बर्दिया बाँसगढी नगरपालिकाकी जुबेदा खातून छोरीसँगै क्याम्पस पढ्नुहुन्छ । बिहान सबेरै घरधन्दा सकेर आमाछोरी साइकल चढेर ५ किलोमिटर टाढाको क्याम्पस पुग्छन् । 

छोरी र छोरीको उमेर सरहका साथीहरुसँग जुबेदा मन लगाएर पढ्नुहुन्छ । उहाँको पढ्ने इच्छाशक्ति देखेर शिक्षकहरुसमेत दंग पर्छन् ।

जुबेदाले बिहेअघि ७ कक्षासम्म पढ्नुभएको थियो । पढ्ने इच्छा बाँकी छँदै बिहे गर्न बाध्य हुनुभएकी उहाँले बिहेपछि पढाईलाई निरन्तरता दिनुभयो । फेरि ७ कक्षामै भर्ना भएर पढ्न थाल्नुभएकी उहाँ अहिले १२ कक्षामा पुग्नुभएको छ । 

उहाँलाई पहिलेदेखि नै धेरै पढ्ने इच्छा थियो । तर आमाबुवाले स्कुल पठाउँदैनथिए । उहाँ भागेर स्कुल जानुहुन्थ्यो । साथीहरुको किताब हेरेर पढ्नुहुन्थ्यो । 

किताबमा पढेको कथाबाट उहाँले पढ्नुपर्छ भन्ने प्रेरणा पाउनुभयो । उहाँलाई अहिले घरपरिवारको पनि साथ छ ।