MENU

अन्तर्वार्ता

USAID

भूकम्प पीडितको सहयोगका लागि धुर्मुसले घर बेच्ने

सँधैंजसो टेलिफिल्मको छायांकनमा व्यस्त हुने हाँस्य टेलिश्रृंखला मेरी बास्सैका कलाकार सीताराम कट्टेल (धुर्मुस) वैशाख १२ को भूकम्पपछि कहिले कुटो, कोदालो लिएर नुवाकोट त कहिले त्रिपाल लिएर काभ्रे पुगे । महाविपत्तिमा परी जनधन गुमाउने परिवारहरुको राहत वितरणका लागि धुर्मुस विभिन्न संघसंस्था गुहार्दै हिँडिरहेका छन् । उनै धुर्मुससँग हामीले कुराकानी गरेका छौं ।

वैशाख १२ गते भूकम्प गएका बेला कहाँ हुनुहुन्थ्यो ?

भूकम्प गएका बेला अमेरिकाको सेन्टलुइस शहरमा कार्यक्रम सकेर सुतिसक्या थियौं । सुतेको एकघण्टा पछाडि अस्ट्रेलियाबाट कुञ्जना (सुन्तली) को ठूली आमाको छोरीले नेपालमा ठूलो भूकम्प गयो रे भनेर फोन गरिन अनि एकदमै पीडा भयो । नेपाल एक हप्तापछि आयौं । नेपाल आएकै दिनबाट भूकम्प पीडितको सहयोगका लागि राहत सामग्री लिएर प्रभावित क्षेत्रमा गयौं ।

त्यसपछिको दैनिकी कस्तो भयो ?

हामी बिहान ५ बजेदेखि बेलुका ८ बजेसम्म ननस्टप काम गर्थ्यौं । खाल्डोमा छिर्ने, गाह्रो लाउने, ढुंगा बोक्ने, सिमेन्ट बोक्ने, माटो मुछ्ने, जे जे हुन्छ सबै गर्ने, घर बनाउने क्रममा गर्नुपर्ने सबै काम गरियो । जानियो पनि । दैनिकी भन्नुपर्दा, हरेक पल पीडितसँग नै, अहिले पनि दिमागमा, आँखामा यादहरु झलझली नै छन्, राहत वितरण गरेर पनि बेलुकी आइपुग्ने, बिहान हिँडीहाल्ने, त्यस्तो प्रकारको भयो । लगभग डेढ महिना भयो वस्तीमै छ,ु वस्तीमै बसेको छु । हरेक घरका चुला थाहा भए, हरेक गाँउका मान्छेका चाहना, इच्छा र भावनाहरु यथार्थ रुपमा थाहा पाएँ ।

उद्धार र राहतको लागि कुन कुन ठाँउ पुग्नुभयो ?

हामी नुवाकोट, काभ्रे, सिन्धुपाल्चोक, ललितपुर, भक्तपुर, र धादिङमा पहिलो चरणको राहत वितरणका क्रममा पुग्यौं । पहिलो चरणको राहतमा हामीले त्रिपाल, म्याट, चामल, दाल, चिउरा, चना जस्ता सामग्रीहरु वितरण ग¥यौ । यी सामाग्रीहरु हामीले वास्तविक पीडित पहिचान गरेर वितरण गर्यौं । एक हप्ता बितिसक्दा पनि कतिपय जिल्लामा सरकारको टोली पनि नपुगेको, राजनीतिक दलका कुनै पनि प्रतिनिधिहरु नपुगेको अवस्थामा हामी पुगेका थियौं । त्यस्तै गोरखाको घ्यालचोक, धादिङको नौबिसे भन्दा माथिको एक चेपाङ गाउँ, नुवाकोटको ओखरपौवा लगायतका गाउँमा गइयो र हामीलाई कुन गाउँभन्दा पनि तत्काल के लिएर जाने भन्ने कुरा महत्वपूर्ण लाग्यो ।

कति वटा त्रिपाल बाँड्नुभयो ?

हामीले ७/८ सयको हाराहरीमा वितरण गर्‍यौं र भूकम्प पीडितलाई सहयोग गर्ने भनेर १६ लाख ५० हजार रुपैयाँ घोषणा गरेका थियौं । त्यसमा विभिन्न देशमा रहनुभएका हाम्रा शुभचिन्तकहरुले सहयोग गर्नुभएको थियो । अहिलेसम्म झण्डै १२ लाख  रुपैयाँ खर्च भएको छ  ।

अनि त्यसपछि ?

त्रिपालपछि चर्पी बनाउनतर्फ लाग्यौं र त्यो ठाउँ सिन्धुपाल्चोकको पिपलडाँडा हो । जहाँ मानवीय क्षति बढी भएको थियो । त्यो ठाउँमा चर्पीको आवश्यकता भएको हामीले महसुस ग¥यांै । वैशाख २८ गते गएर ६० घरका लागि १० वटा स्थायी चर्पी निर्माण गरेर फर्किएका थियौं । हामी त्यहाँ जाँदा पहिरो र भूकम्पका पराकम्प आइरहेका थिए । दुई चिरा परेको जमिनको एक चिरामा हामी १६ जनाको टोली बसेका थियौं । त्यसपछि हामी नुवाकोटको ओखरपौवामा ४० वटा स्थायी चर्पी र महाकाली निमाविका लागि अस्थायी कक्षा कोठा निर्माण गरियो । त्यो विद्यालय जेठ ११ गतेबाटै सञ्चालन गर्न सफल भयौं ।
अहिले हामी काभ्रेपलाञ्चोक  पाँचखाल नगरपालिकाको एकदमै लोपोन्मुुख पहरी जाती भएको बस्तीमा २० वटा भूकम्प प्रतिरोधी स्थायी घरहरु निर्माण भैरहेको छ । हामी दुई दम्पत्ति, भद्रगोल टिम, सगुन डट कमको टिम भएर ३ कोठाको भित्रै चर्पी भएको र एउटा धारो भएको स्थायी घर बनाएका छौं । हामी बसेको ठाउँमा बाघ लगायतका जंगली जनावरबाट भने एकदमै बच्नुपर्थ्यो ।

सँधैं हसाइरहने मान्छे त्यस्तो पीडादायी ठाउँमा पनि हँसाउनकै लागि पुग्नुभयो, अब कहिलेसम्म जारी रहन्छ यो सिलसिला ?

