काठमाडौं, असार ३० - जर्मनीका प्रशिक्षक जोचिम लोले विश्वकपको फाइनलमा अर्जेन्टिनाविरुद्ध गोल गर्ने मारियो गोट्जेलाई आफूले जाऊ र देखाउ विश्वलाई तिमी मेसीभन्दा उत्कृष्ट छौं भनेर मैदान पठाएको जानकारी दिएका छन् ।

गोट्जेले अतिरिक्त समयको खेल सकिन ७ मिनेट बाँकी हुँदा गरेको एक मात्र गोलको मद्दतमा जर्मनीले विश्वकपको उपाधि जितेको थियो ।

लोले अतिरिक्त समयको हाफमा गोट्जेलाई ‘देखाऊ विश्वलाई, तिमी मेसीभन्दा उत्कृष्ट छौ र तिमीले विश्वकपको फैसला गर्न सक्छौ’ भन्दै हौसला बढाएका थिए ।

ब्राजिलको रियो द जेनेरियाको मरकाना स्टेडियममा भएको खेलको ८८ औं मिनेटमा गोट्जे मिरोस्लाभ क्लोजको ठाउँमा मैदान छिरेका थिए । आन्द्रे सर्लेको पास छातीले रोक्दै गोट्जेले प्रहार गरेको भलि सटमा अर्जेण्टिनी गोलकिपर बिट भएका थिए । बार्यन म्युनिखबाट व्यवसायिक फुटबल खेल्दै आएका २२ वर्षको गोट्जेको देशका लागि यो ११ औं गोल हो । आफूले गोट्जेप्रति सधैं सकरात्मक सोचाई राख्ने गरेको जानकारी दिँदै लोले भने ‘गोट्जे जादुगर केटा हुन्, उनीसँग जुनसुकै पोजिसनमा पनि खेल्न सक्ने क्षमता छ ।’ अतिरक्त समयमा अर्जेन्टिनाका खेलाडी निक्कै थाकेको भन्दै लोले खेलाडीलाई खेल पेनाल्टी सुटआउटमा नलैजान निर्देशन दिएका थिए । आफूहरुको टिमको रुपमा ५५ दिनदेखि सँगै रहेको भएपनि जर्मनीले विश्वकप जित्ने यो योजना १० वर्ष अघि जुर्गेन क्लिन्सम्यानको पालामा नै बनेको लोको भनाई छ । ल्याटिन अमेरिकामा विश्वकप उपाधि जित्ने पहिलो युरोपियन टिम बन्न पाएको गर्व लागेको लोले बताए । खेलमा निर्णयक गोल गरेको गोट्जेले आफूले अविश्मरणीय अनुभव गरिरहेको बताए । विश्वकप सामान्य प्रतियोगिता नभएको भन्दै उनले भने ‘यस्तो महत्वपूर्ण प्रतियोगितामा गोल गरेपछि तपाईंले अनुभव नै गर्न सक्नुहुन्न कि के भइरहेको छ ।’