गण्डकी प्रदेश : हरिबहादुर चुमानलाई आर्थिक मामिला र दीपक मना...
बैशाख ८, २०८१ शनिबार
समुद्र र हामी
मध्यरातमा एक दिन समुद्र
हाम्रो गाउँमा पाहुना लाग्न आएपछि
ऊ गाउँ बन्यो
हामी समुद्र बन्यौं
र बग्यौँ अनन्तरित ।
हामी कहिल्यै घर फर्केनौँ, त्यसपछि ।
.....................................................
मान्छे र समुद्र
एक पल्लामा हाँसो
र अर्को पल्लामा आँसु राखेर
चित्रगुप्त हेरिरहेछ तराजु ।
यस बेला,
विज्ञान बिर्सेर ऊ सम्झिरहेछ एउटा सम्भावना —
कि श्रृष्टिमा पहिले मान्छे आयो
अनि मात्रै समुद्रहरू ।
..........................................................
पहाड, नदी र म
त्यो पहाड
नडगेरै अजर–अमर भयो,
यो नदी
नजमेर नै अजर–अमर भयो ।
म भने, न जम्दा पहाड बनें,
न बग्दा नदी ।
.............................................................
रुख र हामी
पहाडजस्तै पुरानो त्यो रुख
र हामी
सगैँ लडेका हौँ, जमिनमा ।
हामी अतीतको गर्तमा एक अकथा बनेर हरायौँ
रुखले फेरि पालुवा फेर्यो
र बोलायो फेरि अर्कोे एउटा वसन्त ।
.......................................................
- लामाे समयदेखि अंग्रेजी साहित्य प्राध्यापन गरिरहेका कवि, कथाकार, उपन्यासकार तथा समालाेचक महेश पाैड्यालकाे आइतरबार विमाेचित हुँदै गरेकाे कविता सङ्ग्रह ‘शून्य प्रहरको साक्षी’ बाट
पाैड्याल त्रिभुवन विश्वविद्यालय, अंग्रेजी केन्द्रीय विभागका उपप्राध्यापक हुनुहुन्छ । उहाँ कवि, कथाकार, उपन्यासकार तथा समालाेचकका रुपमा चिनिनुहुन्छ ।