भक्तपुर, पुस १३ –नेकपा एमालेले समानुपातिकतर्फ सात वटै प्रदेशसभाका सांसदको टुंगो लगाएको छ ।

एमाले अध्यक्ष केपी शर्मा ओलीको निवास बालकोटमा बिहीबार बसेको एमाले स्थायी समितिको बैठकले सात वटै प्रदेशसभाका सांसदको टुंगो लगाएको नेकपा एमालेका सचिव योगेश भट्टराईले जानकारी दिनुभयो ।

सचिव भट्टराईले भन्नुभयो, ‘छिट्टै नेकपा एमाले र माओवादीबीच पार्टी एकता हुन्छ, यसक्रममा माओवादी केन्द्रका अध्यक्ष पुष्पकमल दाहाल प्रचण्डसँग सकारात्मक कुराकानी भएकोबारे अध्यक्ष ओलीले आजको बैठकमा जानकारी गराउनुभएको छ ।’

उहाँले पार्टी एकता संयोजन समितिको बैठक भोली या पर्सी बसेर एकता प्रक्रियाका अरु सांगठनिक र राजनैतिक नेतृत्व ब्यबस्थापन लगायतका कुरा छलफल गरी टुंगो लगाउने बिश्वास ब्यक्त गर्नुभयो ।

बैठकले प्रदेश सभामा पार्टीको तर्फबाट समानुपातिकमा जाने ७५  जनाको सूचिको अन्तिम टुंगो लगाएको छ । यो सूचि भोली निर्वाचन आयोगमा  बुझाउने बताउँदै सचिव भट्टराईले एमालेको प्रदेश सभामा प्रत्यक्षबाट १६८ जना र समानुपातिक तर्फबाट ७५ जना गरि २४३ जना सदस्यले प्रदेश सभामा प्रतिनिधित्व गर्ने बताउनुभयो ।

उहाँका अनुसार एमालेले प्रतिनिधिसभाको समानुपातिकतर्फको सिट संख्या चाँडो सार्वजनिक गर्न पनि निर्वाचन आयोगलाई आग्रह गरेको छ । भोलि आयोगको कार्यालय पुगेर एमालेले यसबारेमा ध्यानाकर्षण गराउने पनि अधिकारीले जानकारी दिनुभयो । बैठकमा माओवादी केन्द्रसँगको पार्टी एकता, नयाँ सरकार गठन र राष्ट्रियसभा गठनबारेको अध्यादेशका बारेमा पनि छलफल भएको उहाँले बताउनभुयो ।

यस्तै नेकपा माओवादी केन्द्रले पनि समानुपातिकबाट प्रदेशसभामा सांसद बन्नेको नाम टुंगो लगाएको छ । आज बसेको माओवादी केन्द्रको केन्द्रीय बैठकले समानुपातिकबाट प्रदेशसभातर्फका सांसदको टुंगो लगाएको हो ।