MENU

मनोरञ्जन

Ncell Axiata
sagun

युट्यूबमा चुनावी गीत : दललाई भोट माग्दै कलाकार

काठमाडौं, कात्तिक २८ – प्रतिनिधिसभा र प्रदेशसभाको चुनावलाई केन्द्रित गरेर चुनावी गीत सार्वजनिक गर्ने क्रम बढेको छ । 

डिजिटल दुनियामा चुनाव लक्षित गीत–संगीतको बाढी नै आएको देख्न सकिन्छ । युट्यूब च्यानलमा नै यतिबेला चुनाव लक्षित गीत नै बढ्ता चल्तीमा देख्न सकिन्छ । लोकदोहोरी गीतमा प्रसिद्धि कमाएका कलाकार बद्री पंगेनीले वाम गठबन्धनको पक्षमा भोट माग्दै गीत तथा संगीत तयार पार्नुभएको छ । 

विशेषगरी नेकपा एमालेका अध्यक्ष केपी शर्मा ओली र नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’को नाममा नै उहाँले चुनावी गीत तयार पार्नुभएको छ । 

विभिन्न जिल्लाका चुनावी अभियानमा व्यस्त रहनुभएका पंगेनीले भन्नुभयो, “राष्ट्रिय आवश्यकता र चाहनालाई सम्बोधन गर्ने दायित्व हामी कलाकारको पनि हो । त्यही दायित्वलाई पूरा गर्ने लक्ष्यका साथ हामीले वाम गठबन्धनको पक्षमा गीत गाएका हौँ ।” 

युट्यूबमा पंगेनीले गाएको ‘एमाले अध्यक्ष ओलीलाई विजयी गराऊँ’ भन्ने गीत ३४ हजार भन्दा धेरैपटक हेरिएको छ भने ‘माओवादी केन्द्रका अध्यक्ष प्रचण्डलाई विजयी गराऊँ’ भन्ने गीत यो समाचार तयार पार्दासम्म ८८ हजारपटक हेरिएको छ । 

स्थानीय चुनावमा क्रममा पंगेनीले नै गाएको ‘मै पनि एमाले’ भन्ने गीत १६ लाखले हेरेका छन् । अर्का लोकदोहोरी गायक विष्णु खत्रीले पनि चुनावलाई केन्द्रित गरेर गीत तयार पार्नुभएको छ । 

खत्रीको एक गीतको बोल छ, “माओवादी केन्द्र, एमाले, मसाल देश हाँक्ने संयुक्त वामले हो, कमरेड प्रचण्ड देशका राजनेता, मिलीजुली जिताउने हाम्ले हो ।” 

खानेपानी, सिँचाइ, सडक, स्वास्थ्य अनि शिक्षा, पर्यटन प्रवद्र्धन गर्ने वाम गठबन्धन जरुरी रहेको भन्दै खत्रीले गीतमार्फत, बेरोजगारले रोजगार पाउने सामाजिक सुरक्षा भत्ता बढाउने जस्ता राष्ट्रिय आवश्यकता पूरा गर्न वामपन्थीको सत्ता जरुरी रहेको बताउनुभएको छ । खत्रीको उक्त गीत अहिलेसम्म १७ हजारपटक युट्यूबमा हेरेका छन् । 

यस्तै टीका पुन र नवीन खड्काले पनि चुनावलाई केन्द्रित गरेर ‘आयो वाम गठबन्धन’ नामक गीत प्रस्तुत गर्नुभएको छ । मध्यपश्चिम क्षेत्रमा प्रचलित ‘सिंगारु टप्पा’ लोकलयमा तयार पारिएको यो गीत अहिलेसम्म २३ हजारपटक हेरिएको छ । 

उनै, गायक खड्का र पुनको वाम गठबन्धन नै देशको अत्यावश्यक रहेको भन्दै गीत तयार पारेका छन् । यस्तै, माओवादीको सामना परिवारमा लामो समयदेखि काम गर्दै आएका झंकार बुढाले पनि चुनावी गीत ल्याउनुभएको छ । सारङ्गी लयमा तयार भएको गीतमा ‘वाम गठबन्धनलाई किन विजयी गराउने’ भन्ने विषय समेटिएको छ । 

