नेपालगन्ज, पुस १३ –पूर्व राजा ज्ञानेन्द्र शाह झण्डै दुई हप्ताको भ्रमणका लागि बिहीबार नेपालगञ्ज आउनुभएको छ । बिहीबार श्री एयरको विमानमार्फत नेपालगञ्ज विमानस्थल अवतरण गर्दा पूर्वराजा शाहलाई उहाँका समर्थकहरुले स्वागत गरेका थिए ।

राप्रपा नेता ऋषिराज देवकोटाका अनुसार पूर्वराजा शाह  करिव दुई हप्तासम्म नेपालगञ्ज क्षेत्रमा रहनु हुनेछ । उहाँले नेपालगञ्जबाट बर्दिया र सुदूरपश्चिम जाने कार्यक्रम तय गरेको उहाँका सहयोगीले बताएका छन् ।

पूर्वराजा शाहको दुई हप्ता लामो भ्रमणका समयमै नेपालगञ्जको राझामा निर्माण भएको सोल्टी होटलको औपचारिक उद्घाटन गर्ने कार्यक्रमसमेत रहेको छ ।  झण्डै ७० करोडको लगानीमा निर्माण भएको सोल्टी होटलमा पूर्वराजाको समेत लगानी रहेको चर्चा छ ।

पूर्वराजा शाहले पश्चिम नेपालमा रहँदा आप्mना समर्थकसँग समेत आन्तरिक छलफल गर्ने श्रोतले जनाएका छन् । पूर्वराजाका सहयोगीले भ्रमण व्यक्तिगत भएको जानकारी दिएका छन् । यसैगरी शाहले धार्मिक भ्रमणसमेत गर्ने बताइएको छ । पूर्वराजाले नेपालगञ्जको बागेश्वरी मन्दिरको दर्शन गर्ने कार्यक्रमसमेत रहेको छ ।

शाह बेलुका ५ बजे नेपालगञ्ज विमानस्थलमा पुगे पनि समर्थकहरु भने दिउँसो ३ बजे नै स्वागतका लागि विमानस्थल पुगेका थिए । 
पूर्वराजा शाहले मध्य र सुदूरपश्चिमका विभिन्न धािर्मक क्षेत्रको भ्रमण गर्ने कार्यक्रम रहेको छ । भ्रमणमा पूर्वराजाका साथमा  पूर्वरानी कोमल, बुहारी हिमानी र छोरी प्रेक्षा पनि रहनुभएको छ । केही समयदेखि पूर्व राजपरिवारका सदस्य देशका विभिन्न ठाउँको भ्रमणमा निस्किएका छन् ।