MENU

राजनीति

Ncell Axiata
sagun

एमालेका दुई उपमहासचिवलाई कांग्रेस-राप्रपाको चुनौती

भवानीप्रसाद पाण्डे/उज्यालो । 

रुपन्देही, कात्तिक २७ – वाम गठबन्धनका उम्मेदवार बनेका नेकपा एमालेका उपमहासचिव विष्णु पौडेल र घनश्याम भुसाललाई रुपन्देहीमा नेपाली कांग्रेसले नेतृत्व गरेको लोकतान्त्रिक गठबन्धनले चुनौती दिँदैछ । 

दुबै उम्मेदवार अहिले मंसिर २१ गते हुने चुनावमा मत माग्न व्यस्त छन् । स्वास्थ्यमन्त्री दिपक बोहोरा, खानेपानी तथा सरसफाई राज्यमन्त्री अव्दुल रज्जाक, राजपाका बरिष्ठ उपाध्यक्ष सर्बेन्द्रनाथ सुक्ला तथा पूर्वमन्त्री भरत शाह र छबिलाल विश्वकर्माको राजनीतिक भबिष्यको फैसला रुपन्देहीका मतदाताले मंसिर २१ मा गर्दैछन् ।

एमाले उपमहासचिव समेत रहेका रुपन्देही क्षेत्र नं ३ का उम्मेदवार घनश्याम भुसाल आफ्नो क्षेत्रमा चुनावी प्रचारमा हुनुहुन्छ । अर्का उपमहासचिव बिष्णु पौडेल पनि आफ्नो पूर्व अर्थमन्त्रीसमेत रहनु भएका पौडेलले २०५६ साल यता पहिलोपल्ट नयाँ प्रतिस्पर्धी पाउनु भएको छ । २०५६ को संसदीय चुनावमा नेपाली कांग्रेसका सुर्यप्रसाद प्रधानसँग पराजित भएयता भएका चुनावमा पौडेल निरन्तर विजयी हुँदै आउनु भएको छ । अहिले भने उहाँलाई नेपाली कांग्रेसका महाधिवेशन प्रतिनिधि तथा सालिन युवा नेता युवराज गिरीले चुनौती दिँदै हुनुहुन्छ ।

अर्का उपमहासचिव भुसाल भने २०७० सालको संविधानसभाको चुनावमा झिनो मतान्तरले पराजित हुनु भएको थियो । एमालेबाट निर्वाचित सांसद धनपति उपाध्यायको निधन भएपछि सम्पन्न उपचुनावमा २०५२ सालमा भुसाल विजयी हुनुभएको थियो । फरक यति मात्रै हो उपचुनावमा तत्कालिन राप्रपाका दिपक बोहोराको समर्थन भुसाललाई थियो भने अहिले कांग्रेसको समर्थनमा बोहोरा र माओवादी केन्द्रको समर्थनमा भुसाल आम्नेसाम्ने हुनुहुन्छ । 

स्वास्थ्यमन्त्री रहनु भएका रुपन्देही क्षेत्र नं ३ का राप्रपा प्रजातान्त्रिकका उम्मेदवार दिपक बोहोरा कांग्रेस नेताहरुका साथमा घरदैलोमा चुनावी प्रचारमा हुनुहुन्छ । रुपन्देहीको विकासमा कांग्रेस नेता बालकृष्ण खाँण र आफ्नो योगदान रहेको भन्दै बोहोराले लोकतान्त्रिक गठबन्धनलाई भोट मागिरहनु भएको छ । २०७० सालको संविधानसभाको चुनावमा उहाँ विजयी हुनु भएको थियो ।

खानेपानी तथा सरसफाई राज्य मन्त्री अव्दुल रज्जाक रुपन्देही क्षेत्र नं १ मा वाम गठबन्धनका उम्मेदवार छबिलाल बिश्वकर्मासँग प्रतिस्पर्धामा हुनुहुन्छ । सो क्षेत्रमा रज्जाक र विश्वकर्माको यो दोश्रो भेट हो । २०७० सालमा विश्वकर्मालाई नै झिनो मतले पराजित गरी रज्जाक विजयी बन्नुभएको थियो ।

नेपाली कांग्रेसबाट राजनीति सुरु गरेका राजपाका बरिष्ठ उपाध्यक्ष सर्बेन्द्रनाथ शुक्लालाई क्षेत्र नं ४ मा कांग्रेसकै प्रमोदकुमार यादवले चुनौती दिइरहनु भएको छ । यादव युवा व्यवसायी हुन् । २०६४ सालको संविधानसभामा रुपन्देहीको क्षेत्र नं २ बाट मधेसी जनाधिकार फोरमबाट निर्वाचित भएका ओमप्रकाश यादव गुल्जारी अहिले भने क्षेत्र नं ४ मा एमालेको उम्मेदवार हुनुहुन्छ । शुक्ला २०७० सालको दोश्रो संविधानसभामा निर्वाचित हुनु भएको थियो ।

क्षेत्र नं ५ मा पूर्वमन्त्री कांग्रेसका भरत शाह र वाम गठबन्धका उम्मेदवार माओवादी केन्द्रका डिलाराम आचार्य आफ्नो क्षेत्रमा चुनावी अभियानमा क्रियाशील रहनु भएको छ । २०७० सालको चुनावमा एमालेका स्वर्गीय रामनाथ ढकाललाई पराजित गर्दै कांग्रेसका साह विजयी हुनुभएको थियो । माओवादी केन्द्रका केन्द्रीय कार्यालय सदस्य डिलाराम आचार्य २०५६ सालको प्रतिनिधिसभाको चुनावमा अर्घाखाँचीको क्षेत्र नं १ बाट निर्वाचित बन्नुभएको थियो । संयोग नै मान्नु पदर्छ उतिबेला राष्ट्रिय जनमोर्चाका उम्मेदवार बनेका आचार्यलाई एमालेको समर्थन थियो भने अहिले माओवादी केन्द्रबाट उम्मेदवार बनेका आचार्यलाई एमाले कै समर्थन छ । रुपन्देहीमा प्रतिनिधिसभाका ५ र प्रदेशसभाका १० स्थानका लागि चुनाव हुन लागेको हो । स्थानीय चुनावको नतिजा हेर्ने हो भने क्षेत्र नं ४ र ५ मा बाहेक अरु क्षेत्रमा वाम गठबन्धन अग्र स्थानमा छ । 

 

प्रतिक्रिया दिनुहोस

सम्बन्धित सामग्रीहरु

सबै हेर्नुहोस
Joktantra
पछिल्ला समाचारहरु

सोसल मिडिया