MENU

मेरो कथा मेरो भोगाई

​मुनड्रप्स म्यानपावरले दुवईको सप्लाई कम्पनी र त्यसले ब्लक बनाउने कम्पनीमा हामीलाई बेचेछ

राम अधिकारी, इटहरा–९ मोरङ/हाल, दोहा कतार ।

परदेशिनुको कारण आआफ्ना समस्याका कारणले नै हो । समस्या मेरो पनि थियो । घरको आर्थिक अवस्था कमजोर थियो । दाजुले पनि राम्रो कमाइ गर्न सक्नुभएको थिएन । काठमाडौंमा गुजारा चलाएर बस्नुभएको थियो । 

घरमा खर्च बढ्न थाल्यो । दिदीको विवाह गर्नुपर्ने बेला भएको थियो । त्यसका लागि पैसा थिएन । यिनै  समस्याका कारण मैले नेपाल छोड्ने विचार बनाएँ । चिनेजानेकै एजेन्टलाई पासपोर्ट जिम्मा लगाएर पैसाको बन्दोबस्त गर्न लागियो । 

गाउँकै साहुबाट सयकडा तीन रुपैयाँको ब्याज दरमा ७० हजार रुपैयाँ ऋण लिएर सेल्सम्यानको कामका लागि दुवई उडियो । मसँगै अरु ६ जना साथी पनि थिए । तर दुवईमा पाइला के राखेका थियौं, हाम्रो होसहवास् उड्यो । जुन महिनाको तातो घामले हाम्रा सबै चाहनाहरु सुकाई दियो । 

११ घण्टाको प्रतीक्षा पछि बल्ल बल्ल एउटा अरेबियन मानिसले हामीलाई लिएर गयो । दुई घण्टाको दूरीपछि एउटा अँध्यारो कोठामा हामीलाई पुर्‍याइयो । केही समय पछि खानेकुरा दिइयो । हामी दुई दिनदेखी भोकै थियौं । खानेकुरा भोकाएको बाघले मृगलाई लुछे जस्तै खोसाखोस गरेर खायौं । 

अरबियनले हामीलाई बाहिरबाट चाबी लगाइदियो । अब हामी पिञ्जडामा चरालाई थुने जस्तै भयौं । निन्द्राले मात्तिएका हामी मज्जाले सुतेछाैं । कसैले बोलाए जस्तो लाग्यो । घरमा बुबाले बिहान अबेरसम्म सुत्दा घरको बार्दलीबाट कराए जस्तै लाग्यो । उहीँ अरबियन रहेछ । हामीलाई उठाएर बर दुवईबाट सारजाह भन्ने ठाउँमा लैजान आएको रहेछ ।

एल्ला एल्ला जल्दी जल्दी भन्दै थियो । हामी पनि हतार हतार गरेर उसले भनेको मान्दै गयौं । १० मिनेट जतिमा हात मुख धोएर तयार भइयो । अनि एयरकण्डिसन भएको बसमा बसियो र दुवईको विकास अवलोकन गर्न थालियो । 

कति अग्ला अग्ला घरहरु भन्दै साथीहरुले सडक किनारमा रहेका गगनचुम्बी भवनहरु देखाउँदै थिए । म चाहिँ घरबाट कहिल्यै बाहिर नगएको भएर होला घरको यादमा टोलाइ रहेको थिएँ । केही घण्टापछि हामीलाई व्यस्त शहरको एउटा अध्यारो घरमा पुर्‍याइयो । त्यहाँ हाम्रा लागि भनेर एउटा कोठामा ६ वटा ओछ्यान तयार पारिएको रहेछ । रात निक्कै छिप्पिएको थियो । हामी थाकेका पनि थियौं । सबैजना पैसा कमाउने र सुन्दर भविष्य बनाउने सपना देख्दै निदाएछौं । 

भोलीपल्ट अर्कै मानिस आएर हामीलाई उठायो । ऊ बंगलादेशी रहेछ । ऊ भन्दै थियो ‘आज से आप लोग हमरा कम्पनीका मेम्बर हे, हामरा कम्पनी आपलोगोको कन्ट्रयाक्टमे लेलिया हे ।’ 

वास्तवमा हामीलाई नेपालको मुनड्रप्स म्यानपावरले यहाँको सप्लाएर कम्पनीमा बेचेको रहेछ । अनि यहाँको सप्लाएर कम्पनीले अर्कै ताबुक (ब्लक) बनाउने कम्पनीमा बेचेको रहेछ । त्यही कम्पनीको फोरमेन रहेछ बंगाली चाहिँ । 

