MENU

साहित्य/ कला

Ncell Axiata
USAID

व्यंग्य कविता : आजको अन्दोलन

                                 आजको अन्दोलन

                                                                                       

                                                                                                - डा. बमबहादुर जिताली

गोली ताकेर हानिन्छ , मारिन्छ किन गौतम ?
बुद्धको भूमि हो मेरो शान्तिको मन्त्र–उद्गम ।
जनताको सुरक्षा खै ? सुरक्षा देशको कता 
भुँडी सुधारमा नेता लाग्ने भए जतातता ।

सरकार नबोलेको डरले कि वा किन ?
दरकार नठानेको मन्त्रीले किन होृ किन !
पुर्खाको घरबारीमा रजाइँ स्यालको भयो
नेपाली पसिना आज विदेशी हातमा गयो ।

नेताका भरमा कत्ति लिएन देशले गति 
नेपाली जुर्मुराए पो ! हुन्छ देश समुन्नति ।
विनामियो भयो दाइँ बोका भए बरालिने
गोरु बाँधेर गोठैमा साँढे भए छिरालिने ।

साँढेको झगडा पर्दा तराई थर्कमान छ 
सिंगौरी खेलले गर्दा घाइते वर्तमान छ ।
विनाकर्तव्य बाँचेको अधिकार कहाँ छ र 
कर्तव्यको घुरीमाथि एकता हुन्छ सुन्दर !

राजनीति भयो आज आफन्त प्रतिशोधमा
भाँडभैलो गराएर गए नेता विरोधमा ।
उन्नति देशको हुन्न शान्तिको गतिरोधमा
हुँदैन राष्ट्रको रक्षा विनादायित्व–बोधमा ।

मर्दैन चाहना मेरो सचेतना जगाउने
मर्दैन कल्पना मेरो शान्तिको गीत गाउने ।
पौरखी कर्मले मेरो माटालाई सिंगार्छु म
देशको कुभलो गर्ने पापीलाई पछार्छ म ।

म लेख्छु वीरको गाथा , कविता वीर भावका
म देख्छु धीरका आँखा रातो–दिन अभावका ।
अभाव भावको बोट जरैबाट निखार्छु म
बिपन्न धार उध्याई सम्पन्नता तिखार्छु म ।

 

प्रतिक्रिया दिनुहोस

सम्बन्धित सामग्रीहरु

सबै हेर्नुहोस
Job Vacancy
पछिल्ला समाचारहरु

सोसल मिडिया