MENU

विचार/अनुभूति

Ncell Axiata
sagun

प्रधानमन्त्री देउवाको भारत भ्रमण कति सफल ?

प्रकाश ढकाल/उज्यालो ।

काठमाडौं, भदौ ११ – सिंहदरबार पस्ने बित्तिकै भारत भ्रमण गर्ने विगतको परम्परालाई पछ्याउँदै प्रधानमन्त्री शेरबहादुर देउवाले पनि दिल्लीमा भेटवार्ता र घुमफिर भ्याउनुभएको छ । दोक्लमको विषयलाई लिएर भारत र चीनबीच द्वन्द्व भैरहेको तथा भारतीय तटबन्धका कारण नेपालमा बाढीको समस्या बल्झिएको बेला भएको प्रधानमन्त्रीको भारत भ्रमण खासै उपलव्धीमुलक देखिएन । बरु नेपालको संविधानको विषयमा उहाँले दिल्लीमा बोल्नुभएको विषय निकै विवादित बनेको छ ।प्रधानमन्त्री देउवाले संयुक्त पत्रकार सम्मेलनमा आफैले संविधान संशोधनको घरेलु विषय उठाएपछि आलोचना सुरु भयो । देउवा भ्रमण सकेर काठमाडौं नउत्रिंदै विपक्षी एमालेले मात्र होइन परराष्ट्र मामिलाका जानकारहरुले समेत देउवाले व्यक्त गरेका धारणाप्रति असहमति राखेका छन् । 

समकक्षी नरेन्द्र मोदीसँग औपचारिक भेटवार्ता गरेपछि बिहीबार हैदरावाद हाउसमा आयोजित पत्रकार संयुक्त पत्रकार सम्मेलनमा प्रधानमन्त्री देउवाले केही दिनअघि संसदमा दुई तिहाइ बहुमत नपुग्दा संशोधन फेल भएको र अर्कोपटक पारित हुने गरी संशोधन पारित गराउने वचन दिनुभयो । संविधान संशोधनको विषय विशुद्ध आन्तरिक मामिला भएको र यसले सार्वभौम संसद तथा नेपाली नागरिकको अपमान गरेको भन्दै एमालेले आपत्ति जनाएको छ । 

संविधान जारीपछि तेस्रो प्रधानमन्त्रीका रुपमा देउवाले भारत भ्रमण गरे पनि दुई वर्ष अघि संविधान जारी हुँदा भारतले व्यक्त गरेको अडान फेरिन सकेन । सबै पक्षलाई समेटेर संविधानको कार्यान्वयन गर्नु भन्ने उपदेशात्मक दबाब यसपटक पनि भारतले दोहोर्‍यायो ।

संविधान जारी गरेको निहुँमा अघोषित नाकाबन्दी लगाएको भारत त्यस विषयमा देउवाको भ्रमणबाट पनि कोर्ष करेक्सन गर्ने अवस्थामा पुगेन । यद्यपी दुवै पक्षले दुई देशको सम्बन्ध थप मजबुत भएको दाबी गरिसकेका छन् । जुन यसअघिका प्रधानमन्त्रीको भ्रमणका क्रममा पनि जोडजोडका साथ उपलब्धीको सूचीमा राखिन्थ्यो ।

प्रधानमन्त्री देउवाको भ्रमणको क्रममा आठवटा सम्झौता भए । परराष्ट्र मामिलाका विज्ञ निश्चलनाथ पाण्डेको विचारमा ती सम्झौता प्रधानमन्त्रीको उपस्थितिमै हुनुपर्ने खालका होइनन् । सम्बन्धित मन्त्रालयका सचिव, त्यति नभए मन्त्री तहबाट हुनुपर्ने खालका सम्झौतालाई प्रधानमन्त्रीको स्तरमा हुनु स्वभाविक नभएको पाण्डेको भनाई छ ।

तथापी थप विद्युत् आयातसम्बन्धी सम्झौता, अरुण तेस्रो जलविद्युत् आयोजना शिल्यान्यासका लागि भारतीय पक्षलाई गरिएको निमन्त्रण र पञ्चेश्वर परियोजनाको डिपिआर आयोजना यो वर्षभित्र बनाइ सक्ने प्रतिबद्धता सकारात्मक पाटा हुन सक्छ । 

