MENU

विचार/अनुभूति

Ncell Axiata

घरभित्र सर्पको १८ घण्टे बास, परिवारलाई त्रास

सुजाता खत्री -

‘ए आम्मा, यहाँ सर्प रैछ !’ आमा आत्तिदै चिच्याउनुभयो ।

म दगुरेर आमा नजिकै पुगेँ । 

एउटा हातमा पानी तान्ने पम्प र अर्को हातमा चियाको गिलास समातेकी आमा फ्या फ्या गर्दै हुनुहुन्थ्यो । सर्प देख्दा आत्तिएर होला चिया पनि पोख्नुभएछ ।

‘कहाँ निर हो ?’ मैले सोधेँ ।

फूलदानी देखाउँदै आमाले भन्नुभयो ‘त्यहाँ छ ।’ 

फलामको पाताको दुई तह भएको र्‍याकमा धेरै जसो तल्लोमा जुत्ता र माथिल्लोमा फूलदानी अनि पानी तान्ने पम्प हुन्छ । त्यो र्‍याक अघिल्लो दिन मात्र स्टोर रुममा पुगेको हो । र्‍याकको बायाँपट्टी पानी भरिएका जार, जर्किन, बाल्टिन र प्लास्टिकका बोतल छन् । दायाँपट्टी छरिएका आलु, भाँडाकुडाँ । आमाले फुलदानीमा संकेत गर्ने बित्तिकै हेरेँ, पुच्छर देखियो । र्‍याकलाई घ्वार्र ताने तर सर्प र्‍याकमुनि रहेनछ । 

हामी कराएको सुनेर बुवा र दिदी पनि कोठामा नै आइपुग्नुभयो । 

हामी दुई दिदी बहिनी कसैलाई कुट्न लागे झैँ हातमा लौरो लिएर उभियौँ र लौरोले बिस्तारै एउटा एउटा जुत्ता र्‍याकबाट खसाल्न थाल्यौँ । आधा जति जुत्ता भुईँमा झारेपछि सर्प सलल पानीका बोतल राखेतिर गयो ।

‘सर्प झ्यालबाट निस्केको राम्रो, झ्याल खोलिदेउ,’ बुवाको बोलि फुट्यो ।

‘झ्याल खोल्ने कसरी, सर्पले टोक्यो भने’ दिदी आत्तिनुभयो । 

सर्प कुनामा गुजुल्टिएर बसेको देखियो, हामी के गर्ने अन्योलमा परिरह्यौ ।

‘यो बानले कति दुःख देको होला ? हिजै भेट्न पाको भए आनन्द हुन्थ्यो, अब के गर्ने होला छि !’ आमाले बोल्नुभयो ।
...

अघिल्लो दिन क्याम्पसबाट घर फर्कदा १२ बजिसकेछ । घाम चरक्क नलागेपनि हप्प गर्मी थियो, ज्यान पसिनाले लपक्कै भिजेको भएर नुहाएर मात्र खाना खाने निधो गरे । नुहाइसके र कपडा पखाल्न थाले । पाइन्ट पखाल्दै गर्दा धाराले ख्वाक ख्वाक गर्‍यो, मैले बुझे माथि ट्याङ्कीमा पानी सकिएछ । पानी माथि पठाउन स्वीच अन गरेर म कोठामा पसे ।  साढे दुई बजेको थियो होला, छतबाट पानी खसेर टिनमा ट्वार्र गरर्‍यो । 

‘लौजा ! पानीको स्वीच बन्द गर्नुपर्ने’ हातको मोबाइल खाटमै छोडेर बाहिर निस्के र स्वीच अफ गरे । 

कति पानी पोखिएछ भनेर कौसीमा हेर्दा पानी धेरै जमेको देखेपछि लाग्यो आज तलको ट्याङकीमा जम्मा भएको पानी सबै सक्कियो ।

दोडिएर तल आए, ट्याङकीको ढक्कन खोलेको मात्र के थिए पानी भन्दा पहिला सर्प देखियो, पाइपबाट तल जाँदै रहेछ, ढक्कन खोलेपछि माथितिर फर्कियो, मेरो हात र सर्प दुरी अब धेरै छैन, मेरो सातो उड्यो । हातका रौं ठाडा भए ।

‘घरमा कोहि छैन, सर्पले मलाई टोक्यो भने... !’ मेरो मनमा कुरा खेल्न थाल्यो । 

‘सर्प विषालु रैछ भने आज पक्का म गएँ ।’ केहि दिन अगाडिमात्र सर्पदशंको बारेमा डाक्टर शेरबहादुर पुनसँग अन्तरवार्ता गरेको थिए । त्यहाँ डाक्टरले भन्नुभएको प्राथमिक उपचारका विधि दिमागमा दौडन थाले । 

