काठमाडौँ – आइतबार र सोमबार उकालो लागेको शेयर बजार मंगलबार भने दोहोरो अङ्कले घटेको छ ।

नेपाल स्टक एक्सचेञ्जकाअनुसार कारोबार मापक नेप्से परिसूचक १४ दशमलव ६१ बिन्दुले घटेर एक हजार १ सय ६८ दशमलव १७ बिन्दुमा झरेको छ । ‘क’ वर्गका कम्पनीको कारोबार मापन गर्ने सेन्सेटिभ परिसूचक तीन दशमलव शून्य चार बिन्दुले घटेर २ सय ४८ दशमलव ५९ बिन्दुमा पुगेको छ ।

स्टककाअनुसार मंगलबार कूल १ सय ५९ कम्पनीको १४ लाख ७८ हजार ७ सय २४ कित्ता शेयर रु ५३ करोड २३ लाख २५ हजार ६ सय ४६ मूल्यमा खरीद बिक्री भए । कारोबार भएका दश उपसमूहमध्ये मंगलबार आठ उपसमूहको शेयर ओरालो लागेका छन् भने दुई उपसमूहको शेयर वृद्धि भएको छ । उत्पादन नौ दशमलव तीन एक र अन्य पाँच दशमलव ३८ बिन्दुले बढेको छ ।

यस्तै बैंकिङ १५ दशमलव ६४, होटल पाँच दशमलव ५४, विकास बैंक २० दशमलव ७२, जलविद्युत् १६ दशमलव १४, वित्त शून्य दशमलव तीन छ, निर्जीवन बीमा १९२ दशमलव ३२, लघुवित्त १८ दशमलव ४८ र जीवन बीमा ४९ दशमलव ९३ बिन्दुले घटेका छन् । घटेको बजारमा समिट माइक्रोफाइनान्स डेभलपमेन्ट बैंक, सिभिल लघुवित्त वित्तीय संस्था, महिला सहयात्रा माइक्रोफाइनान्स वित्तीय संस्था र स्वदेशी लघुवित्त वित्तीय संस्थाका शेयरधनीले कमाएका छन् । 

यस्तै विजय लघुवित्त वित्तीय संस्था, रैराङ हाइड्रो पावर, स्वरोजगार लघुवित्त विकास बैंक र युनाइटेड इन्स्योरेन्स कम्पनीका लगानीकर्ताले गुमाएका छन् ।