MENU

अर्थ

Ncell Axiata

बिमस्टेक सदस्य राष्ट्रबिच खुला व्यापार सम्झौता गर्ने सहमति

काठमाडौं, साउन २८ – बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिमस्टेक) सदस्य राष्ट्रबिच खुला व्यापार प्रवर्द्धन गर्न उद्देश्यले तयार गरिएको बिमस्टेक खुला व्यापार सम्झौता शीघ्र सम्पन्न गरिने भएको छ ।

बिमस्टेक सदस्य राष्ट्रका विदेशमन्त्रीको काठमाडौंमा शुक्रबार सम्पन्न बैठकले बिमस्टेक ग्रिड अन्तरसम्बन्ध स्थापना गर्ने सम्झौतामा यथाशीघ्र हस्ताक्षर गर्ने निर्णय गरेको परराष्ट्र मन्त्रालयले जनाएको छ । बैठकले बिमस्टेक सदस्य राष्ट्रबिच प्रविधि हस्तान्तरण गर्नेसम्बन्धी सम्झौतालाई शीघ्र अन्तिमरूप दिने निर्णय गरेको उपप्रधानमन्त्री एवम् परराष्ट्रमन्त्री कृष्णबहादुर महराले जानकारी दिनुभयो ।

यही साउन २६ र २७ गते काठमाडौंमा सम्पन्न बिमस्टेकको १५ औँ मन्त्रिस्तरीय बैठकका सम्बन्धमा जानकारी दिन आयोजित पत्रकार सम्मेलनमा उपप्रधानमन्त्री महराले बैठक सफलतापूर्वक सम्पन्न भएको बताउँदै बिमस्टेक सदस्यराष्ट्रबीच व्यापार सहजीकरण गर्ने, पारवहन लगायतका सम्झौतालाई यथाशीघ्र अन्तिमरूप दिने निर्णय भएको बताउनुभयो ।

उहाँले भन्नुभयो, “बैठकले आतंकवाद तथा अपराध नियन्त्रणका लागि तयार गरिएका क्षेत्रीय अभिसन्धिमा हस्ताक्षर र अनुमोदन गर्नुका साथै सन् २०१२ मा काठमाडौंमा सम्पन्न बिमस्टेक सदस्य राष्ट्रका गरिबी निवारण मन्त्रिस्तरीय बैठकले पारित गरेको गरिबी निवारण कार्ययोजनालाई प्रभावकारी रूपमा कार्यान्वयन गर्ने निर्णय गरेको छ ।”

बिमस्टेकको कामलाई थप प्रभावकारी बनाउन स्थापना गरिने भनिएका बिमस्टेक केन्द्र (बिमस्टेक ऊर्जा केन्द्र, बिमस्टेक वातावरण केन्द्र र बिमस्टेक संस्कृति केन्द्र) लाई शीघ्र स्थापना गरी काम सञ्चालन गर्ने निर्णय भएको छ ।

बिमस्टेकको भावी कार्ययोजनाका सम्बन्धमा सुझाव तयार गर्न एक प्रबुद्ध समूह यथाशीघ्र गठन गर्ने भएको जानकारी गराउँदै उहाँले भन्नुभयो, “बैठकले बिमस्टेकको उच्च अधिकारीको १७ औँ तथा १८ औँ बैठकको प्रतिवेदनलाई अनुमोदन गर्नुका साथै बिमस्टेक सचिवालयको बजेट एवं सचिवालयको प्रशासनिक तथा आर्थिक नियमलगायत सदस्यराष्ट्रबीच व्यापार तथा आर्थिक सहयोग अभिवृद्धि गर्ने सम्बन्धमा विभिन्न निर्णय गरेको छ ।”

त्यस्तै बैठकले बिमस्टेकको २० औँ वार्षिकोत्सव मनाउने क्रममा बिमस्टेक सचिवालय र सदस्य राष्ट्रले आयोजना गरेका विभिन्न कार्यक्रमको प्रशंसा गर्दै बिमस्टेकका सम्बन्धमा प्रचारप्रसार गर्न थप कार्यक्रमसमेत आयोजना गर्ने निर्णय गरेको उपप्रधानमन्त्री महराले जानकारी गराउनुभयो ।

मन्त्रिस्तरीय बैठकले गएको १६ अक्टोबर २०१६ मा भारतको गोवामा सम्पन्न भएको बिमस्टेक सदस्य राष्ट्रका राष्ट्र र सरकार प्रमुखको रिट्रिट बैठकका निर्णय र त्यही बखत पारित भएको १६ बुँदे कार्यान्वयन कार्ययोजनामा भएका उपलब्धिको समीक्षा गर्दै उक्त निर्णयको तत्काल कार्यान्वयनमा समेत जोड दिएको छ ।

नेपालले बिमस्टेकका ऊर्जा मन्त्रिस्तरीय तेस्रो बैठक सन् २०१८ को सुरूमा गर्ने प्रस्ताव गर्नुका साथै बिमस्टेकको चौथो शिखर सम्मेलन सदस्य राष्ट्रसँग सल्लाह गरी सबै सदस्य राष्ट्रलाई अनुकूल हुने मितिमा गर्ने प्रस्ताव गरेको उहाँले जानकारी दिनुभयो ।

