काठमाडौं, पुस १६ –प्रदेशसभामा समानुपातिकतर्फबाट सांसद बन्नेहरुको नाम पठाउँदा दलहरुले नियम मिचेकाले विजयी घोषणा गर्न समय लाग्ने भएको छ । दलहरुले पठाएको नामावलीमा केही दलले बन्दसूची भित्रबाट नाम छान्दा क्रम संख्या र नियम मिचेको पाइएपछि निर्वाचन आयोगले दललाई नाम सच्याउन समय दिने तयारी गरेको छ ।

दलहरुले आयोगमा पठाएका प्रतिनिधि समानुपातिक, समावेशी तथा क्रम अनुसार भए नभएको छानबिन गर्दा केही दलले क्रम संख्या र नियम मिचेको पाइएपछि त्यसको लागि छलफल भैरहेको छ । आयोगका प्रवक्ता दिनेशकुमार घिमिरेका अनुसार समानुपातिकको सूची बुझाएका केही दलले ३३ प्रतिशत महिला नपुर्‍याएको, क्लस्टर अनुसार नभएको र क्रम संख्या मिचेर पठाएका छन् ।

यसरी पठाइएको नामावली आयोगले स्वीकार नगर्ने उहाँले जानकारी दिनुभयो । दलहरूले पठाएको नामावलीमा प्रारम्भिक छानबिन गर्दा महिलाको ठाउँमा पुरुष राखिएको र ऐनले व्यवस्था गरेको क्लस्टर अनुसार नभएकाले बन्दसूचीमा रहेको क्रम संख्या अनुसार नै नामावली फेरि पठाउन आयोगले दलहरुलाई तीन दिनको समय दिने तयारी गरेको छ । 

दलहरूले महिला, दलित, आदिवासी जनजाति, खस आर्य, मधेसी, थारु, मुस्लिमको आरक्षण प्रतिशत नपुर्‍याए आयोगले कानुन अनुसार पुर्‍याउनेछ ।