MENU

राजनीति

Ncell Axiata
NIC Asia

राष्ट्रियसभा सदस्य चुनाव माघ २५ गते गर्न आयोगको सुझाव

काठमाडौं, पुस १५ – निर्वाचन आयोगले नेपाल सरकारलाई राष्ट्रियसभा सदस्यको चुनाव आउँदो माघ २५ गते गर्न परामर्श दिएको छ । 

सरकारले आयोगको परामर्शमा चुनावको मिति घोषणा गर्ने संवैधानिक व्यवस्थानुरुप आयोगले राष्ट्रियसभा सदस्य चुनावका लागि माघ २५ को मितिको परामर्श दिएको आयोग स्रोतबाट थाहा भएको छ ।  प्रधानमन्त्री शेरबहादुर देउवासँग उहाँको सरकारी निवास, बालुवाटारमा प्रमुख निर्वाचन आयुक्त डा. अयोधीप्रसाद यादवसहितको आयोगको टोलीले  भेटेर यथाशीघ्र मिति घोषणा गर्न आग्रह गरेको थियो ।

यद्यपि सरकारले राजनीतिक दलसँग छलफल गरी मन्त्रिपरिषदको आगामी बैठकपछि चुनावको मिति घोषणा गर्ने तयारी गरिरहेको बुझिएको छ । राष्ट्रियसभा चुनावका लागि सात प्रदेश राजधानीमा निर्वाचन केन्द्र तोक्ने  तयारी आयोगले गरेको छ ।

राष्ट्रियसभा चुनावका लागि प्रदेशसभाका ५५० सदस्य तथा ७५३ स्थानीय तहका प्रमुख र उपप्रमुख एक हजार ५०६ गरी दुई हजार ५६ जना मतदाता रहनुहुनेछ । प्रदेश राजधानी रहेको जिल्लाका जिल्ला न्यायाधीशलाई आयोगले निर्वाचन अधिकृत तोक्नेछ । यो चुनावका लागि गाउँपालिका अध्यक्ष र उपाध्यक्ष तथा नगरपालिकाका  प्रमुख र उपप्रमुखको मतभार १८ तथा प्रदेशसभाका सदस्यको मतभार ४८ कायम गरिएको छ ।

राष्ट्रियसभामा प्रत्येक प्रदेशबाट तीन महिला तथा एक एक दलित र अपाङ्गता वा अल्पसंख्यकसमेत गरी आठ आठ जनाका दरले ५६ जना निर्वाचित हुने संवैधानिक व्यवस्था छ ।

उनान्साठी सदस्यीय राष्ट्रियसभामा सरकारको सिफारिशमा राष्ट्रपतिबाट एक महिलासहित तीनजना मनोनयन गर्ने व्यवस्था  छ । विद्यमान संवैधानिक व्यवस्थानुरुप राष्ट्रियसभामा २२ महिलाको प्रतिनिधित्व हुनेछ । रासस

 

प्रतिक्रिया दिनुहोस

सम्बन्धित सामग्रीहरु

सबै हेर्नुहोस
Skill Training
पछिल्ला समाचारहरु

सोसल मिडिया