MENU

समाज

Ncell Axiata

लाप्राकका भूकम्प प्रभावित भन्छन्–घर बनाउन ढुंगा र काठ चाहियो

किरण लोहनी/उज्यालो । 

गोरखा, चैत १९ – गोरखाको लाप्राकका भूकम्प प्रभावितले घर बनाउन चाहिने काठ र ढुंगा जुटाइदिन सरकारलाई आग्रह गरेका छन् । भौगोलिक बनावटका कारण त्यहाँ ढुंगा र काठपात पाउन समस्या छ । लाप्राकका भूकम्प प्रभावितका लागि गैरआवासीय नेपाली संघ एनआरएनले एकीकृत बस्ती निर्माण गरिरहेको छ । सबै लाप्राक बासिन्दाका लागि घर बनाउने क्रममा एनआरएनले ५ सय ७३ घर बनाउन लागेको हो । तर घर बनाउन चाहिने ढुंगा र काठ भने स्थानीयले आफै जुटाउनु पर्ने एनआरएनको सर्तका कारण समस्या भएको उनीहरुले बताएका हुन् । एकीकृत बस्ती निर्माणको प्रगतिबारे बुझ्न त्यहाँ पुग्नुभएका प्रमुख जिल्ला अधिकारी जितेन्द्र बस्नेत समक्ष उनीहरुले ढुंगा र काठको जोहो गरिदिन आग्रह गरेका हुन् ।

अहिले बस्ती बन्दै गरेको गुप्सीपाखा नजिकैको जंगलमा घर बनाउने काठ नभएको र ढुंगा पनि पर्याप्त नभएको भन्दै उनीहरुले अन्तबाट ढुवानी गर्ने व्यवस्था मिलाउन प्रमुख जिल्ला अधिकारीलाई आग्रह गरे । खासगरी महिला तथा बृद्धबृद्धामात्रै भएको घरका धनीलाई शर्त अनुसार निर्माण सामग्री जुटाउन समस्या रहेको लाप्राक बासिन्दाले बताएका छन् ।

गैरआवासीय नेपाली संघ एनआरएनको स्टमेट अनुसार एउटा घरका लागि १५ दशमलव १ घनमिटर ढुंगा, १ दशमलव २९ घनमिटर गिटी र साढे ४५ क्युविक फिट काठ आवश्यक पर्नेछ । स्थानीय शान्ति समिति गोरखाले चुनावका विषयमा छलफल गर्न राखेको कार्यक्रममा पनि लाप्राक बासिन्दाले पुनर्निर्माणकै कुरा उठाएका हुन् ।

गैरआवासीय नेपाली संघले पुनर्निर्माण प्राधिकरणसँग गरेको सम्झौता अनुसार पूरै घर आफैंले बनाएर हस्तान्तरण गर्नुपर्ने भएपनि स्थानीय बासिन्दालाई अनावश्यक बोझ थपिदिएको जिल्लास्थित सरकारी अधिकारीले बताएका छन् । स्थानीयको माग अनुसार जथाभावी काठ काट्न नदिएको जिल्ला वन अधिकृत जीवनाथ पौडेलले बताउनुभयो ।

सामुदायिक वनको वार्षिक कार्ययोजना अनुसार मात्रै काठ काट्न सकिने उहाँको भनाई छ । स्थानीयले भत्केका घरको पुराना काठपात प्रयोग गर्दा सहज हुने पौडेलको भनाई छ । नपुग काठ एनआरएनलेनै जुटाइदिनु पर्नेमा उहाँको जोड छ । 

 

प्रतिक्रिया दिनुहोस

सम्बन्धित सामग्रीहरु

सबै हेर्नुहोस
Joktantra
पछिल्ला समाचारहरु

सोसल मिडिया