श्यामशितल परियार/उज्यालो ।

लमजुङ, पुस २३–कुनै सभा, समारोह, सम्मान, स्वागतलगायत औपचारिक तथा अनौपचारिक कार्यक्रममा फूलमाला र खादाले सम्मान गर्ने परम्परा छ नेपाली समाजमा । 

कुनै पनि कार्यक्रम सञ्चालनका लागि अतिथिको स्वागत तथा सम्मानका लागि ब्याच र खादामा खर्च गर्ने परम्परा बिस्तारै फस्टाउँदै छ । तर स्थानीय स्तरमै उपलब्ध हुने फूलका साथै  पीपलको पातले पनि अतिथि सत्कार गर्न सकिने संस्कार स्थापित गरेका छन् लमजुङ कृषि क्यापसका विद्यार्थीहरुले । स्थानीय स्तरमै सहजै पाइने पीपलको पातलाई ब्याचको रुपमा प्रयोग गर्न सकिने उनीहरु बताउँछन् ।

जिल्ला कृषि विकास कार्यालय लमजुङका प्रमुख कृष्णभद्र अधिकारीलाई कुनै कार्यक्रममा अतिथि भएर जाँदा आयोजकले दिएको रङ्गीचङ्गी कपडाकामाझ कागजमा अतिथि लेखिएको ब्याज छातीमा टाँसेको याद छ । तर लमजुङ कृषि क्याम्पसको सभाहलमा आयोजित एक कार्यक्रममा अतिथिको रुपमा जाँदा उहाँले अतिथि सत्कारमा नौलोपन पाउनुभयो ।

मञ्चमा बसेका अतिथिहरुलाई क्याम्पसका विद्यार्थीहरुले पीपलको पातमा ‘टिपेक्स’ले अतिथि लेखेको ब्याच हातमा थमाए । अतिथिहरुले ब्याच छातीमा सजाए । पीपलको पातबाटै अतिथि सत्कारको नयाँ संस्कार उहाँलाई मन पर्यो । केही नौलो लाग्यो । अतिथि सत्कारको यो नयाँ संस्कारलाई धेरैले राम्रो माने पनि ।

‘कृत्रिम ब्याच खरिद गर्दा खर्च हुन्छ, स्थानीय स्तरमै पाइने पीपलको पातलाई ब्याचको रुपमा प्रयोग गर्दा पैसा पनि कम लाग्ने, समयको पनि बचत हुने हेर्दा पनि राम्रो देखिने,’ कृष्णभद्रले भन्नुभयो ।

नेपाली समाजमा पीपललाई धार्मिक महत्वको रुपमा लिइन्छ । पीपललाई पवित्र मानिन्छ । पीपलको पातलाई अतिथि सम्मानका लागि ब्याचको रुपमा प्रयोगमा ल्याइनु आफैँमा राम्रो रहेको सुन्दरबजार नगरपालिकाकी उपमेयर ज्ञान शाहले बताउनुभयो ।

कुनै पनि कार्यक्रममा अतिथि सम्मान तथा स्वागतका लागि गाउँघरमै पाइने फूलको पनि उपयोग गर्न सकिने सरोकारवालाहरु बताउँछन् । स्थानीय रुपमा सहजै उपलब्ध हुने फूलको प्रयोग गर्न सके ब्याचमा खर्च हुने रकम जोगिने र कार्यक्रम कम पैसामा सम्पन्न गर्न सकिने सरोकारवालाहरु बताउँछन् ।

‘पीपलको पातमा टिपेक्सले अध्यक्ष, प्रमुख अतिथि, विशेष अतिथि, अतिथि सहभागी लेखी ब्याचको रुपमा प्रयोग गर्न सकिन्छ, पीपलको पातलाई ब्याचको रुपमा प्रयोग गर्दा पैसा र समय दुवैको वचत हुन्छ, यसको फाइदाफाइदै छ, त्यसैले हामीले विभिन्न कार्यक्रममै यसकै प्रयोग गर्दै आएको छौँ,’ लमजुङ कृषि क्याम्पसमा अध्ययनरत विद्यार्थी दीपक खनालले भन्नुभयो ।