MENU

समाज

Ncell Axiata

४८ स्वास्थ्य संस्थाको भवन बनाउने जिम्मा, २ वर्षमा १० वटा मात्रै बन्यो

किरण लोहनी/उज्यालो । 

गोरखा, चैत २७ – गोरखामा भूकम्पका कारण भत्किएका स्वास्थ्य संस्था पुनर्निर्माणको जिम्मा लिएका गैरसरकारी संस्थाले स्वास्थ्य चौकीको भवन निर्माणमा ढिलाई गरेका छन् । उनीहरु आफैले प्रतिवद्धता गरेको समय भित्र स्वास्थ्य चौकीको भवन निर्माण गर्न नसकेका हुन् । भूकम्पले भत्किएका ५५ स्वास्थ्य संस्था मध्ये ४८ भन्दा बढीको पुननिर्माणको जिम्मा विभिन्न संघसंस्थाले लिएका थिए । गएको वर्षको डिसेम्बरमै निर्माण सक्ने बताएका उनीहरुले एक वर्षसम्म आलटाल गरेपछि जिल्ला जनस्वास्थ्य कार्यालयले तोकिएको समयभित्र निर्माण गर्न पत्राचार गरेको थियो । जसअनुसार गएको डिसेम्बरसम्ममा निर्माण सम्पन्न गर्ने प्रतिवद्धता जनाएका संघसंस्थाहरुले थप ३ महिनाको समय मागेका थिए ।

उनीहरु आफैले गरेको प्रतिवद्धता अनुसार गएको मार्चमा सबै स्वास्थ्य संस्थाको निर्माण भइसक्नु पर्नेमा अधिकाँशको निर्माणनै सुरु हुन सकेको छैन । तोकिएको समयभित्र जम्मा १० वटा स्वास्थ्य संस्थाको मात्रै भवन बनेको जनस्वास्थ्य कार्यालयका हेल्थ असिस्टेन्ट नानीबाबु दानीले बताउनुभयो । 

त्यसमा पनि सम्झौता गरे अनुसारको समयभित्रै जम्मा ५ वटा स्वास्थ्य संस्थाको मात्रै भवन बनेका हुन् । असल छिमेकी नेपाल पोखरा नामक संस्थाले श्रीनाथकोट, आँपपिपल, घैरुङ, भूम्लीचोक र घ्याल्चोकको भवन निर्माण समयमै पूरा गरेको हो ।

सम्झौतापत्रकै समयमा भवन निर्माण पूरा गरेको भन्दै संस्थालाई जिल्ला जनस्वास्थ्य कार्यालयले सम्मान पनि गरेको छ । तर युनिसेफ लगायतका अन्तर्राष्ट्रिय दातृ निकायको भवन निर्माणमा ढिलाई भएको हो । युनिसेफले १२ वटा स्वास्थ्य संस्थाको भवन निर्माणको जिम्मा लिएपनि दर्बुङको मात्रै निर्माण पूरा गरी कार्यालयलाई हस्तान्तरण गरेको हेल्थ असिस्टेन्ट दानीले बताउनुभयो । उसले छोप्राक, आरुपोखरी, वारपाक, लाप्राक, गुम्दा, नामजुङ, माछिखोला, तारानगर, बक्राङ, फुजेल र मझुवा देउराली स्वास्थ्य चौकी भवन निर्माण गर्नुपर्ने छ । यि मध्ये ४ वटा संस्थाको निर्माण सकिन लागे पनि अरु ७ वटाको भने निर्माणनै सुरु हुन सकेको छैन ।

यस्तै आइएमसीले ७ वटा भवनको निर्माण गर्ने गरी सबभन्दा पहिले सम्झौता गरेपनि ताप्लेको मात्रै भवन बनाएको छ । सौरपानी, मुच्चोक, खरिवोट, घ्याच्चोक, स्वाँरा र आरुअर्वाङका स्वास्थ्य संस्थाहरुको भवन निर्माणमा ढिलाई भएको जनस्वास्थ्य कार्यालयले जनाएको छ । वल्र्ड भिजनले जिम्मा लिएको केरावारी स्वास्थ्य चौकीको भवन निर्माण भने पूरा भएको र अब हस्तान्तरण गर्न बाँकी रहेको हेल्थ असिस्टेन्ट दानीले जानकारी दिनुभयो ।

गुड नेवर्स इन्टरनेशनलले फिनाम, थूमी, मान्बु र लापूको भवन निर्माण अन्तिम चरणमा पु¥याएको छ भने फेज नेपालले जिम्मा लिएको काशिगाउँ र केरौंजाको भवन निर्माण सकिएको उहाँले बताउनुभयो । तर नेदरल्याण्ड लेप्रोसी रिलिफ नामक संस्थाले भने स्वास्थ्य मन्त्रालयले तोकेको मापदण्ड विपरीत भवन बनाएको उहाँको भनाई छ ।

‘शौचालय, भवनको गाह्रोको गुणस्तर लगायतका कुरा पूरा भएका छैनन्’ दानीले भन्नुभयो । भूकम्पले क्षति पुगेका मध्ये स्वाँरा स्वास्थ्य चौकी अझै पनि त्रिपालमा रहेको छ । भवन बन्न बाँकी अरु स्वास्थ्य चौकीले पनि अस्थायी टहरा, भाडाका साँघुरा संरचनाबाट सेवा दिनुपर्दा कठिनाई भएको स्वास्थ्यकर्मीहरुलेनै बताएका छन् । 

 

प्रतिक्रिया दिनुहोस

सम्बन्धित सामग्रीहरु

सबै हेर्नुहोस
Joktantra
पछिल्ला समाचारहरु

सोसल मिडिया