काठमाण्डौ – नेपाल वायुसेवा निगमले भदौ १२ गते अर्थात अगष्ट २९ तारिखदेखि काठमाडौं–ओसाका उडान गर्ने भएको छ ।

निगमले गएको असार १९ गतेदेखि ओसाका उडान गर्ने भनेर केही टिकट बेचे पनि यात्रु नभएको भन्दै उडान स्थगित गरेको थियो । अब भदौ २९ गतेदेखि हप्तामा २ वटा उडान हुने निगमका प्रवक्ता गणेश चन्दले उज्यालोलाई जानकारी दिनुभयो ।

‘यसअघि हामीले उडानको तयारी गरे पनि एजेन्टले राम्रोसँग काम नगर्दा यात्रु पाएनौँ, तर अब नयाँ एजेन्ट राखेर टिकङ बुकिङ खुला गरिसकेका छौँ, अब भने उडान स्थगित हुँदैन ।’ चन्दले भन्नुभयो ।

अहिले धेरैले नेपाल–जापान उडानको बारेमा  जानकारी राखेको र केहीले टिकट नै बुकिङ गरिसकेको उहाँले बताउनुभयो । प्रवक्ता चन्दका अनुसार काठमाण्डौबाट ओसाका जाने पहिलो उडानको लागि ३ जनाले टिकङ बुकिङ गरिसकेका छन् भने फर्कँदालाई ७ जनाले बुकिङ गरेका छन् ।

‘हामीसँग अझै १ महिनाभन्दा धेरै समय बाँकी छ, एजेन्टलाई अलि धेरै सक्रिय बनाउन सकेमा यात्रु नहुने कुरा आउँदैन, सुरु–सुरुमा त कम यात्रु भए पनि उडाउनैपर्छ’, उहाँले भन्नुभयो ।

निगमले ओसाका उडान नेपाली यात्रुको लागि भन्दा पनि जापानी यात्रुका लागि लक्षित रहेको बताएको छ । ओसाका क्षेत्रमा नेपाली नागरिक कम भएको र पर्याप्त यात्रु नपाउने भन्दै निगमलाई नारिता उडान गर्न सुझाव आए पनि ओसाका नै उडान गर्ने तयारीमा छ ।

— Nepal Airlines🇳🇵 (@NepalAirlinesRA) July 24, 2019

नेपाल एअरलाइन्सले काठमाण्डौ–ओसाकाको एकतर्फी भाडा ४५ हजार र दुईतर्फी भाडा ७७ हजार रुपैयाँ तोकेको छ ।

निगमले सन १९९४ देखि २००७ सम्म जापानमा साताका दुई उडान गरेको गरेको थियो । तर जहाज अभाव हुँदै गएपछि १२ वर्ष अघिदेखि नेपालबाट जापानको सिधा उडान रोकिएको छ । १२ वर्ष अघिदेखि गुमेको मौका निगमले फेरि फर्काउने प्रयास गरिरहेको छ ।