राहत पनि भयो, चर्पि पनि भयो, विद्यालय निर्माण पनि भयो । अब एकीकृत बस्ती निर्माणको अभियानमा छौं । भूकम्पपछिको नेपालकै पहिलो एकीकृत बस्ती हाम्रो पहलमा निर्माण भैरहेको छ, जसमा नेपाल आर्मीको ५० जनाको टोलीले पनि सहयोग गरिरहेको छ । सहयोग सँगसँगै धेरै अबरोधहरु पनि झेल्नुप¥यो । देश कुन अवस्थामा छ र देशलाई राजनीतिज्ञले कतातिर मोडिरहेका छन् त भन्ने कुरा पनि बुझ्ने अवसर पाइयो । हामीले जति नै केन्द्रमा बसेर विभिन्न निती बनाए पनि, बैठक बसे पनि देश त्यहाँबाट बनाउन गाउँबाट सुरु गर्नु पर्छ ।

छाप्रोको कथा बनाउन थाल्नु भएको त १० वर्ष भएको थियो, तर छाप्रोका ठ्याक्कै पीडा अहिले पो थाहा भयो होला है ?

हो धेरै पीडा थाहा भयो । हुन त म गाउँमै जन्मे हुर्केको मान्छे, तर म यति गहिराइसम्म जान पाएको थिइन । आफ्नै व्यक्तिगत कुराहरु थिए । अहिले समग्र गाउँका मान्छेहरुको प्रतिनिधित्व गरेर अगाडि बढिएको छौं । जस्तै अहिले २० वटा परिवारलाई घर बनाउँदा २० परिवारका २० थरीका मान्छे सबैलाई एकै ठाँउमा मिलाएर राख्न पक्कै पनि गाह्रो कुरा हो । हामीले उनीहरुलाई सक्ने तवरले एकै ठाउँमा राखेका छांै । सबैलाई सहयोग गर्न अपिल गर्दछौँ, राहत र पुनःनिर्माणको काम हामीले जुन बजेटबाट सुरु गरेका थियौं, त्यो भन्दा दोब्बर तेब्बर हुने भएकोले विभिन्न पाटोबाट सहयोग गर्न अनुरोध गर्न चाहान्छु । हिजोको दिनमा दर्शकहरुलाई हँसाएर हामीलाई प्रसाद स्वरुप एउटा घर निर्माण गर्न सहयोग गर्नुभएको थियो । आज उहाँहरु दुःखी हुँदा हाम्रो मन एकदमै दुःखी भएको छ । उहाँहरुलाई सहयोग गर्ने प्रतिबद्धताका साथ हामी घरहरु निर्माण गर्न लागिरहेका छौं र अर्को कुरा हाम्रो क्षमताले नभ्याउने भएकोले हामी दुई जनाले घर बेचेर यो प्रोजेक्ट पूरा गर्ने घोषणा गरेका छौं ।

भनेपछि धुर्मुस सुन्तलीले घर बेच्दैछन् पहरी बस्तीका लागि होइन त ?

पक्कै पनि, एकीकृत नमुना पहरी बस्ती । सरकारले एकीकृत नमुना बस्ती बसाल्ने भन्ने कुरा चलिरहेको र कार्यन्वयन नभैरहेको बेलामा सरकारलाई सघाउने अभियानका साथ दुईजनाले नेतृत्व गरेर यो अभियान सञ्चालन  गरेका छाैं । यो प्रोजेक्ट पूरा गर्नकै लागि हामीले  घर बेच्न लागेका हौं । हाम्रो घरमा भूकम्पले त्यस्तो क्षति केही पनि भएको छैन । कसैले घर किनिदिए भूकम्प पीडितलाई गरिएको सहयोग हो भन्ने सोच्ने छु मैले ।

एरेडियो अडियो डटकम र उज्यालो अनलाइनको सहकार्यमा

प्रतिक्रिया दिनुहोस

Job Vacancy
Foreign Employment Banner
पछिल्ला समाचारहरु

मेरो पनि भन्नु छ

  • राजनीति गरेँ भन्दैमा स्कुल तथा क्याम्पसमा आगो लगाउन पाइदैन । आफैले ज्ञान लिने ठाउँमा विनास गरेर के गर्न खोजेका हुन् विद्यार्थी संगठनले ।

    ​दिपा डिएच
  • बिबिसी नेपाली सेवाका प्रमुख रबिन्द्र मिश्र राजनितिमा आउने भन्दा खुसी लागेको छ । हाम्रो आशालाई निरासा नबनाइ दिनु होला । केहि गरेर देखाइदिनु होला ।

    ​लेखराज गिरी
  • हामीले सीमापारीबाट केहि सामान ल्यायौं भने झोला खोतलेर हैरान बनाउँछन तर शिवरात्रीमा आउने साधु बाबाले अवैध मानिएको गाजा लिएर आउँदा पनि कसैले केहि भन्दैनन् ? यो कस्तो कानुन ?

    पुर्णचन्द्र लिम्बु
सबै हेर्नुहोस

सोसल मिडिया