गाजामा सामूहिक चिहान भेटिएको घटनाबारे स्वतन्त्र छानबिन गर्न र...
बैशाख १२, २०८१ बुधबार
बैतडी – न्यायिक समितिलाई प्रभावकारी बनाउन बैतडीको पुरचौंडी नगरपालिकाले न्यायिक समितिको अलगै कार्यालय बनाएको छ ।
न्यायिक समितिले प्रदान गर्ने सेवालाई प्रभावकारी बनाउने र न्यायिक समितिको काम कारबाहीका बारेमा सबैलाई जानकारी दिनका लागि अलगै कार्यालयको व्यवस्था गरिएको न्यायिक समितिको संयोजक जानकी बमले बताउनुभयो ।
समितिका लागि कार्यपालिकाबाट निर्णय गरेर एकजना कर्मचारीको समेत व्यवस्था गरिएको उहाँले बताउनुभयो । न्यायिक समितिमा आएका मुद्दालाई किनारा लगाउन प्रहरी चौकीमा जानुपर्ने बाध्यताको अन्त्य गर्दै न्यायिक समितिको कार्यालय स्थापना गरेको उहाँले बताउनुभयो । न्यायिक समितिमा छिट्टै कानुनी सल्लाहकार राख्ने तयारी समेत भइरहेको उहाँले बताउनुभयो ।
यस्तै जिल्लाका अन्य स्थानीय तहहरुले समेत इजलास निर्माण र कानुनी सल्लाहकार राख्ने तयारी गरेका छन् । न्यायिक समितिका कामलाई प्रभावकारी बनाउनका लागि कानुनी सल्लाहकार राख्ने तयारी भएको दशरथचन्द नगरपालिकाका न्यायिक समिति संयोजक मीना चन्दले बताउनुभयो ।
नेपालको संविधानको धारा २१७ मा आफ्नो अधिकार क्षेत्रभित्रका विवाद निरुपण गर्नका लागि न्यायिक समिति रहने व्यवस्था गरिएको छ । स्थानीय तहका उपप्रमुखको संयोजकत्वमा रहने समितिले स्थानीयस्तरमै न्याय दिनका लागि समितिको प्रावधान राखिएको हो ।
बैतडीमा न्यायिक समितिमा धेरैजसो घरेलुहिंसाका मुद्दाहरु आउने गरेका न्यायिक समिति संयोजकहरुले बताएका छन् ।