काठमाण्डौ – आईसीसी विश्वकप क्रिकेट अन्तर्गत दक्षिण अफ्रिकाले बंगलादेशविरुद्धकाे खेलमा टस जितेर पहिला फिल्डिङ गर्दैछ । केनिंगटनकाे ओभल मैदानमा नेपाली समय अनुसार दिउँसो सवा तीन बजे खेल सुरु हुँदैछ ।

उद्घाटन खेलमा इंग्ल्याण्डसँग पराजित भएको दक्षिण अफ्रिका पछिल्लो खेलको नतिजा आजको जितको खोजीमा मैदानमा उत्रने मनस्थितिमा छ । बंगलादेश भने पहिलो खेलमा उत्कृष्ट प्रदर्शन गर्दै सुखद् सुरुआत गर्ने लक्ष्यमा रहेको छ । विश्वकपमा यी दुई टिम अहिलेसम्म तीन पटक प्रतिस्पर्धा गर्दा दक्षिण अफ्रिकाले दुई तथा बंगलादेशले एक पटक जितेको छ ।

बंगलादेशका लागि शुक्रबार अभ्यासका क्रममा घाइते भएका तमिम इकबालले खेल्ने भएका छन् । किनकि तमिम ओपनर मात्रै नभइ भरोसा गर्न योग्य ब्याट्सम्यान पनि हुन् । त्यसैगरी रुबेल हाेसेन भने चाेटका कारण खेल्न पाउने छैनन् ।

दक्षिण अफ्रिकाका हसिम अमला पनि चाेटका कारण आजकाे खेल खेल्ने छैनन् ।  इंग्ल्याण्डविरुद्ध जोफ्रा आर्चरको बाउन्सरमा अमला घाइते भएका थिए । हेलमेटमा चोट लागेपछि उनी पेभेलियन फर्किएका थिए ।

उनकाे स्थानमा डेभिड मिलरले खेल्नेछन् । त्यसैगरी डेल स्टेनकाे स्थानमा क्रिस माेरिस आएका छन् ।