MENU

राजनीति

Ncell Axiata
USAID

मधेसवादी दल पनि चुनावमा सहभागी हुने संकेत, पढ्नुहोस् शुक्रबार दिनभरका खबर

काठमाडौं वैशाख ८ - आन्दोलनरत मधेसवादी दल चुनावमा सहभागी हुने सम्भावना बढेको छ । शुक्रबार सरकारसँग भएको छलफल सकारात्मक भएपछि मधेसवादी दल चुनावमा सहभागी हुने संकेत देखिएको हो । शनिबार फेरि बस्ने बैठकपछि यसको टुंगो लाग्नेछ । शुक्रबार दिनभरका मुख्य खबर पढ्नुहोस् ।

सरकार र मधेसवादी दलबिचको वार्ता सकारात्मक

आन्दोलनरत मधेसवादी दल चुनावमा सहभागी हुने सम्भावना बढेको छ । सरकार र मधेसवादी दलबिच शुक्रबार भएको वार्तामा संविधान संशोधन विधेयक परिमार्जन गर्ने सहमति भएको छ । यसको लागि कार्यदल समेत गठन भएको छ । कार्यदलले गृहकार्य गरेपछि शनिबार फेरि बैठक बस्ने र सहमतिलाई अन्तिम रुप दिने नेताहरुले बताएका छन् ।

संशोधनका केही बुँदामा मोर्चासँग सामान्य सहमति भएको र शनिबार दिउँसो २ बजे फेरि बैठक बसेर सहमति गरिने कांग्रेस नेता रामचन्द्र पौडेलले जानकारी दिनुभयो । मोर्चाकै माग अनुसार संधिवानको धारा २ सय ७४ लाई संशोधन गरिने स्थानीय तहको संख्या बढाउने विषयमा सकरात्मक छलफल भएको पौडेलले बताउनुभयो । बैठकपछि पत्रकारसँग कुरा गर्दै मधेसवादी दलका नेता लक्ष्मणलाल कर्णले सरकारले परिमार्जन सहित संशोधन गर्ने प्रतिबद्धता जनाए आफूहरु चुनावमा सहभागी हुने बताउनुभयो । 

चुनाव बिथोल्न खोज्नेमाथि कार्वाही हुने गृहमन्त्रीको भनाई

उपप्रधान तथा गृहमन्त्री बिमलेन्द्र नीधिले चुनाव विथोल्न खोज्ने जो कोहीलाई पनि कारवाही गर्ने बताउनुभएको छ । काभ्रेमा ११ जिल्लाको सुरक्षा बैठकलाई सम्बोधन गर्दै निधिले सरकारले मधेशी मोर्चालाई चुनावमा ल्याउन हदैसम्मको लचकता अपनाईरहेको बताउनुभयो । 

चुनावलाई स्वच्छ र स्वतन्त्र बनाउन प्रमुख निर्वाचन आयुक्तको आग्रह

प्रमुख निर्वाचन आयुक्त अयोधीप्रसाद यादवले आगामी स्थानीय तहको चुनावलाई स्वच्छ, स्वतन्त्र र भयरहित बनाउन संचारमाध्यमलाई आग्रह गर्नुभएको छ । चुनावको व्यवस्थापनका लागि निर्वाचन आयोग निकै अघि बढिसकेको उल्लेख गर्दै प्रमुख आयुक्त यादवले सत्यतथ्यमा आधारित सन्तुलित र वस्तुगत समाचार सम्प्रेषण गर्न आग्रह गर्नुभयो ।

त्रिभुवन विश्वविद्यालय केन्द्रीय पत्रकारिता विभाग र जापानी अन्तर्राष्ट्रिय सहयोग नियोग जाइकाले आज गरेको कार्यक्रममा यादवले सञ्चारमध्यमले पस्किएका सामग्रीबाट आचारसंहिता उल्लङ्घन भई हालसम्म आयोगले कुनै हैरानी व्यहोर्नु नपरेको बताउनुभयो । 

भोट दिनको लागि गाउँ फर्कन सुरु

स्थानीय तहको चुनावमा मतदानका लागि अहिले सुदूरपश्चिमको पहाडी जिल्लाका वासिन्दाहरु घर फर्किन थालेका छन् । कामका लागि जिल्ला बाहिर तथा छिमेकी देश भारत गएकाहरु स्थानीय तहको चुनावमा मत हाल्न घर फर्किन थालेका हुन् । 

