MENU

मेरो कथा मेरो भोगाई

तपाईले बोलेका कुराले कस्तो तनाव दिन्छ बालबालिकालाई ?

दुर्गाप्रसाद भट्टराई/सर्लाही

१२ वर्षका समिर (नाम परिर्वतन) आफ्नो बुवासँग एकदमै झुमिनुहुन्थ्यो । तीन वर्ष अघि समिरका बुवा मलेसिया जानुभयो । मलेसियाबाट फर्किंदा उहाँले पैसा त लिएर आउनुभयो तर सँगै एड्स पनि लिएर आउनुभयो । त्यो कुरा समिरले केही समयपछि थाहा पाए । 

एकदिन समिरले घरमा कुराकानी हुँदा आफ्नो बाबा अब केही दिनको पाहुना मात्रै हुनुहुँदो रहेछ भन्ने कुरा थाहा पाए । त्यसपछि त समिरले बाबाले अब जुनसुकै बेला हामीलाई सँधैका लागि छोडेर जाने हो ? भनेर सोध्न थाले । त्यसको केही समयपछि समिर कम बोल्न थाले । अहिले पनि उनको अवस्था त्यस्तै छ । समिर अहिले त्यति बोल्दैनन् चुपचाप लागेर बाबालाई हेरिरहन्छन् र आँखाबाट आँसु खसालिरहन्छन् । 

सागर (नाम परिवर्तन) अहिले १५ बर्षको भए तर उनलाई प्रहरी देख्यो की डर लाग्छ । सागरको विद्यालय जाने बाटोमै प्रहरी चौकी छ । त्यही भएर सागर त्यो बाटै हिँड्दैनन् । सागर अर्को बाटो घुमेर विद्यालय जान्छन् । सागरलाई किन त्यसो गरेको त भनेर सोध्दा उनी सानोमा आमासँग केही माग्दा आमाले प्रहरीले पक्रिन्छ भनेर डर देखाउनुहुन्थ्यो त्यही भएर प्रहरीसँग डर लाग्छ भन्छन् । 

अभिभावकले कुराकानी गर्दा बालबालिकाले अपेक्षा र कल्पना नगरेको कुरा गर्दा उनीहरुलाई तनाव हुँदो रहेछ भन्ने समिरका समस्या सुन्दा थाहा हुन्छ । त्यस्तै केही छिनको आफ्नो फाईदा र स्वार्थको लागि बालबालिकाहरुलाई अभिभावकहरुले अनावश्यक डर देखाउँदा, शारीरिक दण्ड तथा मनमा गहिरो चोट पुग्ने खालका शब्दको प्रयोग र गाली गर्दा पनि बालबालिकाको मष्तिष्कमा नराम्रो असर पर्ने रहेछ भन्ने सागरका कुरा सुन्दा थाहा हुन्छ ।

त्यति मात्रै होइन आफनो काम लिनलाई बालबालिकालाई झुटो आश्वासन दिने अनि काम पूरा भएपछि उनीहरुले भनेका वा मागेका कुरा पुरा नगरिदिने बानी पनि धेरै अभिभावकको छ । बालबालिकाहरुले गरेको सकारात्मक कामको कहिले प्रशंशा नगर्ने तर केही गल्ती गरेमा त्यही कुरालाई लिएर सँधै गाली गरिरहँदा उसको मानसिकतामा नराम्रो असर पर्ने देखिन्छ ।

वास्तवमा  बालबालिकाको तनाब बढाउने काममा उनीहरुका परिवारकै सदस्यको काम नै मुख्य कारण देखिन्छ । उनीहरुले चाहेर बालबालिकालाई तनाव दिएका होइनन् तर पनि उनीहरुले गर्ने ससाना कामले पनि पछिसम्म मानसिक असर पर्ने गरी तनाव दिइने कुरा समिर र सागरका कुरा सुन्दा नै थाहा हुन्छ ।

बालबालिकालाई तनावबाट छुटकारा दिलाउन अभिभावकले के गर्ने त ?

सबैभन्दा पहिले बालबालिकाहरुका अगाडि के कुरा गर्नु हुन्छ के कुरा गर्नुहुँदैन भन्ने कुरामा सचेत हुनुपर्छ । त्यसलाई नै आफ्नै दैनिक रुपमा व्यवहारमा प्रयोग गर्नुपर्छ । डर देखाएर बालबालिकाहरुलाई काम लगाउनुहुँदैन ।

डरले तत्कालको लागि फाईदा पुर्याएपनि भविष्यमा बालबालिकाहरुलाई डरपोक र कमजोर बनाई दिन्छ । जसको उदारण सागर पनि हुन्।आफ्ना बालबालिकाहरुलाई सुरक्षाको अनुभूति गराउनुहोस् ताकी उनीहरुलाई लागोस् मलाई आवश्यक परेको बेलामा मेरो सहयोगी हातहरु आमाबुबा हुन भन्ने लाग्नुपर्छ ।

बालबालिकाहरुसँग कुराकानी गरेर उनीहरुका कुरा सुनिदिनुस् अथार्त सिधै बालबालिकाको कुरालाई खारेज नगर्नुहोस् । बालबालिकाले देखाउने तनाव, डर र त्रास कम गराउनका लागि उनीहरुुसँग खेल्नुहोस् र समय पनि दिनुहोस्  ।

तनाव, डर र त्रासका कारण पहिचान गरी त्यसलाई घटाउने उपायहरुको सूचि तयार पार्नुहोस् र त्यसलाई दैनिक रुपमा आफनो व्यवहारमा प्रयोग गर्नुहोस् ।

(दुर्गाप्रसाद भट्टराई सर्लाहीको ग्रमिण नारी उत्थान संघ हरिपुरको सहजीकरणमा हरिऔनमा संचालित सुरक्षित आप्रवासन सूचना तथा परामर्श केन्द्रमा मनोसामाजिक परामर्शकर्ताको रुपमा कार्यरत हुनुहुन्छ ।) 

मेरो कथा मेरो भोगाई

तपाईसँग पनि यस्तै भोगाई, अनुभव, कथा छन र हामीसँग बाड्नु चाहानुहुन्छ भने लेखेर 'desh@unn.com.np' मा पठाउनुहोस् ।

प्रतिक्रिया दिनुहोस

विशेष

Notice, Press Release

समाचार

पछिल्ला समाचारहरु
Download
Mobile App

भिडियो

मृत्यु, माफी र ‘ब्लडमनि’ को व्यथा ! भिडियोः उज्यालो।