बाँके, साउन २ –  बाढी पीडितका लागि छुट्टाइएको झण्डै ३० करोड रुपैयाँ खर्च हुन नसकी फिर्ता भएको छ ।  तीन वर्षअघि बाँकेमा आएको बाढीका कारण पूर्णरुपमा घर नोक्सान भएका परिवारलाई घर निर्माणका लागि सरकारले गत आर्थिक वर्षमा रकम पठाएको भएपनि बाढी पीडितहरु रकम लिन नआएपछि रकम फ्रिज भएको हो । 

बाँके र बर्दियाका बाढी पीडितलाई घर निर्माणका लागि आर्थिक सहयोग उपलब्ध गराउन शहरी विकास तथा भवन निर्माण डिभिजन कार्यालय नेपालगन्जमा गत आर्थिक वर्षमा ४९ करोड ५० लाख रुपैयाँ प्राप्त भएको थियो ।

तर दुबै जिल्लामा गरी झण्डै २० करोड रुपैयाँ मात्रै खर्च भएको शहरी विकास तथा भवन निर्माण डिभिजन कार्यालय नेपालगन्जकाका इञ्जिनियर होमनाथ भुसालले जानकारी दिनुभयो । दुबै जिल्लामा कन्टेन्जेन्सी बाहेक १९ करोड ३० लाख रुपैयाँ बाढी पीडितले प्राप्त गरेका छन् ।

सुरुमा सम्झौता भएपछि ५० हजार रुपैयाँ प्रदान गरिएको छ । त्यसबाट  घरको जग बनाएको प्राविधिक मुल्यांकनपछि एकलाख ५० हजार रुपैयाँ प्रदान गरिने छ । प्राविधिक मुल्यांकनपछि त्यो रकमबाट छाना छाउने तहसम्म निर्माण गर्नु पर्नेछ ।

तीन किस्तामा गरी घर निर्माणका लागि एक परिवारलाई अनुदानमा तीन लाख रुपैयाँ प्रदान गरिने छ । घर निर्माणका लागि जग्गा नहुने परिवारलाई सम्झौताकै समयमा जग्गा खरिदका लागि थप ५० हजार रुपैयाँ समेत उपलब्ध गराएने शहरी विकास तथा भवन निर्माण डिभिजन कार्यालय नेपालगन्जका इञ्जिनियर भुसालले जानकारी दिनुभयो । जग्गा खरिद गरेकोे लालपूर्जाका आधारमा पहिलो किस्ता पाउने भुसालले बताउनुभयो ।