारी निकायले एक अर्कालाइ दोष लगाएर तर्किन खोज्छन् । म्यानपावर कहिले जिम्मेवार हुने अनि सरकारी निकायले कामदारलाई परेको पीडा कहिले बुझ्ने ? 

    ठाकुरप्रसाद तिवारी
  • कामदारको अवस्था नाजुक रहेका बेलामा दिवस मनाउनु र कामदारका अधिकारका कुरा गर्नुको कुनै अर्थ छैन । उहाँले हजारौ नेपली कामदार जो आफ्नो अधिकार नपाएर खडिको तातो मरुभुमी मा घोडाले खाने चना खानाको रुपमा खादै रगतको पसिना बगाउदै छन । तर न त भने बमोजीम तलब पाउछन, न त करार अबधि मा मेनपावरलाई बुझाएको ऋणको चर्को ब्याजनै तिर्न सक्छन ? फर्केर आउदा न त घर रहन्छ न जग्गा ? यस्तो अबस्थामा दिबस मनाउनु ति पिडित कामदारको पिडामा उत्सब मनाउनु हो ।

    ​दिलु घर्तीमगर
  • पहिलो कुरा भ्रष्टाचारविरुद्ध खरो रुपमा प्रस्तुत हुनुहुपर्छ। सरकार, नेता, कर्मचारी, सञ्चारमाध्यम र सर्वसाधारणले नियम पालना गर्नुपर्छ। स्वरोजगारका लागि सरकारले आयमुलक योजना ल्याउनुपर्छ। प्राकृतिक साधन र स्रोतको गहिरो अध्ययन गरेर उपयोग गर्नुपर्छ। यसका लागि बाह्य पूँजी नभई स्वदेशी लगानीमा गर्नुपर्छ। सर्वसाधारणलाई पनि लगानीका लागि वातावरण बनाउनुपर्छ। यसो गर्दा स्वरोजगार हुनेको संख्यामा वृद्धि हुन्छ। रोजगारीका लागि विदेश जाने स्वतः घट्छन। विदेश नै पठाउने हो भने जि टु जी सम्झौता गरेर पठाउनुपर्छ। अरु आकर्षक गन्तव्य पनि खोजी गर्नुपर्छ। 

    गंगा राना / मलेसिया
सबै हेर्नुहोस