तर सर्पलाई नि डर लागेछ सायद, छिटो छिटो गयो, भर्‍याङ मुनी अध्यारो भएकोले मैले कहाँ गयो देख्न सकिन । कोठाबाट मोबाइल ल्याएर टर्च बालेर हेरे, भर्‍याङ मुनी राखिएका सामान एकएक गरी लामो लठ्ठीले तान्न थाले, सर्प बेरेर राखेको पाइपमा रहेछ चलाएपछि भित्तो उक्लन थाल्यो र प्वालमा छिर्यो । बाहिर गएर प्वाल छ कि छैन हेर्न गए तर देखिन । अब अर्को पीर थपियो, घरमा कसैलाई सर्प छ भन्ने थाहा छैन, टोक्यो भने ?

बुवा र भिनाजु घरमा आइपुग्नुभयो, एकै छिनमा दिदी पनि । मेरो कुरा सुनेपछि सबैले प्वालमा हेर्न थाल्नुभयो । सर्प बाहिर निस्केको रहेछ, हामीले टर्च बालेपछि फेरि फर्कियो प्वालमै ।

अब बुबा सर्प गोठालो हुनुभयो, दिदीले घरका अरु ठाउँमा भएका प्वाल टाल्न थाल्नुभयो । पानी ट्याङ्की सँगै भएको जुत्ता राख्ने र्‍याक स्टोर रुममा पुग्यो । भूइँ तलामा ५ वटा ढोका छन्, ट्वाइलेटको, दुईवटा सामान राख्ने कोठाको, म बस्ने कोठाको र मुल ढोका । सबै ढोकामा सर्प छिर्ने प्वाल टालेपछि बुवाले सर्प भगाउन बास्ना आउने धुम बाल्नुभयो । उहाँसँग अर्को जुत्ति रहेछ, महको रेखी हाल्ने । लठ्ठीमा महले भिजेको कपडा बेरेर सर्पलाई लक्ष्मणरेखा लागाईयो, अब सर्पले जाने बाटो भनेको मूल ढोकामात्र थियो । सबैलाई ढुक्क भयो अब सर्प माथितलामा आउँदैन ।

रातको खाना खाइसकेपछि दिदीले माथिल्लो तल्लामा सुत भन्नुुभयो, मैले मानिन । सोचेँ सर्प घरबाट निस्किसक्यो होला । तै पनि मनको शान्तिको लागि सर्प छिरेको प्वालमा हेरेँ र कोठामा चुकुल लगाएर सुतेँ । हिजोअस्ति देखेका भन्दा आज भिन्दै सपना देखेँ, सर्प सिरानीमा आएको, सिरकमाथि बसेको, मुख पुछ्ने रुमालमा झुन्डिएको आदि । प्राय एकै पटक बिहानमात्र खुल्ने आँखा ६ पल्ट भन्दा बढि खुले, कहिले बिहान होला जस्तो लाग्यो ।

...

साढे ८ बजिसक्यो, सर्प हलचल गर्दैन, आँधो पो हो कि भन्ने अड्कल आमाको छ । सर्पको रंग घस्रने भाग पहेलो र माथिको भाग कालो, हरियो मिसिएको थियो । खाली ठाउँ पायो भने बाटो लाग्छ होला भन्ने लागेर गुजुल्टिएको ठाउँ अगाडि खाली गरिदियौँ । मलाई छिमेकीले मुसा आउँने बाटोमा धोक्रो थापेर मुसलाई पक्रेको याद आयो र सर्पलाई खुलाइदिएको बाटोमा मैले धोक्रोको मुख खोलेर राखिदिए । सर्प हामीले भनेको माने झैँ गरी धोक्रामा छिर्‍यो । सर्पको मुखले धोक्रो पिँध भेट्यो भने त पक्का फर्कन्छ, त्यसैले डरैडरमा आधा सर्प धोक्रामा छिर्ने बित्तिकै उठाए र धोक्रोको मुख बानेँ । 

