वैशाख २ – क्यानडाको टोरन्टोको एक कम्पलेक्समा १२ जना मादल बजाएर नेपाली गीत गाइरहेका थिए । नयाँ वर्षको अवसर पारेर आयोजना गरिएको मादलमय कार्यक्रम आयोजना गर्नुको मुख्य कारण भनेको नेपाली मादललाई क्यानडामा चिनाउनु रहेको थियो । 

नेपाली नयाँ वर्ष २०७५ को सन्दर्भ पारेर टोरोन्टोमा नयाँ वर्षको भव्य स्वागत गरियो । नयाँ वर्षको अवसर पारेर आयोजना गरिएका एक दर्जन बढी कार्यक्रममा एनआरएनएले क्यानडामा मादलमय नयाँ वर्ष मनाएको हो । एनआरएनए क्यानडा, सिर्जनशिल नेपाली समाज, एनसीसीएसले छुट्टा छुट्टै आयोजना गरेको कार्यक्रममा मादलको प्रस्तुती विशेष बन्यो । 

एकै चोटी १२ जनाले मादल बजाई रहँदा नेपाली लोक भाकाहरुले टोरोन्टोका नेपालीलाई मात्र हौँस्याएन त्यहाँ टोरोन्टोका क्यानेडियनलाई समेत उत्साहित बनाएको एनआरएनएका सांस्कृतिक संयोजक सानुराजा महर्जनले जानकारी दिनुभयो ।

यसै सन्दर्भमा नेपाली नयाँ वर्ष २०७५ को सन्दर्भमा क्यानडाका प्रधानमन्त्री जस्टिन ट्रुडोले शुभकामना व्यक्त गर्दै क्यानडामा रहेका नेपाली समुदायले आफ्नो भाषा, संस्कृति र परम्परालाई निरन्तरता दिएकोमा खुसी व्यक्त गरे । 

उनले क्यानडा बहुसांस्कृतिक देश भएकाले यसमा नेपाली समुदायको पनि उत्तिकै स्थान रहेको  र क्यानडा सरकारले नेपाली समुदायको सँधै हित चाहेको बताए ।