भ्रमणमा निस्कनु अघि मन्त्रिपरिषद्ले पारित गरेका एजेण्डलाई भ्रमणका क्रममा देउवाले गम्भीरतापूर्वक उठाउनुभएन । भ्रमणको एउटा मुख्य कार्यसूची सीमा क्षेत्रमा भारतीय पक्षबाट बनेको बाँध र तटबन्धबाट उत्पन्न भएको समस्या समाधान खोज्नु भनिएको थियो । भारतीय बाँधका कारण डुबेका नागरिक ओभानो ठाउँमा नसर्दै भएको प्रधानमन्त्रीको भ्रमणले केही उपलब्धी होला भन्ने आशा निराशामा परिणत भएको छ । 

यस्तै दोक्लमको विषयमा भारत र चीनबीच द्वन्द्व बढिरहेको बेला नेपालको तटस्थ भूमिकालाई देउवाले अडानका साथ राख्न सक्नुभएन । नेपालले भारतको पक्ष लिनुपर्छ भन्ने मोदीको घुमाउरो प्रस्तुतिमा देउवा मौन बस्नुभयो । 

दुई छिमेकी देशलाई समान रुपमा हेर्ने नेपालको नीतिलाई त देउवाले खुलस्त रुपमा देखाउन सक्नुभएन नै । भारतीय तटबन्धका कारण नेपालको भूमी डुबानमा परिरहेको छ भन्ने वास्तविकतामा समेत मौन बस्नुभयो । उल्टै संविधान संशोधन जस्तो नेपालको नितान्त आन्तरिक मामिलामा बोलेर आलोचना खेप्नुभयो । 

 

प्रतिक्रिया दिनुहोस

सम्बन्धित सामग्रीहरु

  • ​केटा र केटीबीच विवाह कसरी जुराइन्छ ?

    ज्योतिष शास्त्रमा बिभिन्न कुराहरुको वर्णन गरिएको छ । हिन्दु धर्मशास्त्रहरुका अनुसार कुनै पनि केटा र केटीको विवाह गर्दा सम्बन्ध राम्रो हुन्छ कि हुँदैन भन्ने विचार गर्नुपर्छ । यस कुराको विचार ज्योतिष गणनाको आधारमा हुने गर्छ । कसरी केटा वा केटीको विवाह जुर्छ जुर्दैन थाहा पाउने गरिन्छ त ?

  • कुर्सी नपाउँदासम्म कुकुर बिरालालाई पनि ढोग्छन्, कुर्सीमा पुगेपछि मान्छे नै चिन्दैनन्

    घर झापा विर्ता शनिश्चरे हो । तर काठमाडौं बसेकै ११ वर्ष भैसक्यो । बानेश्वरमा सिलाईको काम गर्दै आएकी छु । झापाको भन्दा काठमाडौंको समस्या बढी देख्छु म त । मेलम्चीको पानी ल्याउँछु भनेको यतिका भैसक्यो आएको छैन । बाटोमा धुलोधुवाँले हिँडिसक्नु छैन ।

  • बम पड्काउनेले बुझ्न नसकेको यथार्थ

    देश चुनावको मुखमा छ । नेता, कार्यकर्तादेखि आमनागरिकलाई चुनाव लागेको छ । दलहरुको घोषणापत्र र नेताहरुले भाषणमा भनेजस्तो देशले छिटै काँचुली फेर्छ भन्नेमा नागरिकलाई विश्वास त छैन, तर चुनावले लामो समयदेखिको संक्रमणकाल अन्त्य गर्छ भन्ने आशा चाहिँ सबैमा छ ।

  • घर कुन दिशामा फर्केको राम्रो ?

    वास्तुशास्त्र अनुसार विभिन्न दिशाहरुको विभिन्न स्वभावहरु छन् । दिशाहरुको स्वभाव अनुसारका संरचनाहरु त्यस दिशामा बनाउनु राम्रो मानिन्छ । पूर्व दिशाबाट सूर्योदय हुने भएकाले यस दिशाबाट निकै राम्रो उर्जाहरु आउने मान्यता रहेको छ ।

  • तपाई मधुमेहको बिरामी हुनुहुन्छ ? भान्छामा छुट्टै खाना बनाउनु पर्दैन

    हिजोआज मानिस हिँड्न छाडे । विकासले जहाँतहाँ बाटो खुल्दा हिँडेर जाने ठाउँमा सवारी साधन प्रयोग हुन थाले । डेरीमा जाँदा क्यान र मान्छेलाई मोटरसाइकलले लैजान्छ । बसको प्रयोग हुन्छ । गाउँ गाउँमा चाउमिन, चाउचाउ, आलु चिप्स, तारेका खानेकुरा पुगे ।

सबै हेर्नुहोस
Joktantra
पछिल्ला समाचारहरु

सोसल मिडिया