काठमाडौं, साउन २ – भ्रष्टाचारको आरोपमा पक्राउ परेका आन्तरिक राजश्व विभागका महानिर्देशक चुडामणि शर्मालाई गैरकानुनी रुपमा हिरासतमा राखेको भन्दै सर्वोच्च अदालतमा परेको मुद्दा हेर्दा हेर्दैमा रोकिएको छ ।

न्यायाधीशहरु चोलेन्द्र शमशेर राणा र प्रकाशमान सिंह राउतको इजलासमा परेको रिटको सुनुवाई सोमबार पनि नसकिएपछि यसलाई हेर्दा हेर्दैमा राखिएको हो । 

यो मुद्दामा मंगलबार पनि सुनुवाई हुनेछ । यसअघि गत शुक्रबार र आइतबार पनि यो मुद्दा हेर्दा हेर्दैमा राखिएको थियो । आफ्ना पतिलाई गैरकानुनी रुपमा हिरासतमा राखेको भन्दै शर्माकी श्रीमती कल्पना उप्रेतीले सर्वोच्चमा रिट दायर गर्नुभएको थियो । 

कर फछ्र्योट आयोगमा रहँदा शर्मासहित अध्यक्ष लुम्बध्वज महत र उमेश ढकालले झण्डै ११ अर्ब २ करोड रुपैयाँ राज्यलाई घाटा पुर्‍याएको दावी सहित अख्तियारले तीन जना विरुद्ध विषेश अदालतमा मुद्दा दायर गरेको हो । शर्मा पक्राउ परे पनि महत र ढकाल भने फरार छन् ।