काठमाडौं, वैशाख ३ – डाक्टर शहरमुखि मात्र भएको गाउँ जानै नमानेको गुनासो नयाँ होइन । गाउँमा डाक्टर नपुग्दा धेरै विरामीले उपचारको अभावमा ज्यान गुमाउनुपरिरहेको छ । शहरका सुविधासम्पन्न अस्पतालमा बग्रेल्ती भेटिने डाक्टर गाउँमा भेटिदैनन् । 

तर यसो भन्दैमा गाउँमा डाक्टर जानै चाहँदैनन् भन्दा अन्याय हुन्छ । केही डाक्टरले दुर्गम क्षेत्रमै पुर्णकालीन रुपमा सेवा पुर्याइरहेका छन् भने केही शहरमा बढी केन्द्रित भए पनि केही समय बचाएर विरामीको जाँच गर्न गाउँ पुग्ने गरेका छन् ।

त्यसैमध्येका एक हुनुहुन्छ डाक्टर मनोरदिन सैयद । उहाँ महिनामा कम्तिमा पनि एकपटक काठमाडौंबाहिरका गाउँमा पुगेर विरामीको उपचार गर्नुहुन्छ । गाउँगाउँमा पुगेर सेवा दिन पाउँदा आनन्द मिल्ने उहाँ बताउनुहुन्छ । 

उहाँले भर्खरै धादिङका विकट ठाउँमा दुईपटक निशुल्क स्वास्थ्यशिविर सञ्चालन गर्नुभएको छ । शिविरमा उपचारका लागि पुगेकी ९० वर्षीया बिरामीलाई आफू कार्यरत मनमोहन अस्पताल स्वयम्भूमा निःशुल्क उपचारका लागि पहल गर्ने बताउनुभएको छ । 

शिविरमा डाक्टर सैयदसँगै डाक्टरहरु श्यामेन्द्र सिंह, रन्जु पौडेल, ज्योति तामाङ, गणेश कार्की, सुवर्ण रिमाल लगायतले सेवा दिनुभएको थियो ।