MENU

समाज

युवालाई व्यावसायिक बनाउन तरकारी र नगदे बालीमा अनुदान

कञ्चनपुर, पुस १६ – विपन्न वर्गलाई स्वरोजगार बनाउनका लागि कञ्चनपुरको लालझाडी गाउँपालिकाको कृषि शाखाले व्यावसायिक तरकारी खेतीका लागि चार लाख ४० हजार रुपैयाँ अनुदान रकम प्रदान गरेको छ । 

विपन्न र सीमान्तकृत समुदायको जीवनस्तर माथि उठान युवा स्वरोजगार कार्यक्रमअन्तर्गत गाउँपालिकाका ६ वटै वडाका ११ युवालाई ४० हजारका दरले अनुदान रकम प्रदान गरिएको हो । 

“१८ देखि ५० वर्ष मुनिका व्यक्तिलाई स्वदेशमै रोजगारीको अवसर सिर्जना गरी आत्मनिर्भर बनाउनका लागि अनुदान रकम प्रदान गरेका छौँ”, कृषि शाखाका प्रमुख एकराज वलीले भन्नुभयो । 

अनुदान रकम परिचालन गरी पाँच बिगाहा भन्दाबढी जग्गामा काउली, बन्दागोभी, खुर्सानी, आलु, बेमौसमी काँक्रालगायतको खेती गरिएको छ ।

यसैगरी, प्रधानमन्त्री आधुनिकीकरण परियोजनाअन्तर्गत गाउँपालिकामा ८ वटा तरकारी, अन्न र नगदे बालीका पकेट क्षेत्र सञ्चालन गरिएको छ । प्रतिपकेट क्षेत्र सञ्चालनका लागि तीन लाखका दरले गरी २४ लाख रकम परिचालन गरिएको छ । 

पकेट सञ्चालन भएका क्षेत्र र युवा स्वरोजगार कार्यक्रम सञ्चालन भएका किसानलाई सिँचाइको सुविधा उपलब्ध गराउनका लागि गाउँपालिकाले साना सिँचाइ कार्यक्रमअन्तर्गत बोरिङ जडानका लागि १० वटा समूहलाई ६० हजारका दरले रकम उपलब्ध गराउने योजना अघि सारेको शाखा प्रमुख वलीले बताउनुभयो । जनप्रतिनिधि आएपछि मात्रै गाउँपालिकामा व्यावसायिक तरकारी खेती र नगदेबालीका लागि अनुदान रकम उपलब्ध गराइएको पहिलोपटक हो । 

अनुदान रकमको सदुपयोग गरी युवाले स्वदेशमै रोजगारी पाउने र व्यावसायिक बनी आर्थिक अवस्थामा सुधार ल्याउने छन् गाउँपालिकाका प्रमुख मदनसेन वडायकले भन्नुभयो, “कार्य गर्न उत्साही युवालाई सहयोग गर्न सधैँ तत्पर रहेका छौँ ।” 

Mitsubishi

प्रतिक्रिया दिनुहोस

सम्बन्धित सामग्रीहरु

सबै हेर्नुहोस
Skill Training
पछिल्ला समाचारहरु

सोसल मिडिया