राष्ट्रपति भारत भ्रमण पूरा गरी स्वदेश फिर्ता

भारतको पाँच दिने राजकीय भ्रमण पूरा गरी राष्ट्रपति विद्यादेवी भण्डारी स्वदेश फर्किनुभएको छ । उहाँ शुक्रबार साँझ स्वदेश फर्किनुभएको हो । भारतमा रहँदा राष्ट्रपति भण्डारीले त्यहाँका राष्ट्रपति, प्रधानमन्त्री लगायतसँग उच्चस्तरीय भेटवार्ता गर्नुभएको थियो । भेटमा भारतीय पक्षले नेपालको संविधान कार्यान्वयन र स्थानीय तहको चुनावको विषयमा चासो देखाएका थियो । 

सरकारको ९ महिने उपलव्धी सार्वजनिक

सरकारले स्थानीय तहको गठन र काठमाडौंमा लोडसेडिङ अन्त्य हुनु आफनो मुख्य उपलब्धी भएको दावी गरेको छ । पुष्पकमल दाहाल प्रचण्डको नेतृत्वमा गठन भएको सरकारले ९ महिनामा गरेका काम सार्वजनिक गर्दै वैशाख ३१ गते चुनाव घोषणा हुनुलाई पनि मुख्य उपलब्धी भनेको छ । प्रचण्डको नेतृत्वमा साउन  २० गते गठन भएको सरकारले यही बेला उच्च बृद्धिदर कायम गर्न सकेको र १२ बर्ष यता कै सबैभन्दा कम मुल्य बृद्धि कायम गरेको दावी पनि गरेको छ । 

आफ्नो जग्गा नभएका भूकम्प प्रभावितले घडेरी किन्न दुई लाख पाउने

राष्ट्रिय पुनर्निर्माण प्राधिकरणले अनुदान पाउनेको सूचिमा परेका तर आफ्नो जग्गा नभई सार्वजनिक, वन क्षेत्र र सरकारी जग्गामा बसेका भूकम्प प्रभावितलाई घडेरी किन्न दुई लाख रुपैयाँ दिन प्रस्ताव गरेको छ । प्राधिकरणका प्रमुख कार्यकारी अधिकृत डा. गोविन्दराज पोखरेलको संयोजकत्वमा बसेको कार्यकारी समितिको वैठकले लाभग्राही सूचिमा परेका तर आफ्नै जग्गा नभएका प्रभावितलाई, घडेरी किन्न दुई लाख रुपैयाँ दिने गरि कार्यविधि संशोधन गरेको प्राधिकरणका सहसचिव जनार्दन गुरागाईले जानकारी दिनुभयो । 

थुनिएको अरुण नदी बग्न थाल्यो

संखुवासभाको भोटखोलामा आएको बाढीले थुनिएको अरुण नदी अहिले बग्न थालेको छ । पानी बग्न थालेपछि खतरा केहि कम भएको स्थानीय प्रशासनले जनाएको छ । भोटखोला गाउँपालिकाको स्याक्सिला गोलामा अरुण नदी थुनिएर लामो ताल बनेको थियो । नदी थुनिँदा बरुण बजार र कपासे गाउँका केही घरमा क्षति पुगेको र ८० घर जोखिममा परेको प्रहरीले जनाएको छ । जोखिममा रहेका बासिन्दालाई सुरक्षित ठाउँमा सारिएको प्रहरी नायव उपरीक्षक गौतमकुमार केसीले बताउनुभयो । 

१५ वर्षीया बालिकाको विवाह मण्डपबाटै उद्दार

धादिङको बेनिघाटरोराङ गाउँपालिका हुग्दीबाट १५ वर्षीया बालिकाको विवाह मण्डपबाट उद्धार गरिएको छ । पौरखी सहकारीमा आवद्ध महिलाहरुले जोगिमारा प्रहरीको सहयोगमा बालिकाको विवाह रोकेको हो । उद्धार गरिएकी बालिकालाई जिल्ला बालकल्याण समितिले बालगृहमा राखेको छ । 

किसानको भिडमा ट्रक पस्दा २० जनाको मृत्यु

भारतको आन्ध्र प्रदेशमा विरोध प्रदर्शन गरिरहेका किसानको भिडमा ट्रक पस्दा २० जनाको ज्यान गएको छ । आन्ध्र प्रदेश प्रहरीका अनुसार पुलिस थाना अगाडि प्रदर्शन गरिरहेका किसानको भिडमा एउटा ट्रक तिब्र गतिमा पसेको थियो । ट्रक बिजुलीको खम्बामा ठोक्किएपछि खम्बा ढलेर करेन्टसहितको ताराले प्रदर्शनकारीलाई थिचेको हो । घटनामा अरु १५ जना घाइते भएका छन् । 

