MENU

राजनीति

​गाउँपालिका केन्द्रको विषयमा विवाद, गाउँसभा अझै बस्न सकेन

तेह्रथुम, पुस १२ –तेह्रथुमको मेन्छ्यायेम गाउँपालिकाको केन्द्र कहाँ राख्ने भन्ने विषयमा जनप्रतिनिधि बीचमै विवाद भएको छ ।

गाउँपालिकाको केन्द्रको विषयमा विवाद भएपछि आर्थिक वर्ष सकिन लाग्दासम्म पनि गाउँ सभा बस्न सकेको छैन् । गाउँपालिकाले निर्णय लिनुपर्ने महत्वपूर्ण एजेण्डाहरु समेत त्यतिकै थन्किएका छन् ।

जिल्लाका तत्कालीन मोराहाङ, श्रीजुङ र पौठाक गाउँ विकास समितिलाई मिलाएर गठन भएको मेन्छ्यायेम गाउँपालिकाको केन्द्र मोराहाङ बजार तोकिएको थियो । तर मोराहाङ बजार सबैलाई पायक पर्ने ठाउँमा नभएको भन्दै केन्द्र सार्ने या नसार्ने भन्ने विषयमा जनप्रतिनिधि बीचमै विवाद भएको हो ।

६ वडा रहेको गाउँपालिकामा दुई वडाध्यक्षसहित गाउँपालिका अध्यक्षमा विजयी नेकपा एमालेसम्बद्ध जनप्रतिनिधिले मोराहाङ बजारबाहेक अन्यत्र केन्द्र नहुने भनेका छन् भने गाउँपालिका उपाध्यक्ष तथा चार वडाध्यक्षसहित बहुमत पाएको नेपाली कांग्रेसका जनप्रतिनिधिले सबैलाई पायक पर्ने ठाउँमा केन्द्र सार्नुपर्ने विषयमा जोड दिएका छन् ।

कांग्रेस निकट जनप्रतिनिधिले श्रीजुङमा गाउँपालिकाको केन्द्र सार्नुपर्ने माग गरेका थिए । यदि त्यसो नभए पनि मोराहाङ बजारमै नभई बजारभन्दा करिव २ किमि टाढाको डाँडामा गाउँपालिकाको केन्द्र सार्नुपर्ने उनीहरुको माग छ । यता एमालेबाट निर्वाचित जनप्रतिनिधिले मोराहाङ बजार नै गाउँपालिकाको केन्द्र भएको र यसको विकल्प नभएको समेत दाबी गर्दै आएका छन् ।

गाउँपालिकाको विषयमा विवाद भएपछि गाउँ कार्यपालिकाले अहिलेसम्म महत्वपूर्ण निर्णयहरु समेत पारित गरेको छैन । हरेक पटक बस्ने बैठकहरु निर्णयबिहीन बनेर टुंगिने गरेका छन् । अन्य स्थानीय तहमा जनप्रतिनिधिले योजना निर्माण गरेर कार्यान्वयनतर्फ लागिसक्दा पनि यहाँका जनप्रतिनिधिले गाउँसभा समेत गर्न सकेका छैनन् ।

चालु आर्थिक वर्ष सकिन अब ६ महिना मात्रै छ तर गाउँपालिकाले बनाउनै पर्ने योजना, नीति तथा कार्यक्रम नै बनेको छैन । गाउँपालिकाको केन्द्रको विवाद र कर्मचारी अभावले गाउँपालिकाको गाउँसभा गर्न नसकिएको गाउँपालिका अध्यक्ष यादवबहादुर खापुङले बताउनुभयो । गाउँपालिकाका ६ वडामा अहिले दुई जनामात्रै वडा सचिव छन् । एक जना वडा सचिवले नै चार वटासम्म वडा कार्यालयको जिम्मा लिएका छन् ।

गाउँपालिकाको कार्यालयमा प्रशाशकीय अधिकृतबाहेक अन्य कर्मचारी छैनन् । विषयगत कार्यालयतर्फ गाउँपालिकामा स्वास्थ्य र कृषि कार्यालयका १/१ जना कर्मचारी छन् । गाउँपालिकाको केन्द्र जनताको चाहाना बमोजिम स्थानान्तरण गरी विकासलाई जोड दिने विषयमा सहमतिको प्रयास भइरहेको गाउँपालिकाकी उपाध्यक्ष गीतादेवी गौतमले बताउनुभयो ।

गाउँपालिकाको केन्द्र विवादलगायत अन्य विषयमा छलफल गर्न गाउँपालिकाको बैठक बिहीबारदेखि बस्न लागेको छ । बैठकबाट सहमतिको खोजी गरी यही महिनाभित्र गाउँ सभा सम्पन्न गर्ने र विकास निर्माणका काम अघि बढ्ने अध्यक्ष खापुङले बताउनुभयो ।

Mitsubishi

प्रतिक्रिया दिनुहोस

सम्बन्धित सामग्रीहरु

सबै हेर्नुहोस
Skill Training
पछिल्ला समाचारहरु

सोसल मिडिया