कपिलवस्तु –  बाैद्ध धर्मको पवित्र ग्रन्थ त्रिपिटकका बारेमा प्रचार प्रसार गरी ३ दिने अन्तराष्ट्यि त्रिपिटक पाठ कार्यक्रम शुक्रवार साँझ सम्पन्न भएको छ । 

यस कार्यक्रमबाट संसारभरका बौद्धमार्गीहरुमा बुद्ध जन्म स्थल लुम्विनीको महिमा र लुम्विनीको प्रचार भएको लुम्बिनी विकास कोषका का.मु. सदस्य सचिव सरोज भट्टराईले बताउनु भयो । 

बौद्ध धर्मको पवित्र ग्रन्ध त्रिपिटक नेपालका महायान सम्प्रदाय, हिमाली लामा, चीन, जापानी, भियतनामी, कम्बोडिया, थाईलैण्ड, श्रीलंका, म्यानमार, क्यानाडा लगायत १८ देशका ५ सय बढी भिक्षु भिक्षुणीहरुले ३ दिन सम्म पाठ गरेका थिए । 

लुम्बिनीको मायादेवी मन्दिरसँगैको पवित्र बगैंचामा आयोजना गरिएको त्रिपिटक पाठ कार्यक्रममा ५ सयभन्दा बढी उपासकहरुकोसमेत उपस्थिति रहेको लुम्बिनी विकास कोषका कार्यकारिणी सदस्य राजेश ज्ञवालीले बताउनु भयो ।   

कार्यक्रम निकै फलदायी भएको र बौद्ध राष्ट्हरुले पनि यसलाई निकै महत्वका साथ लिएको अखिल नेपाल भिक्षु महासंघका अध्यक्ष भिक्षु मैत्रेयले बताउनु भयो ।

नेपालमा पहिलो पटक गरिएको यो कार्यक्रम अब हरेक वर्ष संचालन गरिने भिक्षु मैत्रेयले कार्यक्रम समापन समारोहका अवसरमा घोषणा गर्नु भएको छ । 

नेपालमा पहिलो पटक आयोजना गरिएको यो कार्यक्रम भारतका विभिन्न बौद्ध स्थलहरुमा बर्सेनि हुदै आएको छ ।