एएफसी च्याम्पियनसिपको छनौट खेलमा नेपाल कठिन समूहमा

आउँदो वर्ष हुने १६ वर्ष मुनिको एएफसी च्याम्पियनसिपको छनौट खेलमा नेपाल कठिन समूहमा परेको छ । नेपाल रहेको समूह डीमा डिफेन्डिङ च्याम्पियन इराकसहित भारत र प्यालेष्टाइन छन् । नेपाल रहेको समूह डीको छनौट खेल नेपालमै हुने एशियाली फुटबल महासंघ एएफसीले जनाएको छ । च्याम्पियनसिपको छनौटमा ४५ देशको सहभागिता छ । ४५ देशका १६ वर्षमुनिको टोलीलाई १० समूहमा विभाजन गरिएको छ । १० वटा समूहका विजेता र दोस्रो स्थानमा रहेका ५ टोली फाइनलमा पुग्नेछन् । छनौट खेल आगामी सेप्टेम्बर १६ देखि २४ सम्म हुनेछ । 

प्रतिक्रिया दिनुहोस

सम्बन्धित सामग्रीहरु

  • दुई चरणमा चुनाव गर्ने निर्णयले झनै अन्योल, पढ्नुहोस् आइतबार दिनभरका खबर

    काठमाडौं, वैशाख १० - सरकारले मधेसवादी दलसँग भएको सहमति अनुसार दुई चरणमा चुनाव गर्ने निर्णय गरेको छ । चार प्रदेशको चुनाव जेठ ३१ गते गर्ने सरकारले निर्णय गरेको भएपनि यसमा एमालेले बिरोध गरेको छ । एमालेले बजेटपछि चुनाव गर्न आचारसंहिताले रोक्ने भन्दै यसमा सहमत हुन नसक्ने बताएको छ । मुस्लिम समुदायले पनि जेठ ३१ को बेला आफूहरुको महान पर्व रमजान पर्ने भएकाले चुनाव नगर्न आग्रह गरेका छन् । पढ्नुहोस् आइतबार दिनभरका मुख्य खबर ।

  • ​मनसुन सुरु हुने हुँदा जेठ ३१ मा चुनाव गर्न समस्या

    काठमाडौं, वैशाख १० – सरकारले जेठ ३१ गते दोश्रो चरणको चुनाव गराउने निर्णय गरेपनि त्यतिबेला मनसुन सुरु हुने भएकाले चुनाव गर्न समस्या हुने भएकाे छ ।

  • इलाममा कांग्रेस नेतामाथि आक्रमण

    इलाम, बैशाख १० – नेपाली कांगेस इलाम क्षेत्र नम्बर ३ का क्षेत्रीय सभापति नुतनदेव दुलालमाथि आइतबार इलाम चोक बजारमा आक्रमण भएको इलाम कांग्रेसले जनाएको छ ।

  • संघीय गठबन्धनद्वारा आन्दोलन स्थगित

    काठमाडौं, वैशाख १० – सरकारको निर्णयलाई सकारात्मक जनाउँदै मधेसी मोर्चासहितको संघीय गठबन्धनले आफ्ना आन्दोलनका कार्यक्रम स्थगित गरेको छ ।

  • रमजान महिनामा चुनाव नगर्न मुस्लिम समुदायको आग्रह

    गोविन्द शर्मा/उज्यालो । बाँके, बैशाख १० – दुई चरणमा स्थानीय तहको चुनाव गर्ने क्रममा जेठ ३१ गते दोश्रो चरणको मतदान गर्ने सरकारको निर्णयमा पुनर्विचार गर्न मुस्लिम समुदायले आग्रह गरेका छन् ।

सबै हेर्नुहोस
Foreign Employment
Job Vacancy
पछिल्ला समाचारहरु

मेरो पनि भन्नु छ

  • भारतले पाकिस्तान र बंगलादेशको सिमामा पर्खाल लगायो भने नेपालले पाउने भुपरिवेष्ठित देशको अन्तर्राष्ट्रिय अधिकार हनन हुन सक्छ । भारतको कदमले नेपालले आयात गर्ने सबै कुरामा भारतकै भर पर्नुपर्ने हुन सक्छ । त्यसैले सरकारले यो विषयमा अहिल्यैदेखि चनाखो बस्नु जरुरी छ ।

    ​रोशन राइ
  • राजनीति गरेँ भन्दैमा स्कुल तथा क्याम्पसमा आगो लगाउन पाइदैन । आफैले ज्ञान लिने ठाउँमा विनास गरेर के गर्न खोजेका हुन् विद्यार्थी संगठनले ।

    ​दिपा डिएच
  • बिबिसी नेपाली सेवाका प्रमुख रबिन्द्र मिश्र राजनितिमा आउने भन्दा खुसी लागेको छ । हाम्रो आशालाई निरासा नबनाइ दिनु होला । केहि गरेर देखाइदिनु होला ।

    ​लेखराज गिरी
सबै हेर्नुहोस

सोसल मिडिया