काठमाण्डौ – गएको आर्थिक वर्षमा नेपालको व्यापार घाटा १३ खर्ब रुपैयाँभन्दा धेरै पुगेको छ ।

आर्थिक वर्ष २०७५/७६ मा नेपालले १४ खर्ब १८ अर्ब ५३ करोड रुपैयाँको सामान आयात गरेकोमा जम्मा ९७ अर्ब १० करोड रुपैयाँको सामान निर्यात गरेको छ । नेपालको व्यापार घाटा १३ खर्ब २१ अर्ब रुपैयाँ पुगेको छ । आर्थिक वर्ष २०७४/७५ मा नेपालको व्यापार घाटा ११ खर्ब ६३ अर्ब रुपैयाँ रहेको थियो ।

गएको वर्ष नेपालले २ खर्ब ५४ अर्ब रुपैयाँ बराबरको पेट्रोलियम पदार्थ आयात गरेको छ भने ९१ अर्ब १५ करोड रुपैयाँको गाडी र ५१ अर्ब रुपैयाँको खाद्यान्न आयात भएको छ । हरिया तरकारी र फलफूलको आयात पनि चुलिएको छ । गएको वर्ष २८ अर्ब रुपैयाँको तरकारी आयात भएको छ ।  

हवाई जहाज र र पाटपूर्जाको आयात पनि आयात हुने मुख्य वस्तुको सूचीमा परेको छ ।

भन्सार विभागका अनुसार सबैभन्दा धेरै व्यापार घाटा भारतसँग हरेको छ । गएको वर्ष नेपालले भारतबाट ९ खर्ब १७ अर्ब ९२ करोड रुपैयाँको  वस्तु तथा सेवा आयात गरेको छ  । तर निर्यात भने जम्मा ६२ अर्ब रुपैयाँको मात्रै भएको छ ।

भारतसँगको व्यापार घाटा ८ खर्ब ५५ अर्ब रुपैयाँ पुगेको छ । यस्तै चीनसँगको व्यापार घाटा पनि २ खर्ब रुपैयाँ नाघेको छ । चीनबाट गएको २ खर्ब ५ अर्ब ५१ करोड रुपैयाँको वस्तु तथा सेवा आयात भएकोमा जम्मा २ अर्ब १० करोड रुपैयाँको मात्र निर्यात भएको छ ।

नेपालबाट निकासी भएका प्रमुख वस्तुहरुमा पोलिष्टर तथा अन्य धागो, पाम आयल, ऊनी गलैंचा, फलाम तथा स्टील र तिनका उत्पादनहरु, तयारी पोशाक, जुट तथा जुटका सामानहरु, जुस, अलैंची, कपडा, चिया, पश्मिना सल रहेका छन् ।