जनता आवास कार्यक्रमको लापरबाहीका कारण भीरकोटका तीन परिवार बिचल्लीमा

 साउन ८, २०७६ बुधबार ८:३०:५६ | उज्यालो सहकर्मी
unn.prixa.net

स्याङ्जा– ‘जनता आवास कार्यक्रम’को लापरबाहीका कारण स्याङ्जाको भीरकोट नगरपालिकाका तीन घर–परिवार बिचल्लीमा परेका छन् । भीरकोट नगरपालिका अलैँचीखोलाको माझी बस्तीका  तीन ओटा घर जनता आवास कार्यक्रमले निर्माण गर्ने भन्दै काम सुरु गरेको थियो ।

घरको जग मात्रै खनेर महिनौँसम्म बेपत्ता भएकोे भन्दै पीडितले दुखेसो गरेका छन् ।

भीरकोट नगरपालिकाका ४ वटा वडामा जनता आवास घर निर्माण समिति गठन गरी ५० घर निर्माणको लागि सम्झौता गरिएको थियो । सम्झौता अनुसार केही १०/१२ घर  निर्माण सम्पन्न भएता पनि अधिकांश घरहरुको निर्माण अस्तव्यस्त छ । निर्माण सम्पन्न भएका घरहरुलेसमेत पहिलो किस्ता पनि नपाएको बताएका छन् । 

अलैँचीखोला टोल विकास समितिका संयोजक राजकुमारका अनुसार कतिपय नागरिकका पुराना घर नजिकै जनता आवास कार्यक्रमले नयाँ घरको जग खनेर छोड्दा पुरानो घर भत्किएर झन् बिचल्लीमा परेका छन् । माझी बस्तीमा घरको जग खनेर छोड्दा नजिकै रहेको घर भत्किँदा स्थानीय डिलबहादुर बोटेको परिवार झन् बिचल्लीमा परेको छ ।

जनता आवसले घर निर्माण गरिदिने भएपछि यहाँका स्थानीय हर्षित थिए तर अहिलेसम्म घर निर्माण नहुँदा झन् हैरानी खेप्नुपरेको स्थानीय पीडितहरुको गुनासो छ ।

पीडित घरपरिवारको अवस्था हेरेपछि नगर प्रमुख छायाराम खनालले जनता आवासले घर निर्माण नगरे त्यस्तै प्रकारको घर नगरपालिकाले बनाइदिने प्रतिबद्धतासमेत व्यक्त गर्नुभयो ।

अन्तिम अपडेट: साउन २८, २०७६

तपाईको प्रतिक्रिया