MENU

विचार/अनुभूति

Ncell Axiata
NIC Asia

गाई छोडेका पशुपतिलाई कति मिल्ला पापा, थाहा पत्तो नपाउनेको थर मात्रै थापा !

मिलन तिमिल्सिना - 

नामै पशुपति । पशुपतिलाई मन पर्ने आफ्नै साँढे । साँढेलाई सुहाउने हलो । पशुपतिको भलो गर्ने पनि त्यही हलो । हलो मात्रै रोजेर हेलो हेलो भन्दै अघि लाग्नुपर्छ भनेर बेलैमा थाहा पाएको भए नामै कमल भएका मान्छेसित पशुपति यति बिघ्न कठोर किन हुनुपर्थ्यो । 

तर थर मात्रै थापा, थाहा पाएर पनि केही चाल नपाएका कमलले पशुपतिलाई खुशी पार्न सकेनन् । पशुपति बेखुशी भए भने कति अनिष्ठ हुन्छ भन्ने त थापाले बल्ल थाहा पाए होलान् । 

त्यसमाथि साउनका पशुपति । जताततै पहेंलपुर र हरियालीले उनी त्यसै त्यसै मख्ख । व्रत बस्ने, बढ्ता भएर हिँड्ने, बोलबम भन्दै कुद्ने, बमजस्तै पड्किएर बोल्ने, साथमै भएका र लाइनमा उभिएका जति सबै आफ्नै हो जस्तो लाग्ने बेला । 

साउनमा देखिएको शानले त्यसैत्यसै हौसिएका पशुपतिलाई गाई मन परेन । कहिले बागमती वारि, कहिले बागमती पारि डुलि हिँड्ने गाईको के भर । साँढेले त आजसम्म साथ छाडेको छैन नि । जुनसुकै बेला पनि ढोका बाहिर ढक्रक्क बसेको बस्यै छ । काँधमा हलो भिराइदिने हो भने अहिले नै खेत जोत्न हिँड्ला जस्तो साँढे । 

साँढेलाई मिल्ने हलो, हलो फेरि हात पारे पशुपतिलाई भलो नै भलो । अहिल्यै भलो हुने भर नदेखे पनि भोलिको भलो सोचेर पशुपतिले गाई छाडे । पहिलेदेखि  नै गाईगोठमा बस्दै आएकालाई समेत लगे । पहिले दूध पिउन पाउँदासम्म गाईको पुच्छर समाएर बसेकाहरु समेत पशुपतिको पाउमा लम्पसार परेपछि विचरा थापा थाप्लो समाएर थुइक्क गर्दैछन् ।

हुन त यस्तो हुन्छ भन्ने पहिल्यै थाहा नपाएका थापाले गाईलाई सताउनु सताएकै हुन् । वैशाख, जेठको रापमा गाईलाई रुखमा बाँधेको भए बरु शीतल हुन्थ्यो । रुखकै फेदमा बसेपछि गाईले अलिअलि घाँस खान पाउँथ्यो । तर गाईलाई रुखको वरिपरि नै पर्न दिएनन् ।  

हुन त यसपाली रुख पनि ज्याद्रो भएकै हो । गाईले बढी घाँस माग्यो भनेर हो या हाँगा काटे छिटो पलाउँछ भन्ने लोभले, रुखले आफैंलाई चोट दिने हँसिया र हथौडा रोज्यो । रुखमा हँसिया र हथौडा ठोक्किँदा कस्तो हुँदोरैछ भन्ने कुरा चोट पाउने ससाना मझौला रुखलाई राम्रोसँग थाहा छ, बुढो रुखलाई चाहिँ पत्तो छैन । जे होस्, टाउकोमाथि हँसिया हथौडा बोकेर बसेको रुखले गाईलाई बाल दिएन, रुखभन्दा अन्तैतिर दाना खान पल्केको गाईले पनि वास्ता गरेन । 

अर्थात गाई मालिकले रुखलाई टेरेनन्, रुखहरुले पनि गाईलाई हेरेनन् । रुख नै बटारिएपछि गाईवालाले गाईलाई वैशाखको टन्टलापुर घाममा सेकाए । त्यसै त घाम, त्यसमाथि यसपाली चम्कनु चम्केको । दानपछिको फलिफाप कस्तो हुन्छ भन्ने बेलैमा थाहा नपाएका थापाले गाईदान गरेकाले पनि यसपाली घामको भाग्य चम्केको हो । गाईदानले घामको राप बढायो, तर त्यही रापले गाईलाई सेकायो । 