बिमस्टेकको नयाँ महासचिवमा सहिदुल ईस्लाम

बिमस्टेकका वर्तमान महासचिव सुमित नाकन्दालाको कार्यकाल समाप्त भएकाले यस मन्त्रिस्तरीय बैठकले बंगलादेशका सहिदुल इस्लामलाई बिमस्टेकको महासचिवमा नियुक्त गर्ने निर्णय गरेको छ ।

साथै बिमस्टेक सदस्यराष्ट्रबिच व्यापार प्रवद्र्धन एवं ऊर्जा र पूर्वाधारका क्षेत्रमा लगानीका सम्भावना औँल्याउँदै यस क्षेत्रका निजी क्षेत्रको भूमिका र तिनीहरूबीचको महत्व लगायतका विषयमा प्रकाश पार्दै नेपाल उद्योग वाणिज्य महासंघले शुक्रबारको बैठकसमक्ष एक प्रस्तुतीकरणसमेत गरेको थियो ।

बैठकमा बिमस्टेक सदस्यराष्ट्र नेपालसहित बंगलादेश, भुटान, भारत, म्यानमार, श्रीलंका र थाइल्याण्डका परराष्ट्र र विदेशमन्त्री एवं विदेश राज्यमन्त्री सहभागी हुनुहुन्थ्यो । बैठकको उद्घाटन बिहीबार विशेष समारोहका बिच प्रधानमन्त्री शेरबहादुर देउवाले गर्नुभएको थियो । 

उद्घाटन समारोहमा प्रधानमन्त्री देउवाले बिमस्टेकको पहिलो शिखर सम्मेलनमा आफू सहभागी भएको स्मरण गर्दै नेपालले बिमस्टेकको वर्तमान अध्यक्षको हैसियतमा बिमस्टेकमार्फत क्षेत्रीय सहयोग विस्तार एवम् बिमस्टेकलाई परिणाममुखी बनाउन हरसम्भव प्रयास गर्ने प्रतिबद्धता व्यक्त गर्नुभएको थियो ।

मन्त्रिस्तरीय बैठक सम्पन्न भएपछि शुक्रबार बिमस्टेकअन्तर्गत हासिल भएका उपलब्धी, हालको अवस्था तथा आगामी दिनमा गर्ने कार्यको प्रतिबद्धतासहितको संयुक्त वक्तव्य पारित गरिएको थियो । रासस

 

प्रतिक्रिया दिनुहोस

सम्बन्धित सामग्रीहरु

  • सुनको भाउ घट्यो

    काठमाडौं, कात्तिक ५ – तिहारपछि बजार खुलेको पहिलो दिन आइतबार सुनचाँदीको भाउ घटेको छ ।

  • आइतबारको विदेशी मुद्राको विनिमय दर

    काठमाडौं, कात्तिक ५ – नेपाल राष्ट्र बैंकले आज तोकेको विनिमय दर अनुसार एक साउदी रियालको खरिददर २७ रुपैयाँ ६७ पैसा र विक्रिदर २७ रुपैयाँ ८३ पैसा रहेको छ । त्यस्तै, कतारी रियाल एकको खरिददर २७ रुपैयाँ ३८ पैसा र विक्रिदर २७ रुपैयाँ ५४ पैसा छ ।

  • कवाडी बटुल्ने भारतीयहरु करोडौँको नेपाली पूँजी लान्छन्

    मोरङ, कात्तिक ५ – पैसा कमाउने सुन्दर सपना बोकेर दैनिक झण्डै एक हजार नेपाली वैदेशिक रोजगारीमा विदेश गइरहेका छन् । देशमा रोजगारको सम्भावना नदेखेर नेपाली युवा खाडीतर्फ हानिइरहेका बेला भारतीय नागरिक भने नेपाल आएर कवाडी संकलन गरी नेपालमै पैसा कमाएर घरजम चलाइरहेका छन् ।

  • छठ पर्वले केराको व्यापार बढ्यो

    महोत्तरी, कात्तिक ४ – छठ पर्वका अवसरमा स्थानीय बजारहरुमा केराको कारोबारमा बृद्धि भएको छ ।

  • विदेशी मुद्राको विनिमय दर

    काठमाडौं, कात्तिक २ – नेपाल राष्ट्र बैंकले आज तोकेको विनिमय दर अनुसार एक साउदी रियालको खरिददर २७ रुपैयाँ ६७ पैसा र विक्रिदर २७ रुपैयाँ ८३ पैसा रहेको छ । त्यस्तै, कतारी रियाल एकको खरिददर २८ रुपैयाँ ५० पैसा र विक्रिदर २८ रुपैयाँ ६६ पैसा छ ।

सबै हेर्नुहोस
Joktantra
पछिल्ला समाचारहरु

सोसल मिडिया