अब झन् ठूलो हल्ला भयो सर्पलाई के गर्ने । दिदीले बाहिर लगेर छोड भन्नुभयो, बुवाले मान्नुभएन । हाम्रो घर भन्दा दायाँबायाँ साना बच्चाहरु खेलिरहेका हुन्छन्, त्यसैले सर्पलाई खोलामा नै पुर्‍याउने निर्णय भयो । म धोक्रो समातेर अघि लागे, मेरो पछाडि हातमा लौरो लिदैँ बुवा र त्योभन्दा पछाडि पल्लाघरका स–साना नानीहरु । हामी एक हुल लाइनबद्ध भएर सर्प फाल्न गयाँै, वल्लोपल्लो घरकाले हामीलाई के भयो भनेर ट्वाल्ल हेर्दै थिए । 

म उभिएको बारीको डिलबाट तीन पाटा कटेपछि मात्र खोला आउथ्यो, सर्पलाई मात्रै फाल्दा खोलामा नपुग्ने भएपछि बोरामा ढुंगा बेरेर हुत्याए । बुवा हामीले निकालेको जात्राको बेलिविस्तार लगाउँदै हुनुहुन्थ्यो, म घर फर्किए । सर्प खोलामा पुग्यो पुगेन थाहा छैन, तर घरका सबैको मनको डर भने सर्पको बोरासँगै गयो । आमाले धोक्रो नल्याको भनेर सोध्दा म टाउको हल्लाउँदै कोठामा पसेँ ।

 

Mitsubishi

प्रतिक्रिया दिनुहोस

सम्बन्धित सामग्रीहरु

  • नेपालमा चीनको स्वार्थ

    कैयौँ पटक ‘नेपालको सार्वभौमसत्ता रक्षाका लागि’ चीनले सहयोग गर्ने भन्ने गरिएको छ बेइजिङ्गबाट । कूटनीतिक दृष्टिले यो अत्यन्तै गम्भीर अभिव्यक्ति हो । यसको अर्थ नेपालको सर्वभौमसत्ता गुम्ने र नेपालको अस्तित्व नै नरहने खतरा छ भनेर चीनले विश्लेषण गरेको हो भनेर बुझ्नु पर्ने हुन्छ ।

  • आँखाको क्यान्सर कति खतरनाक ?

    एक दशक अगाडि अलि कम र अहिलेको दशकमा एकदम धेरै सुनेको रोग क्यान्सर हो । शरीरको विभिन्न अंगहरु फोक्सो, आन्द्रा, कलेजो, पाठेघर, स्तनलगायतमा क्यान्सर भए जस्तै आँखामा पनि क्यान्सर हुन्छ । अरु क्यान्सरमा भन्दा यो क्यान्सर हुने जोखिमयुक्त कारक तत्वहरु फरक छन् ।

  • ओलीका अघिल्तिर कति धेरै अवसर ?

    बोले अनुसार काम थाल्ने हो भने वाम गठबन्धनको सरकारका सामु चुनौती थोरै र अवसरहरु कता हो कता धेरै छन् । अब बन्ने सरकारका लागि सबैभन्दा ठूलो अवसर विकासलाई तल्लो तहसम्म पुर्यासउने संरचना तयार छ । स्थानीय तहको चुनावपछि विकासलाई नागरिकको घर दैलोसम्म पुर्याउने जनप्रतिनिधिहरु चुनिएर अहिले काममा छन, तर देखाउने काम नपाएर कामका अवसरको खोजीमा छन ।

  • चुनाव सम्पन्न गराउनु ठूलो उपलब्धि : देउवा

    मेरो नेतृत्वमा सरकार गठन भएपछि जनताको सरोकारका विषयलाई केन्द्रमा राखेर निर्णयहरु भएका छन् । विशेषगरी स्वास्थ्य शिक्षा क्षेत्रमा देखिएका विकृतिहरु नियन्त्रण गर्न चिकित्सा शिक्षा आयोगको अध्यादेश जारी गरिएको छ । जनताको स्वास्थ्यसँग सरोकार राख्ने चिकित्सा शिक्षा व्यापारको विषय होइन ।

  • लभ गर्ने फर्मुला

    बिहे नभएकाले त लभ गरे गरे । तर बिहे गरेका, घरभरी छोराछोरी भएकाहरु समेत लभ गरि हिँड्छन् । श्रीमानको आँखाकान छलेर श्रीमतीले, श्रीमतीको आँखाकान छलेर श्रीमानले लभ गरेर हिँडेको तपाईं हामीले धेरै ठाउँमा देखेभोगेकै हो क्यारे । लभ पर्न केही न केही त जुर्नुपर्यो । कि मन मिल्नुपर्यो ।

सबै हेर्नुहोस
Skill Training
पछिल्ला समाचारहरु

सोसल मिडिया