काठमाडौं, पुस १८ –नेकपा एमालेका वरिष्ठ नेता माधवकुमार नेपालले एमाले र माओवादीबीच पार्टी एकता भएरै छाड्ने दाबी गर्नुभएको छ । 

बुधबार रिपोर्टस क्लब नेपालले गरेको साक्षात्कार कार्यक्रममा बोल्दै नेता नेपालले आवश्यकताअनुसार सबै नेताको व्यवस्थापन गरेर पार्टी एकता गरिने बताउनुभयो । 

८ करोड सदस्य भएको चिनियाँ कम्युनिष्ट पार्टीको केन्द्रीय सदस्य २ सय जना, पोलिटब्यूरो सदस्य २१ भएको उदाहरण दिँदै उनले नेपालमा पनि सानो कमिटि बनाएर ठूलो काम गर्न सक्ने गरी अघि बढ्नुपर्ने नेपालले बताउनुभयो । 

भियतनामको कम्युनिष्ट पार्टीको समेत उदाहरण दिँदै नेपालले भन्नुभयो, ‘पदका लागि मारामार गर्ने होइन । संगठनात्मक संरचना बनाएर नेता व्यवस्थापन गर्नुपर्छ । त्यसपछि महाधिवेशनको मिति तोकेर नयाँ नेतृत्व चयन गर्नुपर्छ ।’ 

नेकपा एमालेमा त्यागको भावना रहेको बताउँदै उहाँले पदीय भागबण्डाका आधारमा एकता प्रभावित नहुने पनि दाबी गर्नुभयो । 

एमाले र माओवादीबीच लडाई होला र फाइदा उठाउँला भनेर कांग्रेस दाउ हेरेर बसेको बताउँदै नेपालले आफूहरु परिपक्व भएकाले त्यस्तो दाउ नहेर्न नेपालले  सुझाव दिनुभयो । उहाँले वाम एकतालाई फुटाएर कांग्रेसले सरकारमा जाने दिवा सपना देखेको आरोप लगाउनुभयो ।

चुनावबाट एमाले ठूलो पार्टी बनेकाले माओवादीले त्यही अनुसार सोचेको उहाँको भनाई थियो । ‘अनावश्यक प्रचार र दवाव सृजना गरेर केही हुँदैन । प्रधानमन्त्रीका लागि कुनै समस्या छैन’ नेपालले भन्नुभयो, ‘दाहाल, ओली, खनाल, बामदेव, नारायणकाजी, बादल सबैको उचित र न्यायसंगत व्यवस्थापन हुन्छ ।’