बेलायती प्रधानमन्त्री टेरिजा मेले राजीनामाको घोषणा गरेसँगै भावी प्रधानमन्त्रीका लागि सम्भावित पाँचजनाको नाम अगाडि आएको छ । 

अहिलेसम्म १२ जनाभन्दा बढी सांसदहरुले भावी प्रधानमन्त्रीको पदका लागि उम्मेदवारी दिने सम्भावना जनाएका छन् । प्रधानमन्त्री मेको राजीनामा घोषणाले बेलायती राजनीतिमा हलचल बढेको छ । 

१२ जना मध्ये सम्भावित पाँच जनाको नाम भने चर्चामा छ । ती पाँच नामहरुमा विदेश मन्त्री जेरेमी हन्ट, पूर्व विदेश मन्त्री बोरिस जोनसोन, स्वास्थ्य मन्त्री म्याट ह्यान्कक, रोरी स्टुअर्ट र एस्टर मैक्वे रहेका छन् ।

अमेरिकी राष्ट्रपति डोनाल्ड ट्रम्पले पनि बेलायती राजनीतिको बारेमा आफ्नो धारणा राखेका छन् । राष्ट्रपति ट्रम्पले कन्जर्भेटिभ पार्टीका नेता बोरिस जोनसोनलाई देशको अगामी प्रधानमन्त्रीका रुपमा देख्न चाहेको बताएका छन् । 

पत्रकारहरुसँग कुरा गर्दै राष्ट्रपति ट्रम्पले बोरिस जोनसोन निकै प्रतिभाशाली व्यक्ति भएको बताएका छन् । ‘जोनसोन प्रधानमन्त्रीका रुपमा राम्रोसँग काम गर्न सक्छन्,’ ट्रम्पले भने । 

ट्रम्प भन्छन्, ‘मैले यसका बारेमा निकै गहनरुपमा सोचेको छु । मैले सबै खेलाडीहरुलाई चिनेको छ । तर मेरो विचारमा बोरिस जोनसोन नै राम्रो काम गर्न सक्छन् ।’ तर राष्ट्रपटि ट्रम्पले अन्य उम्मेदारवाई पनि सहयोग गर्न आफू तयार रहेको बताएका छन् । 

आगामी हप्ता राष्ट्रपति ट्रम्प बेलायत भ्रमणममा जाँदै छन् ।