काठमाडौं, साउन २ - विश्वकप फुटबलको उपाधि विजेता जर्मनीका  कप्तान फिलिप ल्हामले अन्तर्राष्ट्रिय फुटबलबाट सन्यास लिएका छन् ।

राष्ट्रिय टोलीबाट सन्यासको घोषणा गरेपनि उनले क्लब फुटबल भने खेल्नेछन् । ल्हामले विश्वकप अघि मात्र बायर्न म्युनिखसँग सन् २०१८ सम्मका लागि  अनुबन्ध गरेका थिए ।

जर्मन फुटबल संघले ३० वर्षे ल्हामले अन्तर्राष्ट्रिय फुटबलबाट सन्यास लिएको पुष्टि गरेको छ । ‘मेरो नेतृत्वमा टोलीले विश्वकप जितेपछि करिअरको अन्त्य गर्न पाउँदा मलाई धेरै खुसी लागेको छ ।’ ल्हामलाई उधृत गर्दै जर्मनी फुटबल संघले आफ्नो वेवसाइटमा लेखेको छ ।

संघका अध्यक्ष वल्फग्याङ नेर्सबुचका अनुसार ल्हामले उनलाई शुक्रबार बिहान भेटेर सन्यासको निर्णयबारे सुनाएका थिए । ल्हामलाई सन्यासको निर्णयमा पुनर्विचार गर्न लगाउनुको कुनै औचित्य नभएको र आफूले प्रयास नगरेको नेर्सबुचको भनाई छ । सन् २००४ मा क्रोएशियाविरुद्धको खेलबाट अन्तर्राष्ट्रिय करिअर सुरु गरेका ल्हामले विश्वकपको फाइनलमा अर्जेन्टिनाविरुद्ध अन्तिम खेल खेले । विश्वका उत्कृष्ट डिफन्डरमा गनिने उनले जर्मनीका लागि १ सय १३ खेलमा ५ गोल गरेका छन् ।