खोलामा बाढी आउनु पहिले वैशाख जेठमै गोठका गाई बगे । जोगाउन सकिने गाई पनि बाँकी रहेनन् । अझै वर्षायाम सकिएपछि तराईमा हुने चुनावले कति गाई बगाउने हुन् । थर थापा भएका मान्छेले गाई बग्न लागेको थाहा पाएनन् । गाई नै बग्न थालेपछि के हेरेर बस्ने । त्यसैले पशुपति आफैंलाई मन पर्ने साँढे, साँढेलाई मन पर्ने हलो, हलो समाते भलो हुन्छ भन्ने बुझेर लावालस्कर बोकेर त्यतै कुदे । 

साउनको बेला भुुईंमा खुट्टा नभएर बुरुक्क उफ्रँदै बाटो लागेका पशुपति त्यसै त्यसै हौसिएका छन् । पहिलेदेखि गाईगोठको रेखदेख गर्दै आएका मान्छे समेत पशुपतिको पाउ परेपछि थापा जिल्लिएका छन् । 

भोलिको भलो देखेर हलोतिरै फर्किएका पशुपति, अनि यिनै पतिले कुनदिन अति गर्छन् भन्ने थाहा नपाएर गाईको पुच्छर समाएर बसेका थापा । कसको कहाँ र कताको ढल्काईले कसलाई कहाँसम्म पुर्याउँछ भन्ने कुरा श्री पशुपतिनाथलाई समेत थाहा छैन होला । पशुपतिनाथले हामी सबैको कल्याण गरुन् भनेर भन्नेलाई त परको कुरा ।

 

प्रतिक्रिया दिनुहोस

सम्बन्धित सामग्रीहरु

  • कांग्रेस हार्‍यो, तर देउवा र देशले हारेनन्

    यो सफलताले यसअघि देउवामाथि लाग्दै आएको ‘असक्षम’ र ‘भर पर्न नसकिने’ नेताको उपनाम च्यातिएको छ । नेतृत्वकर्ताका हैसितमा सम्बन्धित पार्टीलाई चुनावमा सफलता दिलाउन सक्नु नेतृत्वकर्ताको पहिलो कर्तव्य हो । तर, योपटकको चुनावमा देउवा त्यो दायित्व पूरा गर्न चुके पनि देशप्रतिको दायित्व पूरा गर्नुभएको छ ।

  • किन हार्यो कांग्रेसले ?

    तर यसपटकको चुनावको जुन नतिजा आएको छ त्यो नेपाली कांग्रेसको दुर्भाग्य हो । नेतृत्व तहमा बस्नेले अरुको कुरा सुन्नुपर्छ भनेर कानमा कपास कोचेपछि हामी जस्ता प्रजातन्त्रको शुभेच्छक सामान्य व्यक्ति (जसलाई भुसुनाको रुपमा हेर्ने चलन छ ) राम राम भन्नु बाहेक अरु के पो गर्न सकिदो रहेछ र ?

  • चुनावका लागि दिइने चन्दाले देशलाई पार्ने दीर्घकालीन असर

    अहिले राजनीतिक दलहरुले चुनावलाई लक्षित गरी चन्दा उठाइरहेका छन् र त्यस्तो चन्दाको स्रोत उद्योगी व्यवसायीलाई बनाइरहेका छन् । चन्दा दिनेले पनि आफ्नो घर घरनाबाट दिने त होइन, आफ्नो बाउ बाजेको सम्पत्ति बेचेर त कसैले पनि दिँदैनन् ।

  • नेमकिपादेखि विवेकशीलसम्म : मतमा परिणत नहुने रहेछ प्रशंसा

    चुनाव अगाडि दुईवटा टिप्पणीहरु नोट गरेको थिएँ । एक, ‘विवेकशील साझा पार्टीका मतदाता विदेशमा छन् ।’ अर्को ‘बिजुक्छेलाई प्रशंसा गर्नेहरुले मत पनि उनको पार्टीलाई दिए हुन्थ्यो ।’

  • तपाई मधुमेहको बिरामी हुनुहुन्छ ? भान्छामा छुट्टै खाना बनाउनु पर्दैन

    रगतमा ग्लुकोजको मात्रा धेरै देखिएपछिको अवस्था मधुमेह हो । शरीरमा इन्सुलिन उत्पादनमा घटबढ भयो अथवा उत्पादन नै भएन भने मधुमेह हुन्छ । यो दीर्घरोग हो ।

सबै हेर्नुहोस
Skill Training
पछिल्ला समाचारहरु

सोसल मिडिया