बाँके, पुस १७ –पश्चिम तराईका जिल्लामा अवधी भाषामा पाठ्यक्रम निर्माणको तयारी सुरु भएको छ । अवधी भाषाका पाठ्यक्रम सामग्री निर्माणका विषयमा नेपालगञ्जमा अवधी क्षेत्रको नक्साङ्कन गरिएको छ । विश्व शिक्षाको सहकार्यमा बाँके युनेस्को क्लबले आयोजना गरेको कार्यशालामा अवधी भाषाविज्ञ, शिक्षक, साहित्यकार तथा अगुवाहरुको सहभागितामा अवधी भाषाको नक्साङ्कन गरिएको हो ।

नेपालमा अवधी भाषा बोल्ने र बस्ने स्थानका विषयमा छलफल गरी विभिन्न ११ चरण पूरा गरी नक्साङ्कन गरिएको क्लबका अध्यक्ष परबेज अली सिद्दिकीले बताउनुभयो । पश्चिम नेपाल नवलपरासीदेखि कञ्चनपुर जिल्लासम्म अवधी भाषीको भौगोलिक क्षेत्र रहेको छ । बाँके जिल्लालाई केन्द्र मानी अवधी भाषामा बालबालिकाहरुका लागि पाठयक्रम तयार पारिनेछ ।

नक्साङ्कनपछि अब विद्युतीय सफ्टवेयरमा पाठयक्रम निमार्णको कार्य सुरु हुने सिद्दिकीले बताउनुभयो । पाठयक्रम तयार भएपछि कक्षा १, २ र ३ का विद्यार्थीहरुलाई आफ्नै मातृ भाषामा पढ्न, लेख्न र सिक्न सहजता हुनेछ । कार्यक्रममा बाँकेका सहायक जिल्ला शिक्षा अधिकारी गोरखबहादुर थापाले मातृ भाषाको पाठ्यक्रमले अवधी भाषी बालबालिकालाई बढी उपयोगी हुने बताउदै यसले उनीहरुको सुरुवाति सिक्ने आधार बलियो हुने बताउनुभयो ।