सर्वदलीय बैठक : लोकतान्त्रिक गणतन्त्र र प्राप्त उपलब्धि रक्षा गर्न सबै दल एकजुट

 भदौ ३, २०७६ मंगलबार २१:५८:५२ | उज्यालो सहकर्मी
unn.prixa.net

काठमाण्डौ - प्रधानमन्त्री केपी शर्मा ओलीले बोलाएको सर्वदलीय बैठकमा देशले प्राप्त गरेको उपलब्धिमाथि प्रहार गर्ने तत्व र शक्तिहरू सक्रिय भएको भन्दै छलफल भएको छ ।

प्रधानमन्त्री ओलीले मंगलबार साँझ आफ्नो सरकारी निवास बालुवाटारमा बोलाउनु भएको बैठकमा लोकतान्त्रिक गणतन्त्रको एजेन्डामा एक भएका दलहरु फेरि एकपटक एकजुट हुनुपर्ने बताउनु भएको छ ।

बैठकपछि सम्वाददाताहरुसँग बोल्दै नेकपाका प्रवक्ता नारायणकाजी श्रेष्ठले बैठकमा प्रधानमन्त्रीले देशको पछिल्लो अवस्थामा लोकतान्त्रिक शक्तिहरु समझदारीसाथ सहकार्य गर्न आवश्यक भएको धारणा राखेको बताउनुभयो । प्रधानमन्त्रीले बैठकको सुरुमा विषय प्रवेश सँगै गणतन्त्र, संविधान, लोकतन्त्र संघीयतामाथि निरन्तर आक्रमण हुन थालेको भन्दै चिन्ता व्यक्त गर्नु भएको प्रवक्ता श्रेष्ठले बताउनुभयो ।

साथै प्रधानमन्त्रीले देशका विभिन्न भागमा बढ्दै गएको हिंसात्मक गतिविधिविरुद्ध एक भइ सरकारलाई सहयोग गर्न आग्रह पनि गर्नु भएको प्रवक्ता श्रेष्ठले बताउनुभयो । बैठकमा सहभागी दलका शीर्ष नेताहरुले प्रधानमन्त्रीको धारणामा सहमत हुँदै लोकतान्त्रिक गणतन्त्र र प्राप्त उपलब्धिको रक्षा गर्न सरकारलाई साथ दिन तयार रहेको धारणा राख्नु भएको पनि प्रवक्ता श्रेष्ठले जानकारी दिनुभयो ।

मंगलबार बसेको बैठकमा समसामयिक राजनीतिसँगै प्रधानमन्त्रीले आफ्नो स्वास्थ्यबारे नेताहरुलाई जानकारी गराउनु भएको थियो ।

बुधबार पुनः सर्वदलीय बैठक बस्ने भएको छ । बुधबारको बैठकमा सत्य निरुपण तथा मेलमिलाप आयोग र बेपत्ता छानबिन आयोगको पदाधिकारी चयन र शान्ति प्रक्रियाका बाँकी काम कसरी सम्पन्न गर्ने भन्ने विषय केन्द्रित छलफल हुने प्रवक्ता श्रेष्ठले जानकारी दिनुभयो ।

अन्तिम अपडेट: भदौ ७, २०७६

तपाईको प्रतिक्रिया