हामी उसलाई सबै कुरा सोध्न थाल्यौं । ऊ भन्दै थियो, यो ब्लक बनाउने कम्पनी हो, खुला आकाशमा काम गर्नुपर्छ । ५२ डिग्रीसम्म तापक्रम हुन्छ । अस्ति भर्खर एउटा केटा गर्मीका कारण ढल्यो । ऊ अस्पतालमा नै छ । 

यी कुरा सुनिरहँदा हाम्रा आँखाहरु पिलपिलाउन थालेका थिए । एकले अर्काको आँखामा हेर्न सकेका थिएनौं । बंगाली हामीलाई ड्युटी हिँड्न आग्रह गर्दै थियो । तर हामी कसैको हिम्मत थिएन काममा जान । अन्तिममा हामीले यस्तो काम नगर्ने निर्णय गर्‍यौं । काममा पनि गएनौं । 

त्यसपछि हामीलाई अनेक प्रकारका मानिसहरुले धम्की दिए । कतिले सम्झाउने प्रयास गरे । तीन दिनसम्म खाना पनि दिएनन । तीन दिन बंगालीले दिएको दालमोठ र पानीको भरमा बिताइयो । पछि हामीलाई सप्लाएर कम्पनीले जिम्मा लियो । अरु एक हप्ता फेरी हामीलाई बन्द कोठामै राख्यो । केही नलागेपछि हामीलाई नेपाल पठाइयो । 

त्यसबेला नेपालमा द्वन्द्व चलिरहेको थियो । हामीले विदेश गएको पैसा पनि फिर्ता पाएनौं । नेपालमा काम गरिखान पनि सकेनौं । आखिरमा विदेशिनुको विकल्प थिएन । हिजोआज म कतारमा श्रम बेचिरहेको छु । 

मेरो कथा मेरो भोगाई

तपाईसँग पनि यस्तै भोगाई, अनुभव, कथा छन र हामीसँग बाड्नु चाहानुहुन्छ भने लेखेर 'desh@unn.com.np' मा पठाउनुहोस् ।

प्रतिक्रिया दिनुहोस

विशेष

Notice, Press Release

समाचार

  • गुल्मीमा रक्त संचार केन्द्रका लागि गुल्मी समाज युकेले गर्‍यो सहयोग

    गुल्मी, फागुन ९ – गुल्मी जिल्ला समाज युकेले जिल्लाका दुई संस्थाहरुलाई १२ लाख रुपैयाँ सहयोग गरेको छ । समाजले नेपाल रेडक्रस सोसाइटी जिल्ला शाखा गुल्मीको रक्त संचार केन्द्र स्थापनाको लागि नौ लाख र अपांगताको क्षेत्रमा काम गर्नका लागि आशा अपाङ्ग केन्द्रलाई तीन लाख रुपैयाँ सहयोग गरेको हो ।

  • सिन्धुपाल्चोकमा विद्यालय अभिमूखीकरण

    रीनाश्रेष्ठ/सिन्धुपाल्चोक, उज्यालो । सिन्धुपाल्चोक, फाल्गुण ८ — सिन्धुपाल्चोकको स्याउलेस्थित सेतीदेवी माध्यमिक विद्यालयमा सुरक्षित बैदेशिक रोजगार सम्वन्धी विद्यालय अभिमूखीकरण कार्यक्रम सम्पन्न भएको छ ।

  • ​सप्तरीका राम सरदारको कतारमा मृत्यु

    अशोक कुमार साह/उज्यालो । सप्तरी, फागुन ८ – सप्तरीको जमुनी मधेपुरा–९ भथौलका राम सरदारको वेदैशिक रोजगारीको शिलशिलामा कतारमा ज्यान गएको छ । सरदारको गएको शुक्रबार कामबाट फर्किएर सुतिरहेको अवस्थामा ज्यान गएको परिवारले जनाएको छ ।

  • रामेछापमा वैदेशिक रोजगार सम्वन्धी अभिमुखिकरण

    सिर्जना बस्नेत/रामेछाप । रामेछाप, फागुन ८ – रामेछापको सदरमुकाम मन्थलीमा सुरक्षित वैदेशिक रोजगार सम्बन्धी एक दिने अभिमुखिकरण सम्पन्न भएको छ । चारघरे सेवा समिति रामपुरको आयोजनामा भएको अभिमुखिकरण कार्यक्रममा २१ जना प्रहरी जवानको सहभागिता थियो ।

पछिल्ला समाचारहरु
Download
Mobile App

भिडियो

लेवनानमा कार्यरत एक नेपाली महिला घरेलु कामदारको पीडा ।भिडियाे साैजन्य : निरु लिम्बू