कांग्रेस अलि बढी आत्तियो : ओली

 जेठ ५, २०७५ शनिबार १८:५९:४० | उज्यालो सहकर्मी
unn.prixa.net

काठमाडौं, जेठ ५ – प्रधानमन्त्री केपी शर्मा ओलीले मुलुकलाई अघि बढाउन अनुकूल भूमिका खेल्न सक्ने औचित्यका आधारमा संविधान संशोधन गरिने बताउनुभयो ।

पार्टी एकीकरणपछि शनिबार संघीय संसद भवन नयाँ बानेश्वरमा बसेको संसदीय दलको पहिलो एकिकृत बैठकमा नेकपाका अध्यक्ष प्रधानमन्त्री ओलीले मुलुकलाई अघि बढाउने सवालमा संविधान संशोधन हुने बताउनुभएको हो ।

उहाँले राष्ट्र विकासको साझा संकल्प पूरा गर्ने सवालमा संविधान संशोधन गरिने बताउनुभयो । ओलीले राष्ट्रियता, सार्वभौमसत्ता, स्वाधीनतालगायत आन्तरिक मामिलामा स्वतन्त्र राष्ट्रको हैसियतको सरकारले काम गर्ने स्पष्ट पार्नुभयो । अरुबाट नियन्त्रित र निर्देशित भएर सरकार नचल्ने भन्दै उहाँले राष्ट्रिय स्वभिमानमा आँच आउन नदिने पनि स्पष्ट पार्नुभयो । 

समानताका आधारमा छिमेकी राष्ट्रसँगको सम्बन्ध कायम रहने उल्लेख गर्दै उहाँले लामो समयदेखि विराटनगरमा भारत सरकारले स्थापना गरेको सम्पर्क कार्यालय अब नरहने विश्वास दिलाउनुभयो ।

सबै दृष्टिले सबैभन्दा ठूलो लोकतान्त्रिक पार्टी नेकपा भएको भन्दै उहाँले नेपाली कांग्रेसलाई नआत्तिन आग्रह गर्नुभयो । उहाँले भन्नुभयो, ‘नेपाली कांग्रेस अलि बढी आत्तियो । नेपाली कांग्रेस आत्तिनु पर्दैन । नेपालमा सबैभन्दा बढी डेमोक्रेटिक पार्टी नेकपा भएको छ । त्यसैले अध्यक्ष पनि दुईवटा भएका छन् ।’

उहाँले विपक्षीलाई दमन गर्न र अनुचित ढंगले प्रयोग गर्नका लागि शक्ति आर्जन नगरेको स्पष्ट पार्नुभयो । नेकपाले पाएकोे ब्रह्मास्त्र अनुचित स्थानमा प्रयोग नहुने उहाँले स्पष्ट पार्नुभयो ।

पछाडि परेका समुदायलाई अगाडि ल्याउन सरकारले विशेष नीति बनाएको उल्लेख गर्दे उहाँले विकासका उद्देश्यलाई साकार पार्ने गरी  सरकारको नीति तथा कार्यक्रम आउने बताउनुभयो ।

अन्तिम अपडेट: कात्तिक ७, २०७५

तपाईको प्रतिक्रिया