MENU

अन्तर्राष्ट्रिय

Ncell Axiata

‘ट्रम्पको मानसिक स्वास्थ्यमा प्रश्न’

पुस २२ – अमेरिकी विदेश मन्त्री रेक्स टिल्लर्सनले राष्ट्रपति डोनाल्ड ट्रम्पको मानसिक अवस्था राम्रो रहेको बताउनुभएको छ । ट्रम्प र उहाँको प्रशासनका बारेमा पत्रकार माइकल वुल्फीले लेखेको पुस्तकमा ट्रम्पलाई ह्वाइटहाउका कर्मचारीले बच्चा जस्तो देखेको बताएपछि टिल्लर्सनको यस्तो भनाई आएको हो ।

राष्ट्रपति ट्रम्पको मानसिक स्वास्थ्य राम्रो रहेको र यस विषयमा प्रश्न गर्नुपर्ने अवस्था नरहेको रक्षामन्त्री टिल्लर्सनको भनाई छ । उहाँले सिएनएनसँगको कुराकानीमा राष्ट्रपति ट्रम्पको मानसिक स्वास्थ्यका बारेमा प्रश्न गर्नु पर्ने कुनै कारण आफूले नदेखेको बताउनुभएको छ ।

पत्रकार माइकल वुल्फले ट्रम्प प्रशासन सम्बन्धी पुस्तक ‘फायर एण्ड फ्यूरी ः इनसाइड द ट्रम्प ह्वाइट हाउस’ झण्डै २०० जनासँगको अन्तर्वार्तापछि लेखिएको बताउनुभएको छ । राष्ट्रपति ट्रम्पका वकिलहरुले पुस्तक बजारमा जानबाट रोक्ने प्रयास सुरु गरेका पछि तोकिएको समय भन्दा चार दिन अघि नै पुस्तक सार्वजनिक भएको छ । पुस्तकमा राष्ट्रपति ट्रम्पको ह्वाइट हाउस यात्रा र त्यसपछिका विभिन्न पक्षका बारेमा खुलाइएको छ ।

पुस्तकमा स्टीभ बेननसहितका ट्रम्पका पूर्व सहयोगीले ट्रम्प प्रशासनका बारेमा गोप्य कुरा खुलाएका छन् । यसले ट्रम्प प्रशासन समस्यामा परेको छ । यहि कारण राष्ट्रपति ट्रम्पका कानुन व्यवसायीहरु यो पुस्तक बजारमा जानबाट रोक्ने उपयाको खोजीमा लागेका थिए । यो बुझेर प्रकाशकले शुक्रबार नै पुस्तक बजारमा ल्याएका छन् । पुस्तक लिनका लागि पसलमा लामो लाइन लागेको छ । राष्ट्रपति ट्रम्पले पुस्तकमा विश्वास गर्ने कुनै आधार नरहेको र यो झुठको संग्रह रहेको दाबी गर्नुभएको छ ।

बेननले अमेरिकी राष्ट्रपति चुनावमा रुसी हस्तक्षेपका बारेमा पत्रकार माइकल वुल्फको किताबमा बताएका छन् । हिलारी क्लिन्टनका बारेमा डोनाल्ड ट्रम्पका छोरालाई रुसी अधिकारीले सन् २०१६ को जुनमा भएको भेटमा जानकारी दिएको बेननले बताएका हुन् । रुसी अधिकारीसँगको ट्रम्प जुनियरको भेट गैरकानुनी रहेको बेननले पुस्तकमा बताएका छन् । सन् २०१६ मा भएको राष्ट्रपति चुनावमा ट्रम्पलाई जिताउन बेननको महत्वपूर्ण हात रहेको अमेरिकी सञ्चारमाध्यम तथा विश्लेषकले बताउने गरेका छन् ।

ट्रम्पले चुनाव जितेपछि पनि बेनन ह्वाइटहाउसको सल्लाहकार तथा सहयोगको रुपमा रहनुभएको थियो । प्रमुख रणनीतिक सल्लाहकारको रुपमा रहनुभएका बेननलाई राष्ट्रपति ट्रम्पले गएको अगस्टमा बर्खास्त गर्नुभएको थियो । आफ्नो बारेमा गम्भीर खुलासा गरेपछि ट्रम्पले बुधबार वक्तव्य जारी गरेर बेननको आरोपको खण्डन गर्दै बेनन र आफ्नो राष्ट्रपति चुनावमा उम्मेदवारीबिच कुनै सम्बन्ध नरहेको दाबी गर्नुभएको छ । बेननले आफू बर्खास्त भएका बेला होस पनि गुमाएको र बेहोसीमा नचाहिने कुरा बोल्दै हिँडेको ट्रम्पले आरोप लगाउनुभएको छ । तर गएको अगस्टमा बेननलाई खर्बास्त गर्ने बेलामा ट्रम्पले बेननलाई धन्यवाद दिँदै आफ्नो चुनावी अभियानमा ठूलो सहयोग गरेको बताउनुभएको थियो । विवादास्पद बनेको पत्रकार वुल्फको पुस्तकमा ट्रम्पले राष्ट्रपति चुनाव अप्रत्यासित रुपमा जितेको पनि उल्लेख गरिएको छ ।

विवादका बिच प्रशासकले पुस्तक शुक्रबार सार्वजनिक गरेको हो । आउँदो मंगलबार सार्वजनिक हुने भनिएको पुस्तक चार दिन अघि नै सार्वजनिक भएको हो । पत्रकार वुल्फले पुस्तकमा ट्रम्पको टिम चुनावमा पाएको जितबाट आश्चर्यमा परेको तथा तर्सिएको, ट्रम्पकी श्रीमती मिलानिया चुनावको रात निकै निराश रहेको, आफ्नो शपथग्रहणमा ए–लिस्टका कलाकार नआएकोमा ट्रम्प रिसाएको, ट्रम्प ह्वाइट हाउसमा डराएको, ट्रम्पकी छोरी इभान्काले आफू पनि राष्ट्रपति बन्ने सपना देख्न थालेको सहितका दाबी गरिएको छ । 

 

प्रतिक्रिया दिनुहोस

सम्बन्धित सामग्रीहरु

सबै हेर्नुहोस
Skill Training
पछिल्ला समाचारहरु

सोसल मिडिया