MENU

राजनीति

Ncell Axiata
USAID

२६ वर्षका बिक्रम गाउँपालिका प्रमुखका उम्मेद्वार

नेपालगञ्ज, वैशाख ६ – बाँकेको साविक कालाफाँटा, नरैनापुर, मटैया, गंगापुर, लक्ष्मणपुर र कटकुइया गाविस मिलाएर बनेको नरैनापुर गाउँपालिकाको प्रमुखमा २६ वर्षका बिक्रम यादव प्रतिष्पर्धामा उत्रनुभएको छ ।

२०४७ सालमा जन्मिएका यादवले तीन वर्षअघि भएको संविधानसभा निर्वाचनमा पहिलोपटक मतदान गरेको बताउनुहुन्छ ।  

नेकपा एमाले नरैनापुर गाउँपालिका संगठन कमिटीले २६ वर्षका युवा बिक्रमलाई गाउँपालिका प्रमुखका लागि सर्वसम्मत सिफारिस गरेपछि यादव यतिबेला राप्तीपारिका गाविसमा निर्वाचन अभियानमा खटिइसक्नुभएको छ । नेकपा एमालेका पालिका कमिटीले जिल्लामा सिफारिस गर्दा कम्तिमा तीन जनासम्म दावेदारको नाम सिफारिस गरेको अवस्थामा यादव भने प्रमुखका सर्वसम्मत उम्मेद्वार बन्नुभएको हो । 

प्रमुख पार्टीबाट अहिलेसम्म चर्चामा रहेका प्रमुखका दावेदार मध्ये यादव सबैभन्दा कम उमेरका हुनुहुन्छ । ‘राप्तीपारीको बघौडा क्षेत्र बाँकेको मात्रै नभएर नेपालकै विकट मध्येको क्षेत्र हो’ निर्वाचन अभियानमा होमिएका यादवले भन्नुभयो, ‘मेरो उम्मेद्वारी युवाको नेतृत्वमा विकास गर्न सकिन्छ भन्नका लागि हो ।’ बघौडा क्षेत्रमा विद्युत पुग्न नसकेको, सडक जीर्ण भएको, उच्च शिक्षा स्वास्थ्यको पूर्वाधार राम्रो नभएको र जनचेतनाको अभाव भएको भन्दै यादवले आफू बघौडालाई पूर्वाधार सम्पन्न, सुन्दर क्षेत्र बनाउन लागेको बताउनुभयो । नरैनापुर क्षेत्रको विकास युवाको नेतृत्वमा मात्रै सम्भव भएको नारा दिँदै यादव मतदातामाझ पुगिरहनुभएको छ । 

बाँकेको क्षेत्र नम्बर २ मा पर्ने ६ गाविस नेकपा एमालेको प्रभाव क्षेत्र मानिन्छ । संविधानसभा निर्वाचनमा नेकपा एमालेका दिनेशचन्द्र यादव प्रतिष्पर्धी उम्मेद्वार भन्दा झण्डै पाँच हजार मतको अन्तरले विजयी हुनुभएको हो । 

नरैनापुर गाउँपालिकाका प्रमुखका उम्मेद्वार विक्रम यादव एमाले बैकल्पिक केन्द्रीय सदस्य समेत रहेका निर्वाचित सांसद दिनेशचन्द्र यादवका छोरा हुनुहुन्छ । बिक्रम यादव नेकपा एमाले सम्वद्ध युवा सङ्घ बाँकेका जिल्ला सदस्यको रुपमा कार्यरत रहनुभएको छ । 

क्षेत्रीय निर्वाचन कार्यालयका अनुसार नरैनापुर गाउँपालिकामा १५ हजार ४३ मतदाता रहेका छन् । नरैनापुरमा मधेसी जन अधिकार फोरम र नेपाली कांग्रेसको पनि राम्रो प्रभाव रहेको छ । 

प्रतिक्रिया दिनुहोस

सम्बन्धित सामग्रीहरु

सबै हेर्नुहोस
Job Vacancy
पछिल्ला समाचारहरु

सोसल मिडिया