तातोपानी नाका खुल्ने पक्का भइसक्याे: पूर्वमन्त्री सापकाेटा

 बैशाख ८, २०७६ आइतबार १६:२७:४६ | उज्यालो सहकर्मी
unn.prixa.net

काठमाण्डौ - सत्तारुढ नेपाल कम्युनिष्ट पार्टी (नेकपा)का नेता एवम् पूर्वमन्त्री अग्निप्रसाद सापकोटाले तातोपानी नाका खुल्ने सुनिश्चित भइसकेको बताउनुभएको छ । 

सिन्धुपाल्चोकका प्रतिनिधिसभाका सांसदसमेत रहनु भएका नेता सापकोटाले प्रधानमन्त्री केपी शर्मा ओली र पार्टी अध्यक्ष पुष्पकमल दाहालको प्रयासमा तातोपानी नाका खोल्ने कुरा सुनिश्चत भइसकेको बताउनु भएको हो । आइतबार काठमाण्डौमा आयोजित एक कार्यक्रममा उहाँले भूकम्पपछि बन्द रहेको सो नाका खुलाउन आफूले सांसदको रुपमा ठूलो प्रयास गरेको पनि बताउनुभयो ।

राष्ट्रका लागि करोडौंको राजस्व संकलन हुने र सिन्धुपाल्चोक जिल्लाको आयआर्जनमा महत्वपूर्ण भूमिका निर्वाह गर्ने भएकाले पनि सो नाका खुलाउन चीन सरकारसँग पहल गर्नुपरेको नेता सापकोटाको भनाइ छ ।

नेता सापकोटाले नेपालले सुरक्षा चुनौती हुन नदिने प्रतिबद्धता जनाएपछि चीन सरकार सो नाका खुलाउन तयार भएको पनि स्पष्ट पार्नुभयो ।

अन्तिम अपडेट: बैशाख २३, २०७६

तपाईको प्रतिक्रिया