दोलखा, जेठ ५ – वैशाख ३१  गते निर्वाचन सम्पन्न भएको दोलखाको दुई नगरपालिका र ६ गाउँपालिकाको मतगणना सकिएको छ । 

प्राप्त मतपरिणाम अनुसार २ नगरपालिका र ४ गाउँपालिकाको प्रमुख/उपप्रमुख पदमा नेकपा एमालेका उम्मेद्वार विजयी भएका छन् भने दुई गाउँपालिकाको प्रमुख/उपप्रमुख पदमा कांग्रेस माओवादी केन्द्रको गठबन्धन विजयी भएको छ । सदरमुकामसमेत पर्ने भिमेश्वर नगरपालिकाको  मेयरमा नेकपा एमालेका भरत केसी विजयी हुनुभएको छ । उहाँले ६ हजार ८ सय ५३ मत प्राप्त गर्नुभएको छ । 

उहाँको प्रतिद्वन्द्वी काग्रेसका इश्वरनारायण मानन्धरको ५ हजार ८ सय १५ मत आएको छ । यसैगरी उपमेयरमा एमालेकी कमला बस्नेत विजयी हुनुभएको छ । उहाँको ६ हजार १७ मत आएको छ । उहाँको प्रतिद्वन्द्वी माओवादी केन्द्रकी कमला कार्कीको २ हजार ८ सय ७९ मत आएको छ । निर्वाचित मेयर, उपमेयरले आजै पदभार ग्रहण गर्नुभएको छ । 

यसैगरी जिरी नगरपालिकाको मेयरमा  नेकपा एमालेका टंक जिरेल, उपमेयरमा कृष्णमाया बुढाथोकी विजयी हुनुभएको छ । गौरीशंकर गाउँपालिकाको अध्यक्षमा नेकपा एमालेका स्वयम् बहादुर खड्का, उपाध्यक्षमा उर्मिला थामी, शैलुङ गाउँपालिकाको अध्यक्षमा एमालेका भरत दुलाल र उपाध्यक्षमा लालमाया योञ्जन विजयी हुनुभएको छ । यसैगरी तामाकोशी गाउँपालिकाको अध्यक्षमा नेकपा एमाले दोलखाका अध्यक्ष समेत रहनुभएका इश्वरचन्द्र पोखरलेल विजयी हुनुभएको छ भने उपाध्यक्षमा उर्मिला खड्का केसी विजयी हुनुभएको छ । 

दोलखाको वैतेश्वर गाउँपालिकाको अध्यक्षमा नेपाली काग्रेसका छवि लामा र उपाध्यक्षमा माओवादी केन्द्रका रविचन्द्र आचार्य विजयी हुनुभएको छ । यसैगरी विगु गाउँपालिकाको अध्यक्षमा नेपाली काग्रेसका युधिष्ठिर खड्का र उपाध्यक्षमा माओावादी केन्द्रका सञ्जिव वली विजयी हुनुभएको छ ।

यसैबिच दोलखाको मेलुङ गाउँपालीकाको सत्यश्वर माध्यमीक विद्यालय मतदान केन्द्रमा स्थगीत गरीएको मतदान ७ गते हुँदै छ । सात गते मतदान गरिए पछि मेलुङ गाउँपालिकाको मतगणना सुरु गरिने छ ।