चितवन, पुस ९ – नेकपा माओवादी केन्द्रका अध्यक्ष पुष्पकमल दाहाल प्रचण्डले राष्ट्रियसभा गठनमा देखिएको विवाद छिट्टै समाधन हुने बताउनुभएको छ । चितवनको सप्तगाण्डकी क्याम्पसमा आइतबार बिहान भएको कार्यक्रममा उहाँले समस्या समाधानका लागि आफूहरु लचक भएको बताउनुभयो ।

अबको एकदुई दिनमा समस्या समाधान हुने प्रचण्डको भनाई छ । समस्या समाधानका लागि अझै एक दुई दिन छलफल गर्ने र निर्वाचन आयोगले गर्ने काम गर्दै लाने उहाँले बताउनुभयो । एकल संक्रमणीय प्रणाली र बहुमतीय प्रणाली के मा जाँदा पीछडिएका वर्गको प्रतिनिधित्व हुन्छ त्यही अनुसार नै आफूहरु अघि बढ्न तयार रहेको उहाँको भनाई छ ।

यस्तै अर्को प्रसंगमा माओवादी केन्द्रका अध्यक्ष प्रचण्डले नेकपा एमालेसँग पार्टी एकता गर्ने अन्तिम तयारी भैरहेको जानकारी दिनुभयो । एमाले र माओवादीलाई एक हुन नदिन विभिन्न शक्ति सक्रिय भएको उल्लेख गर्दै उहाँले त्यस्ता शक्तिलाई परास्त गरेर अघि बढ्ने स्पष्ट पार्नुभयो ।

उहाँले भन्नुभयो ‘पुल बाँकी राख्दा फेरि फर्कने बाटो हुने भएकाले हामीले पुल नै भाँचेर अघि बढेका छौँ । अब फर्कने सम्भव छैन पार्टी एकता हुन्छ हुन्छ ।’