काठमाडौं, पुस १३ –दलहरुबीच पछिल्लो समय देखिएको गतिरोध प्याकजेमै सहमति गरेर अन्त्य हुने देखिएको छ ।

बिहीबार बसेको मन्त्रीपरिषदको बैठकमा प्रदेश प्रमुख र अस्थायी राजधानी तोक्ने विषयमा पनि छलफल भएको छ । आइतबार बस्ने मन्त्रीपरिषदको बैठकले सबै दलको सहमतिमा प्रदेश प्रमुख र अस्थायी राजधानी तोक्ने वाणिज्यमन्त्री मीनबहादुर विश्वकर्माले उज्यालो अनलाइनलाई जानकारी दिनुभयो ।

त्यस्तै, राष्ट्रियसभाको गठनसम्बन्धी अध्यादेश पनि सरकारको सिफारिस अनुसार नै जारी हुने सम्भावना देखिएको छ । बिहीबार बिहान मात्रै राष्ट्रपति विद्यादेवी भण्डारी र नेकपा माओवादी केन्द्रका अध्यक्ष प्रचण्डबीच भेटघाट भएको थियो । उहाँहरुको भेटघाटमा राष्ट्रियसभा गठनसम्बन्धी अध्यादेशबारे छलफल भएको बताइन्छ ।

प्रचण्ड सुरुदेखि नै एकल संक्रमणीय पद्वतिप्रति लचक देखिँदे आउनुभएको छ । बुधबार मात्रै एमाले अध्यक्ष केपी शर्मा ओली र माओवादी अध्यक्ष प्रचण्डबीच विशेष भेटवार्ता भएको थियो । त्यसकारण पनि बिहीबारको राष्ट्रपति र माओवादी अध्यक्ष प्रचण्डबीचको भेटघाटलाई अर्थपूर्ण रुपमा हेरिएको छ ।

पछिल्लो समय राष्ट्रियसभाको गठन बहुमतीय कि एकल संक्रमणीय पद्धतिबाट गर्ने भन्ने विषयमा दलहरुबीच विवाद देखिएको छ ।