यस्तै, लोकगायक सुनिल परियार, सम्झना विसीले ‘मिलाउ हातमा हात, देश बनाउने पार्टी हो एमाले’ भन्ने लोकलयको गीत तयार पार्नुभएको छ । 

युट्यूबमा यो गीतले पनि राम्रो दर्शक पाएको छ । सार्वजनिक भएको सात दिनमा यो गीतले ३६ हजार दर्शक पाएको छ । गायक तारानाथ आचार्य र तारा पौडेलले ‘देशले खोजेको वाम एकता, जनताले रोजेको वाम एकता’ नामक गीत सार्वजनिक गर्नुभएको छ । सो गीतले अहिलेसम्म ६६ हजार दर्शक पाएको छ । 

लोकगायक डिल्ली परियार र अमित परियारले पनि पूर्वमा लाली छाउँदैछ भन्ने चुनावी गीत तयार पार्नुभएको छ । सार्वजनिक भएको तीन दिनमा यो गीत १२ हजार पटक हेरेका छन् । 

वरिष्ठ लोक दोहोरी गायक पुरुषोत्तम न्यौपानेले ‘एमाले जनताको साथमा छ’ भन्ने गीतमार्फत संविधान कार्यान्वयन गर्न आग्रह गर्नुभएको छ । यो गीत अहिलेसम्म एक लाख ६१ हजारपटक हेरेका छन् । 

लोक दोहोरी गायिका राधिका हमालले ‘कांग्रेस हो सुख र दुःखमा’ भन्ने गीत सार्वजनिक गर्नुभएको छ । स्थानीय तहको चुनावकै क्रममा सार्वजनिक गरिएको योे गीतले राम्रो दर्शक पाएको छ । लोक दोहोरी गायक विमलराज क्षेत्री र स्मृति शाहीले पनि कांग्रेसका लागि चुनावी गीत गाउनुभएको छ । 

यस्तै नेतापिच्छे पनि चुनावी प्रचारका गीत बनाउने गतिविधि बढेर गएको छ । जाजरकोटमा वाम गठबन्धनका उम्मेदवार शक्तिबहादुर बस्नेतको नाममा चुनावी गीत बनाइएको छ । यस्तै, गोरखाबाट प्रदेशसभाका उम्मेदवार प्रकाशचन्द्र दुवाडीको नाममा पनि लोकदोहोरी गायक राजु ढकालले चुनावी गीत तयार गर्नुभएको छ । 

नेपाल सांस्कृतिक संघ, रोल्पाले ‘चारतारे झण्डालाई’ भन्ने चुनावी गीत तयार पारेको छ । यो गीतले अहिलेसम्म २० हजार दर्शक पाएको छ । त्यस्तै लोक गायक भानुभक्त जोशीले ‘प्रधानमन्त्री शेरबहादुर देउवा विशेष’ भन्ने चुनावी गीत गाउनुभएको छ । 

लोकगायक वैकुण्ठ महत र पूर्णकला विसीले पनि ‘आयो एमाले आयो’ भन्ने गीत सार्वजनिक गर्नुभएको छ । यस्तै, गायक तथा संगीतकार चेतन सापकोटाले पनि चुनावी गीत गाउनुभएको छ । संगीतकारसमेत रहनुभएका नेकपा माओवादी केन्द्रका नेता मणि थापा गीत–संगीतको माध्यमबाट चुनावी अभियान चलाउने विषय सकारात्मक भएको बताउनुहुन्छ । उहाँले नागरिकलाई प्रत्यक्ष प्रभावमा पार्ने भनेकै गीत–संगीत भएकाले पछिल्लो दिनमा गीत–संगीतको मात्रा बढेको जानकारी दिनुभयो । 

युट्यूबको टे«ण्ड हेर्दा लोकशैलीमा गाइएका चुनावी गीतले बढ्ता दर्शक पाएका छन् । लोकशैलीमा मात्रै होइन, लोक—आधुनिक शैलीमा पनि चुनावी गीत तयार पारिएको छ । प्रतिनिधिसभा र प्रदेशसभा चुनावका लागि भने वाम गठबन्धनलाई विजयी गराऊँ भन्ने गीत नै युट्यूबमा बढी देखिन्छन् ।

 

प्रतिक्रिया दिनुहोस

सम्बन्धित सामग्रीहरु

सबै हेर्नुहोस
Joktantra
पछिल्ला समाचारहरु

सोसल मिडिया