इलाम, पुस ६ –इलाममा अलैँची जोगाउन कृषक पाठशाला सुरु गरिएको छ । जिल्लाका १८ गाउँमा अलैँची कृषकलाई लक्षित गरेर कृषक पाठशाला सुरु गरिएको हो  ।

विभिन्न रोगका कारण सखाप भएको अलैँची खेतीको अवस्था सुधार  गर्ने उदेश्यले उन्नति समावेशी वृद्धि कार्यक्रमले कृषक पाठशाला सुरु गरेको उन्नतिका कृषि व्यवसाय विज्ञ सिवलाला कार्कीले जानकारी दिनुभयो ।

उहाँका अनुसार उन्नतिले जिल्लाका इलाम नगरपालिका, सूर्योदय नगरपालिका, सन्दकपुर गाउँपालिका, माइजागमाई गाउँपालिका र  मांसेबुङ  गाउँपालिकाका सहकारी र कृषक समूहमार्फत १८ स्थानमा पाठशाला सुरु गरेको हो । पाठशालाबाट पाँच सय ४० किसान लाभान्वित हुने विज्ञ कार्कीले बताउनुभयो  ।
पाठशालाले कृषकहरुलाई प्रर्दशन प्रभावका माध्यमबाट प्राविधिक रुपमा खेती गर्न सक्ने बनाउने, अलैँचीको उन्नत प्रविधि कृषकमा हस्तान्तरण गर्ने र प्राविधिक रुपमा खेती गर्न सक्ने बनाउने छ ।

छत्तीस लाख रुपैयाँको लागतमा करिव दश महिना सञ्चालन हुने  कार्यक्रममा किसानलाई अलैँची बारीमै कृषि प्रविधि सिकाइने अलैँची विकास केन्द्र पान्दमका प्राविधिक सहायक दिलबहादुर श्रेष्ठले  जानकारी दिनुभयो  ।

उहाँका अनुसार  किसानलाई अलैचीको नर्सरीदेखि उत्पादन र बजारीकरणका लागि महिनामा एक पटक कक्षा सञ्चालन गरिने छ । पाठशालाको क्रममा किसानले गरिरहेको प्रविधि र उन्नत प्रविधिबाट खेती गरेर दश महिनासम्म तुलनात्मक अध्ययन गरेर परिणाम अन्य किसानलाई पनि प्रसारण गर्ने योजना रहेको छ ।

जिल्ला कृषि विकास कार्यालय इलामका अनुसार इलाममा अलैँची एक हजार ६ सय हेक्टरमा खेती हुँदै आएको छ । यो क्रम बढ्दो अवस्थामा रहेको जिल्ला कृषि विकास कार्यालय इलामका वरिष्ठ कृषि विकास अधिकृत राम सोगारथ साहले बताउनुभयो ।